成長之路上嘅跌宕起伏就緊係會有架喇,做人阿媽始終都會有擔心,但我對QQ嘅傷勢或病情唔知點解比我預期無咁緊張,有一度以為係我唔夠母愛,但後來再諗,可能係因為我做得足夠準備功夫,所以咪唔驚囉。同埋我覺得唔驚唔頻能都好緊要,因為做人阿媽仲要分精精去安撫其他4大長老同親戚嘅情緒,先唔會二次加劇令到自己更緊張⋯⋯
碌落床撞瘀左額頭
出世檢查唔計,出生期後嘅第一次入院見伍醫生就係10個月嘅時候。
20220609,10m1,岩岩屋企裝修,搬左去第二度暫住,同大人一齊訓,未裝床圍。晨早我起身落床去刷牙準備返工,拍醒小寶訓出床邊。唔知小寶未訓醒定點,佢走左出廳。
我刷刷下牙,聽到boom一聲,地下一震,就聽到QQ大喊。QQ碌左落床,唔知邊度落地,小寶話入房時佢大字形面向上訓向地下。keep住大喊,無嘔,幾分鐘就見到額頭瘀左成個拳頭咁大。
即時請假,埋身餵奶,我仲要言語上安撫小寶「嚇親爸爸啦,爸爸都好驚」,明明我都好驚佢跌到智商減10。抱落bb床,QQ又醒番,企番起身,識笑,識指人。book左13:50見醫生。
佢自由落地果下無喊,我諗佢應該唔知呢個咩感覺。
- 醫:咩事睇醫生(佢跌左落床,撞瘀左,無嘔)
- 醫:上次黎(Health Baby clinic,QQ向港安join左打針plan同睇發展,所以唔洗塊健康院)咪提左你呢個月齡,多爬爬行行,要大人睇實啲囉。點解會跌到架。(這個鍋我不背,「我今朝刷牙準備返工,老公睇住架」然後示意比小寶答)
- 小寶:我行左出房⋯⋯無床欄⋯⋯就boom一聲啦
- 醫:睇落無乜野,(大力一按,QQ爆喊),似係瘀左啫,但安全啲,照下CT,但會有輻射,同埋BB太細,要食完藥訓左先照得,你地睇下邊個陪佢照啦。(可以claim保險就照啦,但佢好難訓教)
- 醫:因為係額頭瘀左,瘀血有機會會跌到隻眼附近,可能會眼腫,唔駛查野,慢慢就會散架啦
- QQ唔肯食藥,食半支就喊,喊到嘔番曬出黎,嘔到我成件衫都係,原來帶bb睇醫生,大人都要準備多件衫。仲搞到醫生要再開一次藥。阿媽最驚佢overdose,所以用盡九牛二虎之力氹佢訓,唔知係我勁,定佢條脷掂到藥水已經淪陷左,佢好快手抱訓著左。我即刻叫小寶叫姑娘,快呀,唔好比佢醒呀!
- 點知都等左半個鐘先入CT房,由於我未黎M,唔想take risk簽「無懷孕」證明,比小寶抱左入去。
- 照完,我最緊張係張收據,係咁提小寶拎收據,claim保險。
- 最後報告無事,保險條數亦好快recover左,爽。
- QQ個頭,三個月後先開始散瘀。中期會摸到有舊硬物向瘀左位置,我會驚會唔會影響佢頭骨生長。老一輩又話要銀雞蛋呀,母乳加拖鞋呀(乜料)捽散瘀血,我通通hea做,可能因為咁先要三個月先搞掂。
- 只係,如果日後發現QQ好蠢,或者智商低,咁一定係小寶嘅錯。
第一次發燒
不枉我堅持人奶之路(或者應該唔關事,但餵左咁耐,點都比我內心好過啲,當關事啦),QQ撐到16個月先第一次發燒。之前一晚去左親戚婚禮,QQ著得好靚,但有啲薄,場地好凍都可能有關。然後好多親戚人人都抱過,可能身上有輕微感冒菌都唔定。
16m22,可能琴晚太多人抱,或著太少衫,今日第一次發燒。
- 17:30 – 37.1度
- 19:15 – 38.1度,個人仔無曬力,扭抱,成隻樹熊咁
- 19:30 – 餵藥
- 19:50 – 自己飯仔唔食,係要我抱,搶我啲大人飯食,點知食完半碗飯,就連埋粉紅色藥水一齊嘔落我心口。因為藥入口掂到脷都會吸收左架啦,為左唔好overdose,所以當佢食曬啲藥架啦。
- 22:45 – 36.9度
第一次發燒,完。餵一次(仲要嘔埋)嘅藥就搞掂,正。
第二次發燒
20230413 20m5,星期四,上完VPP,可能因為多左小朋友唔戴口罩?或者係人奶抗體fade out?
- 16:50 – 37.9 但精神,仲話「要食爺爺蛋撻」
- 食紫菜包飯,仲要指定要triangle定rectangle。
- 21:00 – 餵藥,「食甜甜」「甜甜好食」QQ主動追住食
- 22:00 – 37.2,仍然要睇書先肯訓教
- 02:00 – 37.6,唔係病懨懨架,真係坐直個人
- 03:50 – 38.9,話要用耳探「嗶」,又要「食甜甜」,仲主動要飲水
- 04:00 – 藥,「要食一個甜甜,媽媽食一個,爸爸食一個」
- 07:00 – 36.7
燒左4日,反反覆覆,食藥就退燒,日頭又唔燒,半夜又燒。最緊要係佢keep住好精神,唯一無精神就係想扭爺爺嫲嫲果時。然後星期日(又避安息日)去左港安睇兒科。
- 醫:咩事黎睇(佢發燒呀,一比退燒藥就退燒,無流鼻水無咳,但好精神)
- 醫:燒左幾多日(4日)
- 醫:最高燒幾多度(39)
- 醫:第一日呢(37.9)
- 醫:有無其他屋企人有病徵(無,但我覺得我就黎比佢傳染到發燒,我眼皮好熱呀)
- 醫:(笑)你話佢無流鼻水無咳無打乞嗤,點傳染你呀(⋯⋯)
- 醫:大便點(兩日無痾啦,可能食少左野,所以無得痾)
- 醫:佢胃口點?(少左2-3成啦)咁又唔係好少
- 醫:(拎雪條棍撬開QQ把口,QQ咪到實一實,笑死我)咁醒嘅你
- 醫:玫瑰疹,泡疹病毒感染;(用燈照背脊)拿,出咗兩粒啦,退燒之後會繼續出疹(!?係咪你照佢先誘發佢出疹架?!)。正常嘅話發燒會發五日,通常會有精神,冇其他病徵。應該發燒發埋今日,就會退燒,然後就會開始出疹,最快星期三啦,就會退晒啲疹。唔需要有其他特別處理,正常沖涼。有機會會屙爛屎。有無問題?
- 我:咁基本上係咩原因導致架?(其實我想問可以點避免)
- 醫:都話係泡疹病毒感染囉。照正常啦,發燒都係食必理痛退燒,唔發燒就唔使食,屋企仲有藥?(仲有支半)所以唔使額外開藥。
當晚就痾爛屎,醫生說得對,我地唔應該challenge醫生嘅。然後沖涼就肉眼可見,背脊心口開始起疹。星期二就到塊面出疹。
然後又到星期二,先醒起QQ成面紅疹,上唔到堂。打去VPP,都建議要拎醫生紙請病假補堂。打去港安TWAH(好彩係醫院,唔係診所),可以去醫療紀錄部補發醫生紙,等醫生簽完,會郵寄到府上,正。