育兒 – 報學校 / 面試相 / 證件相

去到差唔多出世後一年嘅六、七月,就要開始物色幫QQ報學校,當然要影張面試相先啦。

買好衫,比兩次機會QQ,影左弘大同Verano。

影學生相衫/面試衫

去左mothercare睇有無有領嘅衫仔,點知全部都好causal。

最後去左jacadi買影學生相上衣。因為影相淨係見到上半身,唔使買全套。媽媽表示淨係上半身都好貴⋯⋯

而面試嘅時候多數會喺下一個季節,所以多數唔可以用返影學生相嗰件衫。面試衫到時睇happy milk。我一路以為時裝嘅分類係連衣裙、半身裙,我宜家先知原來有一個係系列叫interview wear……

學生相(定報學校相呢) (11m27) – 弘大

除左初生未滿月嘅時候,為左申請passport同QQ影過$40嘅證件相,之後就係ABC Studio。因為疫症關係都無逐個月出去影成長相,冇咗啲儀式感。

望住平時QQ嘅相,全部都係整估做怪…為左要影正經啲嘅相報學校,個半月前(10m+, 6-7月)就開始預約弘大證件相,點知旺季已經要book到一個月之後,我都係低估左香港媽媽嘅癲狂。

Book左個星期日之後,然後又報左Artplus 嘅星期日10堂bb班,未至於撞時間,但半個鐘係好難往返尖沙咀同觀塘嘅…唯有再改期拍攝…

一改就變平日下午,都好,QQ精神好啲,可以飲飽食醉先去影。

影相過程又要拎duck duck,又要攝影師姐姐hak chi,又要爸爸飛高高。點知飛嘅時候笑得好開心,未land之前就收番個笑容,爸爸表示命都無。

又不停用手指着前面隻鴨,搞到女攝影師要收埋隻鴨,點知個女烏身向前想搵返隻鴨,仲衰。坦白講女攝影師算有耐性,但係都比QQ逼到癲咗。同埋可能一日影太多相,所以做到滑咗牙。

好彩,6-70張相都有2-3張相有笑,其他相都係猙獰樣…終於揀到一張,執相姐姐好pro(雖然好冇耐性)。你想像唔到呢張相,佢係啱啱飛完高高跌返落嚟,成件衫歪咗去右邊,執相可以將歪左啲上衣都可以夾硬拉番正。然後白色花花領飛起咗,我見住佢Photoshop咁樣撳返個領落嚟,真係神乎其技。技術上嚟講佢係得嘅。

理論上係影15分鐘,但QQ都影左差唔多四五個字。後邊有個男仔影左百幾張相,都唔笑,要休息吓之後再影過。

第二次學生相 – Verano

影咁多?其實諗住俾多次機會QQ,同埋順便睇吓邊間好之後每年去影一次。

之後再book左元朗123studio(聽人講係平靚正),但因為又book埋verano(成五舊水,聲稱影得好自然),所以放左123studio個期出去比朋友。

影相呢家野人夾人嘅。有媽媽會選擇去影legendary,仲話如果小朋友個身坐唔正,會pro到key第二個小朋友個身落去⋯⋯淨係咁我已經唔會選擇去影。but never say never,可能若干年後我都會去影呢。

12m25 – Verano

  • 疫症下消毒做得好足
  • 女攝影師,有助手
  • 攝影師超有耐性,有愛心,比弘大感覺好超多
  • QQ收穫左一句豬髀仔
  • 「你坐得咁粗獷」
  • 爸爸幫手捉住佢隻手
  • 唔洗做太多野,突然就話影好左
  • 全程都好友善
  • 唔洗揀乜滯,因為得兩張大眼可以揀
  • 會建議邊張做面試相
  • 雖然其他嗰啲唔可以做證件相,但係影得非常好,將佢個衰樣影得一覽無遺
  • 最後唔洗執相都已有執相效果
  • 價錢一張$528,等於影兩次弘大$250,但未執相已經有弘大效果
  • 好想買埋其他相,點知佢話package係逐張計,唔同package係包相框,逐張相就要逐個package買⋯⋯即係揀兩張就$528 X 2
  • 要等兩星期先有soft copy及sf
  • 好多名校生黎影學生相
  • 德望、St. Paul、St cat、LH

發表回覆

你的電郵地址並不會被公開。 必要欄位標記為 *