2021年11月，終於坐完月，又回番條氣。果然生仔真係搵命博，頭三個月都係有氣無力咁捱過去，又唔夠訓，傷口又好痛（我已經係順產囉唔該）。真係好需要做個spa，回一回氣。小寶book左$3000左右嘅Cordis，包三道菜晚餐，包入lounge，仲要包雙人川spa，嘩。平時一個人都差唔多$1000架個spa，今次仲唔抵到爛！
Check in Kitty 好 nice，話我地可以上lounge果層度check in，飲番杯果汁先。現場陽光好晒，落地玻璃落旺角。我好眼瞓，之前一晚QQ半夜唔訓教，所以無心機亦唔好意思影相。
Club lounge 飲住野 check in，Jonah 好considerate。Jonah 話Club lounge 蛋撻同scone 好食。轉頭去試吓先。Cordis好似K11 Artus咁，行藝術路線。
入房放落行李先。
仲有welcome gift，因為我仲要泵奶，所以瀝乾水，打包帶走。
同結婚嘅房、浴室都係一樣格局。
係2019年果時，已經好欣賞嘅設計，放舊番梘上去可以流水落洗手盆。
咁貴嘅package，梗係唔好留響間房太耐，直接入lounge。lounge嘅環境幾cozy。人唔多，仲有一對姊弟向度玩ipad，應該係爸爸媽媽向度長住，所以小朋友可以入中lounge玩？
小寶話蛋撻唔夠KFC好食。吞拿魚三文治好食。Scone底好脆，唔算太好食。仲有floor staff嘅專業攝影服務，仲指導埋我同小寶點樣擺pose。
飲杯嘢，差唔多夠鐘就返房泵奶，泵好就打電話叫人來收奶去雪櫃。
泵完奶又夠鐘Cocktail，book左7點做spa。floor staff仲調左兩杯cocktail比我哋試，話係佢嘅signature drinks。幾fresh。
明明已經夠鐘要去做spa，但見到佢出雞槌仔！小寶話佢可以1分鐘食一隻，我諗我哋每人食咗兩次以上。仲好食過麥當勞嗰隻，我哋都唔算好肚餓，可能係因為新鮮炸起，真係超好食！
然後就去到做Spa，亦係泳池附近。我真係有打開啲百子櫃黎睇，入邊真係有放藥材類嘅嘢。飲杯茶先，定一定個人。但係我哋為咗要食雞錘仔，已經遲到，唯有快快飲。
開始之前會比小寶聞五行味道嘅精油，俾佢揀一種最鍾意嘅味道，相對應喺心肝脾肺腎。
原來餵緊人奶嘅媽媽係唔可以用精油按摩。所以會俾係無味嘅油我按。
然後會做一個呼吸練習，先開始真係按。harmony真係唔痛，勁舒服，一路做一路諗，一定要努力搵錢，多啲黎放鬆下身心靈。
做完Spa之後，會帶你去休息室。飲番杯茶，食杞子糕，西瓜，全部有保鮮紙。我懷疑係西瓜出事，古今中外衰肚痛嘅多數都係衰西瓜。當時飲茶、食生果，確係幾relax嘅。
返入房食晚餐。個湯有罐頭湯嘅味道。定係可能Cocktail食得太多野，依家冇乜胃口食晚餐⋯⋯幾片青蘋果下面嘅好似係帶子沙律，食刺身一定上奶啦。
牛扒同三文魚，三文魚燶到有苦味。牛扒旁邊啲菇好食。然後甜品真係完全食唔落， 甜品盒下面有冰。既然飽得滯就將馬卡龍留番第二日食。康得思嘅西餐真係一般般。
點知半夜胃痛，又屙又嘔，嘔到成個洗手盆都好似蕃茄粥底咁，分咗三次黎嘔，嘔左出黎舒服左啲。仲整塞咗個洗手盆，留意番個洗手盆係透明嘅，真係好嘔心，後尾拍醒小寶搞番掂通返。
但都打電話俾前台留個訊息，費時話我特登整塞咗個洗手盆，順便叫佢攞兩支水同毛巾比我，冇乜事我都係上返床瞓陣先。點知前台同事打咗嚟兩次，一次嚇醒我，問我食左咩，我話自從check-in之後，就一直響個lounge，Cocktail，spa嘅休息室度食嘢。
當值經理又打嚟，問案發經過，free碗白粥，再叫同事去7-Eleven買兩支寶礦力，再送杯檸蜜比我。當值經理仲係咁chok我，問我check-in之前食咗啲乜嘢，我話我晏晝check-in之後就一直食緊酒店裏面嘅嘢，如果真係覺得有咩異樣，就係三文魚真係好燶。有少少唔開心，但係都明酒店係唔想負責嘅。
其實唔係有心R野⋯⋯不如你都係比我瞓啦。轉個頭就有同事黎送餐，我本身真係以為一碗外賣白粥，點知佢整咗個餐盤比我。唔知係咪嘔咗條腸出嚟，我真係覺得個白粥好好食。
然後小寶話：「梗係啦，中菜係明閣整㗎嘛。晚餐唔好食呀，係因為明閣唔識整西餐呀嘛。 」非常之有道理！
食完好綿嘅白粥，終於瞓得着。朝頭瞓早晏少少，起身又瀉咗一次。唔通係因為我食咗五更飯？！早上第一泵，泵出260ml嘅歷史新高！可能係staycation嘅威力。
泵完奶快快脆落去The Place食個快嘅自助早餐。基本上，又食咗兩碗粥。我見個肚開始冇乜事，偷雞飲咗兩啖茶走。
然後就諗住去泳池浸下水、吸收下陽光，睇吓會唔會快啲好返。泳池話唔可以着白色T恤落水⋯⋯我個肚啲皮仲係朵嘅⋯⋯anyway，無人識我。陀住嘅時候都無浸過，而家終於可以浸熱水，仲諗住唔好落泳池，直接落側邊個熱水池，點知熱水池冇開⋯⋯
浸一陣水，就響更衣室沖埋涼洗埋頭，係用川(Chuen)嘅洗頭水、護髮素、沖涼鹼。酒店真係好乾，查咗成支潤膚膏都仲係會乾度痕⋯⋯
Check out之前，再入lounge打個白鴿轉。
然後就拜拜Cordis啦，雖然今次玩到腸胃炎，向放完產假之前黎第一次staycation，都係爽嘅。或者可以考慮下，得閒來做spa都幾爽。
呢一期Cordis嘅合作畫家係⋯⋯Keigo⋯⋯「我的Staycation不可能那麼壞」，配合我又屙又嘔嘅呢一晚，又真係幾貼題嘅。
Cordis合集
Cordis 康得思 staycation – 2021 Mother’s Day
Cordis 康得思 staycation – 飲食（明閣晚餐）
Cordis 康得思 – 川 (Chuan) Spa 及「我的Staycation不可能那麼壞」