育兒 – QQ成長之路(0-1yo)

眠乾睡濕,要用食物餵飽QQ, 幫佢把屎把尿,簡直冇心機做其他嘢。

唯一嘅樂趣就係見住佢嘅成長。

D4+

QQ出世頭兩個禮拜,除咗換片、食奶之後,如果佢半夜再繼續扭計唔瞓,我試過用凌厲嘅眼神啤住佢,然後同佢講,你阿媽我想瞓覺,邊個係咁扭計。然後15分鐘內佢瞓着咗(半夜三點)。但我只係成功過一次。然後鬧完佢又會內疚,心諗佢咁細個邊度識表達呀,淨係識喊都好正路啫。

基本上就算出咗月,我都只係負責泵奶同餵奶,主要成個人瞓係張床度,又小寶抱隻野過嚟,放喺我心口食奶,然後我負責瞓覺。到佢飲飽食足,小寶就會將佢抱返佢去床到瞓,然後我繼續瞓覺。所以小寶真係神隊友。

有一日消化唔到陪月比嘅燒餅下午茶,夜晚胃痛到嘔。

可能食唔慣陪月整嘅嘢食,我差唔多隔兩日就會肚痾、痾水一次。

D9

左邊塞奶,右邊爆奶,因為飲咗上奶湯。第一次塞奶,由30-60,跌到得返10-30。

當晚產後檢,入醫院嘅時候塞奶燒,因為疫情但我又發燒所以直入去見醫生。睇完醫生,醫生話睇來睇去都唔見到邊度爆線,話傷口出邊同入邊都癒合得好好,又話有時㩒我傷口,我就嗌痛,有時我又話唔痛,佢話佢都唔知我做乜。

不過佢幫我剪咗啲線頭,整鬆咗啲線,叫我唔好再坐水泡話會令痔瘡受壓,生完都番唔到入去。叫我唔好就住佢,傷口明明康復緊,兩個星期再覆診。我話驚傷口發炎。醫生仲話,你想食藥咪開抗生素俾你囉。

D10

醫生鬆左線頭果晚,大出血,流出黎嘅血多到三條安睡褲都濕晒。我姑且當係啲惡露大部分出晒黎。

D12

陪月好專心養肥佢,QQ已經食到每一餐120ml(補奶粉)。而我每次只係泵到30至60ml⋯⋯係咪想逼死媽媽。

QQ好醒已經知唔駛出力啜,出力喊就可以用奶樽飲奶粉。都唔知係咪啜奶樽咀學壞左,慣左唔駛出力。

陪月話我真係唔係講笑,一時下面傷口痛,一時痔瘡痛,一時胃痛,一時痾嘔,一時乳頭損,一時塞奶痛。

D19

琴晚開始痔瘡又痕又痛,差啲要跪響到泵奶。醫生話,無得搞,範圍太大,如果用傳統切除方式傷口重大。只可以保守治療,即係查藥膏食必理痛,等佢自己消腫,話做媽媽係咁㗎喇。

D23

又會掃,又會拍,又會抱埋身直立佢,又會大迴環咁轉佢,次次玩成個鐘掃風。

D31

可以沖涼真係令人心情愉快。奶都多左,痔瘡又痛少左。其實會唔會根本就係有菌,所以先一路好唔返。

D38

QQ喊到走音,好似狼叫。

D43

唔知其他媽媽會唔會,埋完身之後個乳頭赤赤痛,有時仲會牙痛,然後成個人好似虛脫咁,隻嘢應該扯走晒我啲精氣神。

D61

開始紮肚,產後 – 紮肚篇

D83

琴晚黎返少少血,點知今日又無曬。我諗咁樣唔算黎m掛。

D87

11點放落床都要碌到1點先訓著。所以仍然都係果句,習慣就好。QQ係天生派對動物。

QQ未出世已經響個肚度踢到半夜一點,出咗世之後頭一個月每晚兩點到五點係最精神嘅時候。第二個月開始,就好規律地由一點瞓八九點起身。

依家六餐奶已經係9-12-15-18-21-23。日頭唔係瞓好多覺,每次瞓覺都係蝨乸教,15分鐘內一定起身。

我唔擔心佢頸部嘅肌肉嘅,因為佢由滿月開始,抱住都已經會自己顎高頭。媽媽心好累。

D90

流緊鼻水,好似傷風,但我照餵奶。戴住口罩啲菌唔好傳染佢,然後我母乳入邊會有抗體俾佢㗎嘛。

D100,好搞笑,QQ會扮曬野扶住個胸,之後就會食手。又試過一邊啜,一邊伸埋隻手指入去。「大人才做選擇,小朋友我咩都要」嘅概念。

D103

番工泵奶schedule
06:00 起身梳洗
06:20 泵奶加手揸
07:30 出門口
08:30 番到公司,洗杯斟水
食Materna、益生菌、華御結飯團
一大杯炒米水
11:00 泵奶
12:00 lunch
14:00 一大壺水
16:00 飲媽媽奶、食上奶曲奇
17:00 泵奶

D118

媽媽返工大塞奶,終於捱到放工,比QQ埋身。見「塞奶篇」。

D119

著返連衣裙,如果以前個胸係小山丘,而家就係珠穆朗瑪峰。小寶話你只係大帽山渣。

D128

QQ學識嚎啕大哭,睡眠倒退。學習由兩個階段,要變成六個階段嘅瞓覺。

D130

QQ笑到格格聲

D145

媽媽我甩少左頭髮。係咪啲荷爾蒙開始穩定啦。但係仲未嚟返M。

開始食上奶曲奇。QQ驅魔人食奶方法,又咬又啜又fing開個頭。QQ唔飲奶,係咁搞佢,腳板底,掂嘴角。

鹹豬骨頭BB。QQ個頭仲有少少頭泥,聞落去有啲似鹹豬骨味。

D148

BB有兩日開始有意識地望住媽媽食嘢飲水。仲想伸手拎我個哺乳水樽,一啖咬落個水樽度。之前一直都係嗰頭擰黎擰去,今日開始識得有意識地將上半身揈嚟揈去。

D150

有野I住時,識自己住起身,好快跌。有意欲想食腳指。

D151

QQ繼續尖叫。

D153

日頭無刺激,半夜3點喊醒,要食奶。

D158

我終於開始feel到體力番左黎,會有力去做番野。

D159

幫佢刷牙嘅時候發現,佢係咁咬我手指,都幾大力下。夜晚埋身就發現佢鍾意用個牙床來吞吐我乳頭。應該出牙痛?

D162

學識得拜拜嘅手勢。

D168

琴日開始R頭,捉住成執頭髮想扯落嚟。今日突然之間發現佢啲頭髮粗壯左仲好似密左。

D174

開始發現頭髮好濃密

D186+

開始好鍾意刷牙,第一round刷下面牙床,第二round刷上面牙床,第三round先己伸脷出黎等你刷脷。

D186

開始可以向BB床坐住向度玩床鈴。

D192

轉身啦!!!

D197

轉左用shnuggle max大盆沖涼。見「產後-4-5月購物清單」。

D200

教佢伸脷,阿媽伸左幾次,佢就係咁向度玩伸脷。

D203

識揚手叫嫲嫲抱佢上樓,搵媽媽食奶。

D212

識得自己用毛巾同我哋玩bu渣

D217

佢今日學識食腳趾。睡眠倒退期,要抱住瞓四個鐘,佢係咪未學習到睡眠時嘅聲音屏蔽呢。

D219

呢排厭奶,厭到食50ml一支餐。

7m

D222: 拍左幾次手比佢睇,QQ就學識拍手,然後開始日拍夜拍

開始有分離焦慮,明明屋企由細到大已經好多人都會抱佢,但只要一見到媽媽就會伸手想我抱

打完半歲針,成日成晚低燒,cocomelon放題,可能睇得太多藍光,連續幾晚半夜兩點醒

D225: 繼續厭奶。性格巨星,識推樽,仲識用手揸甩個樽個奶咀,顯示佢唔飲嘅決心。搞到要沖成2xx ml奶浴⋯⋯

D230: 夜晚變身尖叫雞。

D231 (7m19): 好慢用口型同佢講「爸爸」,佢識得「baba」,仲送多句「Hello」。

BB係分視覺、觸覺、聽覺黎學習。QQ擺明係用觸覺黎學習,咩都放入口。

7m24: 成日入錯咗後波,攝咗自己落去梳花底

8m1: 開始識肚餓,要搵飯食

8m8: 開始見到識爬

8m11: byebye時,啲手指有蠕動

8m27

識自己爬黎我個胸度,唔駛扶咁食奶

8m28

個身突然發現長左,腳又長左,食奶角度愈黎愈奇怪

8m29 

識扶住梳發自己企好

8m30

喜好分明,要果樣野就指住

2abc studio 

9m6

要plank住咁食奶係咩玩法

9m7

玩遙控,電視遙控風扇遙控冷氣遙控

開始知道電話都可以控制電視 然後用電話指着電視

9m8

見醫生睇成長,手指指係1歲先有嘅表現,小肌肉無問題,要訓練大肌肉

10m1

暫住未裝床圍,碌落床撞瘀左額頭

10m+

  • 跟住圖書上面嘅公仔搖動
  • 識得聽簡單指令
  • 鍾意飛撲埋去個書櫃度
  • 有自己嘅興趣識得揀玩具來玩
  • 識抽書出嚟(然後我會假民主,半抽2-3本書出黎,果晚佢就會揀個幾本書睇)
  • 識拍手抹地
  • 識Hello拜拜,港姐式wave
  • 識飛吻
  • 識乾洗手
  • 飾抹台,messy play 用自己條裙抹地,想打匾佢
  • 10m25
  • 出牙仔(下面2隻)

11m+

  • 識發爸爸媽媽音 試到叫到幾次
  • 識自己梳頭
  • 識放野入器皿
  • 識用毛巾洗杯
  • 識發脾氣或扮發脾氣
  • 識唔想食時,捉起食物掉落地
  • 識寫點心紙
  • 識用點讀筆
  • 第一句清晰識叫爸爸爸爸爸爸爸爸
  • 見到沖涼鴨識叫duck duck
  • 見到點讀筆識叫筆筆 (應該係識叫baba, duck duck, 所以識叫buck buck)

11m27

向佢面前數1234咁逐邊打開個膠盒,佢識收埋隻鴨,跟住1234咁閂番個膠盒

睇書時,見到佢有意識跟住扮食banana,識mum mum mum咁扮用手扮食

11m29

識自己企穩

育兒 – QQ成長之路(1yo+)

 


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲

產後打大佬

  1. 出院後嘅混亂人生 (D4-D100)
  2. 孕期 – 順產 or 開刀
  3. 產後媽媽身體變化
  4. 育兒 – Fun Fact
  5. 育兒 – QQ成長之路
  6. 育兒 – 加固之路

餵奶篇

  1. 孕期 – 奶粉選擇
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇
  9. 非官方非正式之塞奶原因
  10. 育兒 – 追奶之路

尿片篇

育兒 – 尿片篇

洗錢篇

  1. 產後 – 紮肚篇
  2. 嬰兒攝影 – venture studio
  3. 嬰兒攝影 – ABC studio
  4. 產後購物清單
  5. 產後 – 4-5個月購物清單
  6. 產後 – 6個月後購物清單
  7. 加固篇 – Bruno 豆漿機
  8. 加固篇 – Philips Avent 4合1蒸煮攪拌器

學習篇

  1. 育兒 – 學習之路
  2. 孕期 – 英語學習之比較(Disney/Oxford/D Mind)
  3. 育兒 – N/K班
  4. 育兒 – 報學校懶人包
  5. 元朗幼稚園懶人包(以偏概全版/集思廣益版)
  6. 育兒 – 書枱

發表回覆

你的電郵地址並不會被公開。 必要欄位標記為 *