育兒 – 追奶(又名塞奶)之路

既然揀得餵母乳,而我又唔係冇奶,只係少咋嘛,人奶條路難行啲啫,用意志力夾硬行去。我並唔係富媽媽,由佢出世開始,我就主打全力追奶。為左要追奶,有媽媽谷叫,每日飲4L水。大佬呀,我照腸鏡都飲唔到4L水。

後來都聽到有個講法,其實坐月嘅時候唔可以太貪心,又要補身、又要坐月、又要追奶。到頭來,會咩都做唔好。最好淨係揀一樣嘢專心認真去做,力量來自專心致志。但我好明白,嗰一個月係情緒最敏感嘅時候,咩人講嘅嘢都會聽唔入耳,「小朋友才選擇,而我咩都想要」。但都係果句,過咗就會好。

信我,響醫院嘅時候我1ml都吱唔到出嚟。我去到第二三個月,上晒奶,每次兩邊加埋都仲係得70-90ml。直到2個月後突然一次塞奶之後,就變成100-120ml。4個月,正常嘅每次150-180ml(除左又塞奶果時會係70-250ml)。第五個月平均都可以去到150ml,有一次仲單邊150ml,兩邊300ml。只要有恆心,謀事在人、成事在天架姐。

最後更新,餵到17個月仲有臨訓埋身,但開始feel到無乜奶,可能因為第二胎,收收地奶。最後一晚係18m,完場。

延伸閱讀:

育兒 – 塞奶篇(D118 D237)+解決塞奶方法
非官方非正式之塞奶原因

食物類

凡人講嘅,炒米茶(上奶)、媽媽奶(雅培最好味)、奶蓋鮮奶(老虎堂可以有純鮮奶,唔會有茶所以唔會有咖啡因)、通草(塞奶嘅時候飲)、花生豬腳(上奶)、魚湯(上奶)、卵磷脂(塞奶嘅時候食),我全部都有食,日日都有燉湯,keep住食、輪住食、冇停過。

Boobie Bikkies上奶曲奇(我向facebook ShopMAholic香港獨家代理買,因為最好3個月食曬,應該幾新鮮,唔好向小店買啦)、上奶朱古力bar。曲奇三隻味都試咗,普遍媽媽話原味即係雲呢拿味最好食,但我就覺得偏甜咗啲。而媽媽谷入邊唔鍾意嘅椰子味,反而我覺得啱啱好。所以真係好彩佢有promotion一次過買三盒共四百幾蚊,我同時可以試晒三隻味。我自己覺得有時有用,有時冇用,可能因為成日唔記得食,但放公司(返工泵奶篇)當零食食幾好,一日一塊,都係10幾蚊姐,懶係食啲健康啲嘅零食。成10幾蚊一塊曲奇,我偏向相信佢係有用嘅, 一日食一塊,就算每次多5ml都好過冇呀。

下一步會再試「壺蘆巴子」。 最後第一胎無試呢款,6個月過去,一直平安無事,順順利利餵到17個月。

運動類

有聽過媽媽講過,如果做完運動嘅話,啲人奶會變酸,佢嘅BB會唔鍾意食。無fact check純粹開心分享。所以我大條道理同小寶講,我已經好攰啦,我唔想做運動,搞到啲奶變酸。耶。

塞奶,我姑且當係胸部運動嘅一種。雖然係會痛,但可以幫助你增加儲奶容量。 我係一直咁樣說服自己,先至捱得過塞奶嘅痛。

第二個郁動個奶嘅方法,就係托住個胸左右打圈咁拋。有時QQ食晒前乳之後,唔肯食後乳,打圈chok下個胸,就可以搖到啲後乳出嚟。

第三個郁動個奶嘅方法,就係埋身,BB嘅嘴仔係可以刺激到個腦去做奶。就算埋唔到身,都要每三個鐘泵奶,全泵媽一樣可以上到奶。

只要做齊以上嘅嘢,再加上:

  1. 去奶泵城揀適合自己嘅奶泵(有聽過有啲媽媽揀返一個適合自己嘅奶泵,奶量係可以增加一至兩安士(30-60ml),亦有啲媽媽過咗三個月之後換奶泵parts,有增加到一安士)
  2. 飲夠水(日日向4L進發)
  3. 食上奶野
  4. 勤力按摩/埋身/power pump

然後就係要等時間,等個胸適應,等個胸ready。

有時又要平衡下埋身同泵奶嘅節奏,因為有時BB厭奶期嘅時候埋身,會令到嗰日嘅總奶量少咗。因為可能同乳頭sensor有關,埋身嘅時候身體會因應BB嘅需要,去調節奶量同埋奶裏面嘅營養。又可以講返綠色嘅母乳,綠色Covid母乳傳送門

埋身餵奶大事記

D-3

一早就已經知道韭菜同豬潤係上奶之路嘅魔鬼,係一定唔掂得嘅。我唔知發神經定係點樣,臨生早幾日,經過一間茶餐廳,我同小寶講真係好想食佢個豬潤薑面⋯⋯唔知係咪因為食咗呢碗豬潤,所以我響醫院嘅四日,1ml奶都冇⋯⋯

D0+

向醫院已經手把手咁比姑娘教啦,姑娘仲幫我打阿女嘴仔。

D4

信錯陪月(唔識呀嘛)出院之後叫我用電泵出力泵,仲要我戴handfree泵35分鐘,又係咁話其他客都係咁push上奶,然後一邊出血一邊甩皮(成2cm x1cm咁大塊皮)成個星期先好番。泵左35分鐘都係得10ml。

出血甩皮都好,查人奶,兩日就好番得7788。

每次埋身前都要食必理痛。

D9

左邊塞奶,右邊爆奶,因為飲咗上奶湯。第一次塞奶,由30-60,跌到得返10-30。

當晚產後檢,入醫院嘅時候塞奶燒,因為疫情但我又發燒所以直入去見醫生。睇完醫生,醫生話睇來睇去都唔見到邊度爆線,話傷口出邊同入邊都癒合得好好,又話有時㩒我傷口,我就嗌痛,有時我又話唔痛,佢話佢都唔知我做乜。

不過佢幫我剪咗啲線頭,整鬆咗啲線,叫我唔好再坐水泡話會令痔瘡受壓,生完都番唔到入去。叫我唔好就住佢,傷口明明康復緊,兩個星期再覆診。我話驚傷口發炎。醫生仲話,你想食藥咪開抗生素俾你囉。

D10

醫生鬆左線頭果晚,大出血,流出黎嘅血多到三條安睡褲都濕晒。都有可能係肌肉放鬆左,我姑且當係啲惡露大部分出晒黎。

D12

陪月好專心養肥佢,QQ已經食到每一餐120ml(補奶粉)。而我每次只係泵到30至60ml⋯⋯係咪想逼死媽媽。

QQ好醒已經知唔駛出力啜,出力喊就可以用奶樽飲奶粉。都唔知係咪啜奶樽咀學壞左,慣左唔駛出力。

陪月話我真係唔係講笑,一時下面傷口痛,一時痔瘡痛,一時胃痛,一時痾嘔,一時乳頭損,一時塞奶痛。

D20

泵到高峰期有80ml架,第2日就塞左⋯⋯通番又變番40。覺得乳頭好敏感。一直都係50-60,直到2個月後突然一次塞奶之後,就變成100-120。4個月,正常嘅每次150-180(除左又塞奶果時會係70-250)。

一日泵6轉。一日得一次左右埋身比佢試啜,因為QQ慣左奶樽咀,成日咬損我,損左又要等一排。

埋身啜唔岩嘅,我就打佢pat pat,用手指尾先救得番個乳頭出黎。QQ吸力勁,乳頭即損/歪左,手指尾有時都比佢吸左入嘴。乳墊想要軟熟既,因為真係好敏感,泵完奶都唔想放番入去個bra度。已經不停查母乳救亡。但本身兩邊奶量唔平衡,一邊得10一邊得30,QQ一餐食120。

D22

用緊36mm喇叭,之前唔識分size,用the inns 2x mm,點知整損咗個乳頭。

D26

又經歷完一次塞奶之後,黎緊啦!由5ml到今時今日90ml。

D27

第一次加埋90ml。

D30

第一次加埋135ml。創新高!因為朋友來玩,趁陪月唔係屋企,偷渡咗珍珠鮮奶比我飲。所以你話心情幾重要。

D31

第一次加埋150ml!可以花灑沖涼,慳左時間畢熟水洗面、洗裝奶泵,就可以試全日埋身啦!

可以沖涼真係令人心情愉快。奶都多左,痔瘡又痛少左。其實會唔會根本就係有菌,所以先一路好唔返。

D38

QQ喊到走音,好似狼叫。

我全日得3xx-4xx,琴日505覺得係人生高峰。有得餵,就非常好,佢腸道入邊就有足夠益生菌。

不過而家電泵泵多左,應該可以試多d埋身,因為之前有一邊一直都乳頭扁平,QQ唔肯啜,靠電泵先出番d。

D39

連工人姐姐都檢到槍,行過就講「bb喊係唔飽呀,食呢d(指住我個胸)唔飽呀」。

泵媽都會攰到咁,反正乳牛唔會有羞恥心。

D43

唔知其他媽媽會唔會,埋完身之後個乳頭赤赤痛,有時仲會牙痛,然後成個人好似虛脫咁,隻嘢應該扯走晒我啲精氣神。

按鬆咗個胸嘅時候,腋下嘅硬塊就慢慢細咗,要鬆咗嗰條,積住響腋下嘅硬塊啲奶先可以走得出嚟,要日子有功。一按鬆左條主要通道,後邊先出到。

D48

大約泵到雙邊100-120ml。由30日左右開始上奶,一直大部分時間都係左30ml右70-90ml。

已經係次次埋身,都俾佢食細嗰邊先。仲要已經食到飽晒,唔肯食多奶嗰邊。

泵親左邊都係30ml,成日喺度諗,呀左邊,你再噴多一滴出嚟,係咪就會爆炸。

D51

我有keep住3個鐘泵一次,呢排兩邊加埋得60-70。

D52

單日埋身4次。上個星期每次泵都有80-120,琴日開始每次泵得番50-80。

一滴奶三滴血。半夜呢,我個痛感係會更加強烈,就算泵奶嗰陣時都要校細力啲。

QQ未出牙,只係佢成日唔記得甩嘴嘅時候,同時要放開個口⋯⋯

發現用完haakaa果邊奶頭會硬得好勁,放番入乳墊都會銀到痛。如果唔懶果時,要用泵按摩一陣,個乳頭先會軟番。

D61

我去荃灣港安睇兒科,醫生話如果全人奶,要加四滴Vitamin D嘅supplement落d奶度。一半人奶一半奶粉就+2滴。

開始紮肚,產後 – 紮肚篇

D63

琴晚奶量大爆發,單次230,然後即刻塞奶發燒,哈哈哈,痛到傻左。

我通常都係首先鬆胸下邊,反而胸上邊近心口位置好容易有硬板,通常塞奶都係塞呢度。如果我一路餵,一路按個胸,佢會以為我同佢爭嘢食,會變得好炆憎。類似「唔好搞我個奶樽啦」咁上下感覺。

今次塞奶,我為咗要上邊鬆先,我扒響張床度用平板咁餵奶,網上爬文話,要將佢個下巴對住塞果度比佢吸呀嘛。小寶入房嚇到,問我做乜嘢用咁奇怪嘅姿勢餵奶。

D67

之前泵到百幾,琴日今日幾次都剩係得50/70。唔知搞邊科。就係啱先個禮拜keep住一日都埋三至四次身,但而家唔埋身嘅時候,用電泵就冇奶柱出。

小寶成日激我,開門時會同bb講「好啦,夠鐘去咬媽媽個奶奶啦」,不斷作死。

~D75,去到第兩個半月之後開始,個乳頭先至冇咁痛。我先至體會到,乜嘢叫正確嘅吸啜,乳頭係唔會痛嘅。但明明QQ響一出世已經識得咩叫正確嘅吸啜,純粹只不過係我個乳頭未ready。而家QQ埋身好開心,含住乳頭會食到笑,就值得架啦。

然後當你適應咗呢一種痛楚,而每次嘅奶量又可以過100,就要經歷下一輪。BB食奶條脷要打圈。QQ 開始大個,食奶唔專心,成日條脷打打下圈,會飛咗出嚟,然後就會吞吐我乳頭一下,痛到PK。嗰種感覺就好似error俾人夾衣夾,然後俾人一下扯走個衣夾。

D77

餵人奶先要食多d多元化嘅野,小朋友大個無咁易偏食,食多幾隻奶粉都好,好快大個架啦。

D79

我見QQ由第19日起,到而家兩個半月都仲係食緊120,但成日食到啜空氣,擔心佢唔夠飽姐。咁就試一試用奶粉開180比佢啜,睇吓食到幾多。點知琴日佢食淨40渣….但之後個餐就唔肯食,一放奶嘴入口就獲利回吐,嘔返晒上餐啲奶出嚟⋯⋯然後奶量一路混亂到今日晏晝。

今日冇嘔奶就當贏啦⋯⋯懷疑係琴日嗰180淨40呢,出左事。但今日埋身為真係食得15至20分鐘咋啵,仲有另一邊都唔肯食。

D85

我琴日遇到一個三唔識七嘅內地阿姑,一嚟第一句就問,你奶水夠唔夠。唔通佢想飲?

D87

11點放落床都要碌到1點先訓著。所以仍然都係果句,習慣就好。QQ係天生派對動物。

QQ未出世已經響個肚度踢到半夜一點,出咗世之後頭一個月每晚兩點到五點係最精神嘅時候。第二個月開始,就好規律地由一點瞓到八九點起身。

依家六餐奶已經係9-12-15-18-21-23。日頭唔係瞓好多覺,每次瞓覺都係蝨乸教,15分鐘內一定起身。

我唔擔心佢頸部嘅肌肉嘅,因為佢由滿月開始,抱住都已經會自己顎高頭。媽媽心好累。

D88

去左staycation, 梗係放低BB喺屋企唔帶佢,然後琴日同今日奶量大爆發120->250。當然餐餐都食好西,唔知係食慣咗清淡嘅嘢,定係酒店啲嘢真係唔乾淨, 半夜又屙又嘔。

凌晨嘅時候酒店送咗碗白粥(五更飯?!),我覺得碗白粥仲好食過其他西餐。小寶話,明閣係煮中菜架嘛,煮西餐梗係唔得啦。白粥果然係白粥,但明閣出品真係不同凡響,定係我太肚餓渣。

奶量仲要今日260, 205。唔通心情真係好影響,定係因為我食咗五更飯?

D90

流緊鼻水,好似傷風,但我照餵奶。戴住口罩啲菌唔好傳染佢,然後我母乳入邊會有抗體俾佢㗎嘛。

D100

好搞笑,QQ會扮曬野扶住個胸,之後就會食手。又試過一邊啜,一邊伸埋隻手指入去。「大人才做選擇,小朋友我咩都要」嘅概念。

D103

番工泵奶schedule
06:00 起身梳洗
06:20 泵奶加手揸
07:30 出門口
08:30 番到公司,洗杯斟水
食Materna、益生菌、華御結飯團
一大杯炒米水
11:00 泵奶
12:00 lunch
14:00 一大壺水
16:00 飲媽媽奶、食上奶曲奇
17:00 泵奶

返左工之後,雙泵150-180。一次180,全日泵3次加一次埋身,總奶量得5xx。

係咪我唔識用奶袋夾,我覺得好危險,我淨係用咗一次,佢係唔會甩,但因為我泵奶嘅時候要不停按摩,好驚啲奶會支返上袋口。

泵奶時要彎腰向前傾,如果唔係啲奶會沿着個喇叭流落去胃腩嗰度。響屋企嘅時候,我就會坐響床邊,然後將個頭擺響床褥度去借力。但響公司,雖然都有哺乳室,但係得一張沙發,冇得借力所以條腰好攰。

D113

埋身流速太快,QQ會吸兩下就放口,由得啲奶係咁流,然後想食又啜番,吸兩下大嘅,然後又放口,完全無諗過阿媽有幾咁肉赤啲奶。

D118

媽媽返工大塞奶,終於捱到放工,比QQ埋身。見「塞奶篇」。

D145

媽媽我甩少左頭髮。係咪啲荷爾蒙開始穩定啦。但係仲未嚟返M。

開始食上奶曲奇。QQ驅魔人食奶方法,又咬又啜又fing開個頭。QQ唔飲奶,係咁搞佢,腳板底,掂嘴角。

鹹豬骨頭BB。QQ個頭仲有少少頭泥,聞落去有啲似鹹豬骨味。

D150

單次280ml。

D163

厭奶?120ml都食得好辛苦,食咗70-80左右就會停低,要玩好耐,甚至乎要攞玩具氹佢,先至會繼續食埋剩低嘅媽媽奶。就算埋身都係一樣,無論左邊定右邊先,第一邊永遠都淨係食4至5分鐘,然後就唔肯再返嚟食,要食另一邊。

D164

因為wfh,個人放鬆咗,又飲多咗新鮮炒米水,單日750ml再加一次埋身。

D165

我都估到㗎啦。今日單次泵奶都180以上,只係臨瞓埋完身之後,我真係好眼瞓,冇再泵清佢姐。所以⋯⋯

D166

早上,塞左,左邊入面乳腺傷左,會痛。不過係可以忍受嘅痛。又塞到發燒。即刻煲通草。

D171

同小寶講起,我餵餵下奶成日抱住QQ瞓着。我諗應該係因為QQ飲晒啲奶,所以我對奶要即刻待機做奶,所以我man down。

D197

QQ瘋狂咬我,唔肯定係咪牙痕。我會停賽10秒,倒數比佢聽。但佢好似賽車咁,一倒數完就沖刺。

D203

琴晚明明QQ食左邊食左好多。點知今朝早上就已經有啲痛痛地,我仲以為係琴晚佢chur得太勁,乳腺傷左。今朝比佢埋身放題,都食左好多,諗住俾啲時間個胸休息,又唔使開工就瞓多陣先,訓左3個鐘。

瞓醒就玩完,有3大舊硬塊。即刻熱敷出力揸,都係痛,揸完好少少。沖埋熱水涼,沖果時軟番,沖完又變番石頭胸,爽皮。所以我哋知道液體係有兩種特性,固體同流質。早餐飲通草水,然後開始feel到眼皮熱熱地,開始塞奶燒(灑花)。

D225: 繼續厭奶。性格巨星,識推樽,仲識用手揸甩個樽個奶咀,顯示佢唔飲嘅決心。搞到要沖成2xx ml奶浴⋯⋯

D234: 解決左一隻QQ厭奶,我又塞奶。明明已經一日固定時間泵四次。又發燒,原來發燒洗手隻手會痛,好似坐月果個月咁。今次算係比較嚴重嘅塞奶,未塞到上條頸,但兩次必理痛都唔掂。最誇張係右邊塞到有沉澱物。仲要明顯唔同色。變左豆漿?!

塞奶篇

前嗰排好多奶嘅時候QQ厭奶,到而家QQ猛長期嘅時候我塞奶,個世界對我真係充滿惡意。

9m12

真係唔知衰咩,9個幾月仲塞奶,又有沉澱物⋯⋯

12m12

又塞奶,係咪痴膠花架


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲

產後打大佬

  1. 出院後嘅混亂人生 (D4-D100)
  2. 孕期 – 順產 or 開刀
  3. 產後媽媽身體變化
  4. 育兒 – Fun Fact

餵奶/加固篇

  1. 孕期 – 奶粉選擇
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇
  9. 非官方非正式之塞奶原因
  10. 育兒 – 追奶之路
  11. 育兒 – 加固之路

尿片篇

育兒 – 尿片篇

洗錢篇

  1. 產後購物清單
  2. 產後 – 紮肚篇
  3. 嬰兒攝影 – venture studio
  4. 產後 – 4-5個月購物清單
  5. 嬰兒攝影 – ABC studio

發表回覆

你的電郵地址並不會被公開。 必要欄位標記為 *