育兒 – 加固之路

早前睇到個新聞,有啲BB四個月開始就被媽媽加固,點知一路肚痛扭計,然後睇醫生發現肚仔裏面有好多未消化嘅食物,所以都唔敢太早加固。又有一種講法如果太早加固,大個後容易胃下垂。嚇死。

但係4個月尾嘅時候,QQ開始對我哋食嘅蘋果有興趣,所以我都有俾佢舔下蘋果,唔知咁岩得咁橋定係點解,舔下嗰晚會特別扭計⋯⋯所以跟消委會買咗嬰兒米糊,揀咗喜寶(好似係最安全嘅),聊勝於無。選擇Hipp嬰兒米糊嘅原因

加固記得要飲水 – 留意番加固之後記得比水佢飲,等佢容易啲去到便便,有啲媽媽會買埋益生菌係屋企傍身。如何選擇嬰兒水杯

加固術語
FF – Finger Food, 將原形食物切成手指粗幼,比BB抓住來嘗試進食
BLW – baby led weaning, 由BB主導嘅加固之路,先學咀嚼,然後再學吞咽

TW + FF – Traditional weaning, 由成人主導嘅匙羹餵食(spoon-fed),先食糊仔/泥(purees)學吞咽,慢慢成長先學咀嚼

人哋嘅加固:
#蘋果鬆餅#火龍果蒸糕#奶香番薯蒸糕#紅棗核桃蛋糕#香蕉藍莓糕#牛油果饅頭#番薯淮山饅頭#淮山藍莓蒸糕#南瓜饅頭

我嘅加固:
講真我唔覺得自己會好有心機日日為咗QQ入廚房整每一餐,但又唔想倚賴太多現成嘅即食BB食品。自我安慰一下,BB要食,就梗係食原形食物啦,太多加工都係唔好嘅XD 好在入咗啲加固/BLW/TW群組,綜合左懶人加固版。

懶人加固版
6個月後:
1.菜心芯,紅蘿蔔條,蘋果蓉,粟米仔,蕃茄仔
2.藍莓 – 食之前要浸蔬果清潔液,要切開一半以防哽喉嚨
一開始食乜嘢會屙乜嘢,一開始係未咁快消化到,唔好驚,生命會搵到出路,只要唔係BB有太大唔舒服,都要繼續俾佢適應,因為佢遲早都要學識食大人嘅食物。
8個月後:
1.食切開細細舊嘅粟米,界開粟米表面等佢容易食到入面嘅肉
2.法國Le Petit Giurmet鵪鶉髀,無激素。(hktvmall有賣,不過成日冇貨)成百幾蚊先得10隻。好似聽聞BB要將一噸食物揼落地,先至可以識得食。
3.飯波,入邊撈魚碎,三文魚或者比目魚。(Organic plus有賣) Salmon fillet / Halibut – Baby pack

最後我都好似係六個幾月,突然之間有一日屎窟痕買咗鵪鶉髀,就照比QQ試食,佢一渣上手就識得塞入口⋯⋯然後就唔係好鍾意食蔬菜⋯⋯我係咪做錯咗。

一開始試低敏食物,要避開高敏食物,桃、奇異果(有毛嘅生果)、蛋白、蕃茄。低敏食物,例如菜心、飯。試到咁上下,先至開始試高敏食物, 慢慢1/4隻、½隻蛋黃俾佢試。

但都有聽媽媽講過話有bb對菜心敏感……咩玩法。又有媽媽話唔好比BB咁快試南瓜,因為好甜,令到BB唔鍾意食其他嘢。最主要都係睇媽媽自己點睇,有啲主見,俾啲掙扎。

加固之路

D167(5個半月):  第一次食米糊

D175 (5個幾月):菜心,用咗綠色餐盤,QQ以為菜心同匙羹都係膠嚟嘅,所以唔肯食⋯⋯見「產後 – 4-5個月購物清單」。同埋小寶有潔癖,所以幫QQ又著膠衣又鋪餐台布,太大陣仗,嚇親QQ,反而仲唔肯試。

D176: 紅蘿蔔條, 唔要、唔試、唔鍾意。

D177:  QQ凌晨嘅時候嘔咗啲蘿蔔碎出嚟,仲嘔咗勁多奶勁多潺,阿媽件睡衣接晒,連底褲都有嘔吐物嘅酸氣,而QQ完全唔喊唔鬧,等我哋清潔完先再埋身再食過,食住瞓,超乖。所以諗住都係繼續餵返米糊一排先,點知朝頭早餵完第一次奶,就嘩啦一聲嘔到爺爺成身都係。睇黎都係行唔到blw,咁唯有向tw+ff進發。諗住用之前asia mile換嘅豆漿機搞碎以上嘅食物行tw。

D179: 加咗固之後七日,呢兩日不停同佢做I love you、搓肚仔、按摩江門,今日終於有poo poo。今日試咗食士多啤梨。

D183(6個幾月): 打紅蘿蔔糊, 點知變咗紅蘿蔔水。加固篇 – Bruno 豆漿機

D184: 繼續食士多啤梨。用咗咬咬樂,但連我都覺得好大浸膠咪,所以QQ唔鍾意。都係食返原形嘅士多啤梨。

D188: 用豆漿機blend蘋果蓉比QQ試,食到佢扁嘴。有多嘅就放落去食物格。用錯左blended soup嘅function,搞到蘋果蓉熟左。後來先知應該就咁用smoothie function就算。

D189: 再食冰左defro嘅蘋果蓉,到晚上QQ嘔返曬出黎。食物格入邊有公仔,好得意, 但係個食物格好難洗,我都係用洗奶樽蔬果液洗。

D190: 發現豆漿機有個function係smoothie⋯⋯可以唔洗用blended soup黎整蘋果蓉⋯⋯生完真係好蠢。

D191: blend左兩塊白菜仔同一個細蕃茄。可能酸得滯,夜晚都係嘔奶。向大人食飯嘅時候開high chair嘅餐台比QQ一齊食,培養一齊食飯嘅習慣。

D192: blend左一個薯仔同埋兩條菜心,米糊都無落。薯仔嘅texture,已經令到個糊仔黏立立。薯仔有澱粉質,甜甜地,QQ算係無咁皺眉頭。QQ so far食咩都好似好難食咁,皇帝㗕,每樣野都掂少少,就唔要。

D196: 比左幾粒入門零食波波米QQ試食,朋友話尼隻係最唔甜,淡淡地,size又岩岩好比bb初試爆米粒。佢食到好似賓尼兔咁,唔夠口水,痴住向上唇,好正。要即刻用匙羹畢水佢飲。比佢試用miniware裝住,碗緣好淺,所以好易伸手拎到,不過QQ好鐘意成碗倒曬落地下。

D197: 黑毛豬菜心碎粥仔。又比左條粟米仔(baby corn),QQ咬左嘅尖,直接吞左。

D198: 黑毛豬小棠菜粥仔,屠房有人確診嘛,黑毛豬平啲。

D199: 長條型蘋果,QQ識得執返塞入嘴,當然佢最鍾意都係揼落地下。

D201: 紅蘿蔔三文魚粥,第一次見到佢覺得唔難食嘅樣。blend完之後超滑溜,就好似忌廉粟米濃湯咁。第一次見佢食糊仔,食得咁津津有味。

仲俾咗條長型紅蘿蔔佢食,都係識得放入口,但未識咀嚼。

D202: 南瓜菠菜,甜甜地幾易入口,但係食兩啖就唔食。

D204: 響大人碗飯入邊搵三四粒飯,失落佢條脷度,佢識得咬咬吞。

D205: 第一次用Philips Avent 4合1蒸煮攪拌器,椰菜花紅蘿蔔。仲要夾硬要人哋部機嚟煲粥仔。

D206: 紅蘿蔔菜心。QQ好似食嚟食去都係呢幾樣野。

D207: 雞肉、菜心葉、生菜、紅蘿蔔粥。係咪因為太多菜呢?又或者係太杰?嘔到pk,阿媽成身都酸曬。

今日試左牛油果,同場加映,QQ塗鴉,藝術天份由細培養起。

今日將QQ一餐食唔曬嘅野入盒。

D208: 翠肉瓜紅蘿蔔。夜晚鯇魚肉,我好懶,大人食果碟蒸魚,我夾開魚皮,然後Liu中間嘅肉(當冇掂到豉油算數)。佢食咗幾啖魚肉,好想繼續食,點知再比一啖佢,太大啖,然後gag到嘔番曬出黎。

教識QQ開水喉洗手

D209: 南瓜飯,南瓜唔係太好,但食飯食得好開心,淨係比飯你食就得啦。QQ洗手到洗到一半,識自己閂水喉。未得呀,未洗完呀。

D211: 俾咗鵪鶉髀、菜飯、紅蘿蔔,一開始唔知乜嘢係髀髀,一手嗱起啲飯就塞入嘴,食到咁上下,一手拎住隻髀就失入嘴,又係難食樣,心諗,咩黎架。再塞,驚為天人。一路梅到上髀有忽肉唔見咗。成$10一隻,到佢食完餐飯之後唔好浪費,沖沖水阿媽食返,都係會過落啲奶度俾QQ㗎啦。

D212: 第二次比鵪鶉髀,今次佢好精,其他紅蘿蔔、椰菜花、粟米仔、豆角全部唔食,一嚟就查落隻髀度。今日對焦好好,一路梅。

中間食過蕃薯

D218: 整左香蕉煎餅,想試一試佢對蛋白嘅反應,無刻意走蛋白,仲落左胡蔴油。QQ拎上手,食得幾開心,亦無gag。點知食食下見到QQ嘴角開始紅!!!即刻比水佢飲,佢一用飲管就咳,gag到嘔番出黎。然後即刻帶佢洗手抹嘴,紅到出粒粒,即刻比金盞花膏佢查, 唔夠15分鐘就退咗。但係之後嗰一日,嘴角掂到嘢食或者奶都好容易紅,嚇死。

做咗啲research,知道提早試或者忍住唔試,係唔會影響佢大個對食物敏感嘅機會率。始終七個月太早試蛋白,會等到11個月再試,因為一歲嗰支針裏面有蛋白成分。

過咗幾日去睇醫生打半歲針,順便講埋敏感呢個情況,醫生話唔好比混合嘅嘢食佢, 你讀咗咁多嘢,點知佢對邊樣敏感姐,最好分開續啲試。只要唔係變孖潤腸或者呼吸困難,會消紅嘅就冇事。

D219:

QQ差唔多拆咗隻鵪鶉髀,雖然入肚嘅唔多,都係一種成就。

D222: 發現佢唔係好鍾意食菜,所以切碎啲菜撈落啲飯到。

D225: 開始比菇佢食。

D226: 今日直頭落埋紅蘿蔔同埋紫椰菜,mix落去。仲有完整一塊紫椰菜比佢梅,食到成個咀變咗紫黑色,好正。

D227: 今日勁呀,再試蛋黃,晏晝食原塊紫椰菜、紅蘿蔔、紫椰菜飯(係紫色㗎)、比目魚。夜晚食雞肉、迷你菇(抓住啱啱好,係咁損啲汁)、娃娃菜、橙、布冧。

D229: 覺得食橙好酸,眼耳口鼻攬埋一舊。

D230: 今日食蘆筍仔,QQ嫌蘆筍太幼,將條蘆筍對接塞入口⋯⋯

D231: 今日食鵪鶉髀終於識得唔好將條長骨放入口,會換手,將肉推入口。識得將舊橙推入個口度,食咗半片橙。

D236: 蛋黃蛋白ok;點知夜晚俾牛肉佢,耳背後又紅

D237: 豆腐,撈落飯

D238: 牛肉,魚湯。每次畢完一羹湯俾佢飲,QQ識揸住支匙羹放入咀。然後我會講,soup。佢會笑到癲咗。

7m26:

然後試吓整紅蘿蔔饅頭

7m28:

8m7: 試吓整BB淮山藍莓糕

CD:

二胎真係二胎,今次無人手,多數用tw

同埋大家包括長老,內心都異常強大,愈玩愈癲

排名大約跟次序嘅,6個月之後開波

  • 蘋果
  • 香蕉
  • 士多啤梨
  • 牛油果
  • 紅蘿蔔
  • 西蘭花
  • 番薯
  • 大樹菠蘿
  • 木瓜
  • 南瓜肉粥
  • Yogurt
  • 菠菜雞肉三色豆
  • 蛋黃
  • 豆腐
  • 車厘子
  • 大樹菠蘿
  • 沙糖桔

生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲

產後打大佬

  1. 出院後嘅混亂人生 (D4-D100)
  2. 孕期 – 順產 or 開刀
  3. 產後媽媽身體變化
  4. 育兒 – Fun Fact

餵奶/加固篇

  1. 孕期 – 奶粉選擇
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇
  9. 非官方非正式之塞奶原因
  10. 育兒 – 追奶之路
  11. 育兒 – 加固之路

尿片篇

育兒 – 尿片篇

洗錢篇

  1. 產後購物清單
  2. 產後 – 紮肚篇
  3. 嬰兒攝影 – venture studio
  4. 產後 – 4-5個月購物清單
  5. 嬰兒攝影 – ABC studio

發表回覆

你的電郵地址並不會被公開。 必要欄位標記為 *