過咗最難捱嘅三個月，進入穩定期嘅第四至五個月，餵奶、換片、照顧嬰兒，已經開始上手，跟住就要行加固嘅路啦。
防疫 / 媽媽要用舒適達 / 束腰褲 / 牙膠同大量口水肩 /嬰兒米糊 / 嬰兒餐盤 / 牙仔餅 / 飯碗 / 水杯 / 食物剪刀 / 食物格 / 沖涼盤
防疫
之前買咗嘅疫情防疫帽，QQ都唔係太鍾意用
去到咁上下就要睇吓有啲乜嘢兒童口罩啱用，點知多數口罩都要一歲以上先至用得
媽媽要用舒適達
已經盡量日日有食materna，踏入第五個月，棚牙開始痛，飲過室溫椰青水，再食一啖熱飯都會痛。即刻早晚用返舒適達。
束腰褲
開始發現之前買嘅束腰褲（Inujirushi(犬印本舗)）已經變鬆，原來束腰褲每三個月（或者佢開始變鬆嘅時候）都要換新嘅，今次試吓叫小寶買條細一個碼（由LL變L），睇吓着唔着得落。
買到返嚟嘅時候一著，嘩，好似想紮番埋個盆骨咁，要好勉強先至拉到條拉鏈，但明顯見到條腰線翻返嚟，缺點係又要再適應過佢有幾咁緊。我諗L已經係盡㗎啦，始終個盆骨嘅size都向返到嚟。
牙膠
開始出牙仔就要買牙膠。我睇中左日本出嘅，話有51%係用國產米原料，咁BB咬起上嚟都放心啲。最緊要係我響公司附近嘅mother care 都唔見有呢一款，近排疫情肆虐又唔夠膽出街，而hktvmall係有一個牌子有得賣， 咁就買個嚟玩吓先。
大量口水肩
由於佢出牙仔，所以會有大量口水分泌。加上我哋成日懶得洗，所以濕咗一條就即刻換一條。
加固篇（見加固之路）：
6個月差唔多開始加固，所以要買加固用嘅用品。首先要決定你行tw定blw，blw首先要買多啲保護衫/袖/餐椅/地板，方便清洗。
tw就開始買加固餐盤，冰粒格，要黎雪住啲南瓜蓉啊乜嘢蓉。仲要準備一部blender。
嬰兒米糊
消委會就話，測試項目中只有三款嬰兒米糊不含任何重金屬同有害物質。加上律師朋友係咁推薦喜寶奶粉，所以我揀喜寶Hipp有機嬰兒純米糊。
但係媽媽谷就話，食Hipp嘅bb容易出濕疹，Bellamys 好啲(雖然消委會話佢有一隻成份超標，但係其實都係過咗標準少少)。
牙仔餅
知道有啲媽媽四個月之後就會比米餅BB食，但係好似得一個韓國牌子先至可以四個月大就可以食。但我唔博，六個月前唔食零食都唔會死嘅。都係等到六個月之後，先至買返正常嘅米餅當零食俾佢食，hktvmall求其買。
點知買完返嚟先發現買錯咗，呢隻係牙痕嘅時候食嘅，硬骨骨一條餅，並唔係我心目中當零食食用嘅米餅。後來比左幾粒入門零食波波米QQ試食，朋友話尼隻係最唔甜，淡淡地，size又岩岩好比bb初試爆米粒。佢食到好似賓尼兔咁，唔夠口水，痴住向上唇，好正。要即刻用匙羹畢水佢飲。
嬰兒餐盤
EZPZ – Mini Mat – 揀呢個純粹因為懶，成個餐盤一次過。第一次用呢個產品嘅時候係食菜心，QQ以為條菜心同隻匙羹都係膠嚟嘅⋯⋯所以唔肯食⋯⋯
(hktvmall傳送門) 忍唔住分享，個盒幾靚。
嬰兒飯碗
要搵位置放用過嘅牙膠或者放零食比BB食。又唔想買個太迷你嘅，之後用唔返。響以下兩個牌子入邊選擇咗，外型美觀嘅Miniware，不嬲都係外貌協會㗎啦。比佢試用miniware裝住波波米，碗緣好淺，所以好易伸手拎到，不過QQ好鐘意成碗倒曬落地下。有時夜晚QQ咬完舊米牙膠，又未想洗住，都會放入miniware合住先。
Miniware – 竹纖維。歐洲系列嘅設計。吸盤超強吸力，吸盤可以拆，碗壁低方便BB拎嘢食。碗邊係方形，方便BB刮食物。有啲媽媽話有吸盤嘅器皿，條邊好容易發霉。
Calibowl – 「Calibowl的創新內唇將食物引導回碗中並推進餐具裡，從而消除了溢出的顧慮並實現了輕鬆控制。」材質容易刮花，發霉容易滋生細菌。
但係！去左差唔多1歲，發現QQ用Miniware好難畢食物，狠心買咗二百幾蚊嘅Calibowl。點知佢用普通嬰兒匙羹同叉（都唔駛有個圈果種學習匙羹），都已經可以食得好好！早知一早課金啦！發霉嘅話，到時先再買過啦…
嬰兒水杯
Tommi Tippee
加固之後就要飲水，所以要買水杯。首先買咗隻Tommi Tippee鴨嘴水杯，點知個蓋拎埋係會漏水嘅，仲要我拎番mothercare去換貨，廢。
上網爬文之後先發現，第一階段可以用鴨嘴水杯，可以比BB模仿乳頭咁樣吸啜。第二階段可以用飲管水杯，如果懶嘅可以直接跳去用飲管水杯。
有見到有啲外國產品，係好似我哋大人嘅水杯咁，佢有個蓋係密封左開口位，然後話BB要咬個杯緣嘅時候，就會有水流出。我個人唔鍾意呢一種懶係先進嘅產品，因為我覺得BB會倚賴左佢嘅擋水功能。雖然sooner or later都總會學識用杯飲水，但係做乜嘢要咁保護小朋友呢。要教識佢有地心吸力呢一樣野，就要由細做起。
Combi
通常媽媽谷入邊都係推薦用Combi或b box。Combi 有齊成個系列按照月齡唔同需要，去更換飲水方法。小寶一聽到Combi就即刻開日本Amazon望，點知全線缺貨，要用炒價買……不如就咁買一個Combi飲管水杯，佢頭幾次飲用嘅時候一定會濁親，但我哋要相信BB嘅成長學習能力。係咁濁親，然後六個月就轉左用b box。本身b box飲得好地地，突然又變返濁親，然後七個月又轉返用combi，又飲得幾好喎⋯⋯係咪玩嘢。
比起b box，combi都好似有一個防漏水設計，都唔知我哋係洗壞咗舊膠，定係點， 個水壺仔一到轉，就會響個氣孔到漏水。仲要我哋好蠢，一開始用combi，QQ 成日俾個蓋打落塊面度，用咗一輪先知道，原來個蓋要向後打開180度，先會卡住，唔會打落BB塊面度⋯⋯
B Box
而其他人推崇嘅B box 飲水杯（澳洲牌子），我去hktvmall望過，又有迪士尼系列、又有第一代第二代仲有第三代，淨係知第二代比第一代更加容易拆條飲管出嚟洗。後來再睇只係有部份b box嘅飲水杯係PPSU。但係，PPSU好似淨係target比香港人買咁，澳洲本身都唔興⋯⋯但我哋知道嘅就係PPSU嘅耐熱能力（180度）比PP（110度）好，所以我寧願揀PPSU都唔要迪士尼系列。
係呀我都買多咗個，雖然QQ仲未識得用飲筒飲水，水杯嘅嘢可能要帶出街㗎嘛，買多個唔緊要嘅。用過b box之後先驚為天人，就算佢係用飲筒嘅，QQ 好容易就啜到水上嚟，因為仔管上粗下幼，下面條管係軟嘅，可以隨着地心吸力fing黎fing去。雖然QQ都唔係太鍾意飲水，但係起碼有一個佢可以用到嘅水杯先。
但去到六個零月，突然每次飲飲吓都濁親。因為b box嘅設計係要輕輕咬住條管，再啜，先至會出水，可能有啲BB混淆咗。加上佢有防倒瀉水嘅設計，有啲BB會因為呢個功能而啜唔到水上嚟⋯⋯
食物剪刀
其實本身係可以遲多幾個月先買，但上回提要買咗個Tommi Tippee鴨嘴水杯漏水，要去Mothercare換貨，淨係可以買貴嘢然後補錢。所以換咗隻陶瓷嘅食物剪（原價成百幾蚊），聲稱係普通鉸剪冇咁容易生鏽。小寶一見到就話，邊有咁容易生鏽啊⋯⋯女人真係敗家，sorry囉。
食物格
本身都唔想買，諗住每餐整新鮮嘅野比佢食，但BB要食嘅份量真係好少，真係好難預。買咗呢一個有蓋嘅，可以放入雪櫃，最多整三餐紅蘿蔔、三餐菠菜，每餐就拎兩樣餸出嚟撈俾佢食，希望做到啦。
沖涼盤
Shnuggle月亮盆（英國品牌），又慳水又唔使用力。「它適合新生兒至12個月大的寶寶使用。獨特的臀部凸塊設計可穩固支撐寶寶，安全可靠」但係去到六個月嘅時候，QQ 就開始鍾意坐想去盆底凸起嘅位置，直接趷高個pat pat響度玩拱橋⋯⋯費時驚凍親佢，所以就買咗Max版。
生仔都要生三日
產後打大佬
餵奶篇
- 孕期 – 奶粉選擇
- 育兒 – 人奶 vs 奶粉
- 育兒 – 哺乳埋身篇
- 育兒 – 哺乳泵奶篇
- 育兒 – 電動奶泵嘅選擇
- 育兒 – 奶袋篇
- 育兒 – 塞奶篇(D118)
- 育兒 – 返工泵奶篇
- 非官方非正式之塞奶原因
- 育兒 – 追奶之路
尿片篇
洗錢篇