育兒 – 塞奶篇(D118 D237)+解決塞奶方法

繼「育兒 – 哺乳埋身篇」,塞奶與我的距離。

D118

早兩三次泵奶,已經feel到右邊奶量越來越少,就知道佢就嚟塞。見[非官方非正式之塞奶原因]。

前一晚BB食完左邊就唔係好食右邊,泵清嘅時候已經見到唔係好多奶出。到朝頭早6點泵奶,見到好似甩甩地皮,已經知出事,泵左三個字,剩係得20ml,GG。

上晝番工,乳頭閃電痛,一邊做野一邊係咁按鬆啲硬塊,我叫其他同事唔好俾我隻手吸引咗。

但紅隧塞車,就算疏通左土瓜灣都冇用。求其買萬寧牌卵磷脂,食咗兩粒急救。

響公司泵奶,一路按摩,痛到有種靈魂出竅嘅感覺,同陣痛嗰陣時差唔多。我誇張到用紙杯裝熱水,溝啲凍啦,然後烏身浸個乳頭落去,再揸,向水入面有煙(奶)出就當贏。左邊救得返,突然噴咗奶柱出嚟,疏通左就源源不絕咁出。右邊泵到70出嚟,但係平時120。

終於捱到收工,個右奶塞到去荔枝角,直情胳肋底都有硬塊,明顯右邊係大左一個Cup。

捱到番屋企、又捱完晚餐,仲要捱到QQ開始肚餓。一放個奶入QQ個口,佢一出力啜,嘩,我痛到把聲都變咗靚坤。QQ都嚇到停左望住媽媽。

食咗區區8分鐘,然後QQ突然放口,平時佢食開130,原來已經食飽。我仲奇怪點解會有條白色嘅線癡響佢塊面度,伸手去撥走佢。原來係一條奶柱噴緊落佢塊面度,源源不絕係咁噴出嚟,嚇到我即刻用手接,小寶響側邊笑到癲咗。噴咗一陣先醒起我要撳住個水龍頭,叫小寶拎個haakaa黎接着。我輕輕一掂個胸就一直噴奶柱,好恐怖,好似水龍頭咁,仲可以向haakaa到寫書法,仲唔駛用到haakaa嘅負壓功能,純粹俾個胸塞車嘅壓力一路推奶出黎。

果然紅隧一通車之後就暢通無阻,噴出嚟嘅奶柱響haakaa杯邊發出吱吱聲響。仲好似打咖啡奶泡咁,有好綿密嘅泡泡。果然一隻好嘅QQ係可以幫你解決十大塞奶問題。佢一啜開咗個門口,啲奶就迫不及待咁衝出嚟。

平時我呢邊一般泵120ml,依家單邊餵飽咗QQ之後,打咖啡奶泡都打咗120ml,即係其實我單邊容量有240?揸干揸淨之後嘅鬆軟程度,仲勁過人哋古早味海綿蛋糕。塞奶,完。

你以為就咁就完,我去到QQ差唔多七個月,都仲係不定時地塞奶。見「育兒 – 追奶之路」。明明我係窮媽,都係成日塞。所以係睇體質嘅,我只要果次泵奶/餵奶唔夠努力,就會玩完,懶啲都唔得。

D235-237(7m22):

係呀,我個女都成七個幾月,我仲塞緊奶呀。

唔知係咪因為食咗牛尾或者飲咗魚湯,開始塞奶。同一晚,QQ 半夜凌晨唔肯訓教,keep住dream feed。佢用唔正確嘅含乳方式,所以搞到乳頭扁咗,起角位置生左小白點⋯⋯明明已經一日固定時間泵四次。又塞奶燒,原來發燒洗手隻手會痛,好似坐月果個月咁。之前塞親都係塞後邊,今次真係塞門口表面。變咗石頭奶就緊架啦,第一日嘅時候發現啲奶直程有沉澱物。右邊個樽直程好似豆漿渣咁⋯⋯

前嗰排好多奶嘅時候QQ厭奶,到而家QQ猛長期嘅時候我塞奶,個世界對我真係充滿惡意。

然後!D237!因為已經keep住少奶、keep住腫痛三日,通草都飲左兩日,係咁灌水,不停沖熱水涼。又試過用奶樽蓋裝暖水、浴鹽(岩鹽係唔得嘅,因為係殺菌only,浴鹽先可以軟化角質層,最好用天然冇咁多添加味道嘅浴鹽,費事BB食到,但緊急起上嚟我都係得牛奶味浴鹽⋯⋯ 最多洗乾淨啲),軟化角質層,再用食用植物油e.g.橄欖油(我得米糠油)浸15mins再輕輕擦(Ma der,輕輕力都痛到標眼水)。

Sunny老師教學連結

由於以上嘅方法都失敗,終於決定自行做手術。用鉗挑穿小白點層皮放奶。咩叫為母則強?對我嚟講,就係夠姜對住自己個RT動刀。自己同自己做手術,首先係將一切用具、雙手清潔乾淨,然後首先我用電動泵左半個鐘(正常人唔使咁耐),泵到小白點層皮都白白、薄薄地,觀察小白點漏奶嘅窿。然後手起鉗落,挑。手術成功,只係病人唔記得響手術之前食定止痛藥⋯⋯

一挑開層皮,已經有好粗嘅奶柱噴出黎。本身呢個窿係隻奶嘅主要輸出,塞左之後,啲奶走左去最右邊一個好細好細嘅窿度打橫噴出黎⋯⋯搞到呢幾日手揸時,喇叭都接唔住,噴曬去胳肋底、電腦、電話、床單⋯⋯

不過比起塞奶嘅痛,落鉗嘅痛可以忽略不計。另外溫馨提示,千祈唔好響塞得最勁嗰日去做呢個手術,因為塞奶實在太痛,好有可能落刀落得太大力,搞到傷口太大。

一個咁怕痛嘅人,都可以自己做呢樣嘢,媽咪真係堅強。我認真起上嚟自己都嚇親自己。

9m12

真係唔知衰咩,9個幾月仲塞奶,又有沉澱物⋯⋯

12m12

又塞奶,係咪痴膠花架

其他聲稱可以解決塞奶嘅方法:

  1. 食卵磷脂 – 我試過,新造嘅奶係希左,但門口塞嘅位就繼續塞。
  2. 飲通草水 – 我試過,新造嘅奶都係希左,但都要紅隧通返車先。
  3. 熱敷 – 響泵奶之前熱敷,之後泵奶會容易啲出。但如果塞得緊要,熱敷只會令到裏面越來越多奶⋯⋯我自己嘅做法係沖個熱水涼,我個人心情又好啲,又會幻想啲奶會喺沖涼嘅時候自己流咗出嚟。最新試過用花灑,對住個胸嘅硬塊係咁噴,又真係軟返, 果下係舒服嘅,不過沖完涼已經硬返,完。
  4. 凍敷 – 如果個胸做嘅奶太多,要冷靜下佢,唔好等佢生咁多奶,但記得唔好同敷太耐。窮媽媽,會退奶。
  5. 手推 – 呢個真係做咗媽媽先會明,就係你推呢,個胸會痛,你唔推呢,你知道個胸會變得更加痛。按落去,好痛,但你發現佢未散,要再大力啲按落去,然後好_痛,你發現好似通通地,同時又好驚自己按到條乳腺爆咗⋯⋯但你又冇得揀,要繼續按⋯⋯
  6. 下巴 – 都市傳聞話埋身嘅時候,將BB下巴對準硬塊,BB就可以好容易啜散塊硬塊。 我多數係兩邊胸中間偏上面嘅位置,容易有硬塊⋯⋯咁要點樣將BB個下巴對準硬塊呢。原來人生做嘅所有嘢都有意義,唔係點解我練咗三年平板支撐⋯⋯
  7. 用電動牙刷/洗面機震鬆再埋身 – 呢個我冇試過,我諗係按到隻手太攰嘅時候,就可以用掛。
  8. 原來可以剪爆一粒卵磷脂,用化妝綿放乳頭上濕敷,然後再搞佢


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲

產後打大佬

  1. 出院後嘅混亂人生 (D4-D100)
  2. 孕期 – 順產 or 開刀
  3. 產後媽媽身體變化
  4. 育兒 – Fun Fact
  5. 育兒 – 加固之路

餵奶篇

  1. 孕期 – 奶粉選擇
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇
  9. 非官方非正式之塞奶原因
  10. 育兒 – 追奶之路

尿片篇

育兒 – 尿片篇

洗錢篇

  1. 產後購物清單
  2. 產後 – 紮肚篇
  3. 嬰兒攝影 – venture studio
  4. 產後 – 4-5個月購物清單
  5. 嬰兒攝影 – ABC studio

 

發表回覆

你的電郵地址並不會被公開。 必要欄位標記為 *