育兒 – 哺乳泵奶篇

餵唔餵人奶都只不過係媽媽嘅選擇,本住「關你屁事」嘅原則,對奶喺自己嘅,其他人係唔可以咁多聲氣。而想餵人奶,前提梗係要有奶啦,無嘅話我哋都無得選擇亦無得強求,都係要喂奶粉架啦,唔通餓死佢咩「孕期 – 奶粉選擇」。

想當然,健康院、醫院、政府都一定會推你餵母乳,亦都會有好多唔同嘅方法,肉體上、精神上去協助你上奶。詳情可以睇迫死媽媽系列 – 人奶vs奶粉

去到選擇咗餵人奶,又會分為兩大類,一係親餵埋身,二係全泵媽,或者係一半半。 再佛系少少,有幾多餵幾多,唔強求,冇咪補奶粉囉。只要有陽光空氣同水份,隻嘢就會長大。

每一個媽媽總會有唔同原因,未必埋到身,可能係乳頭形狀size、可能係BB唔識吸啜、可能係BB唔鍾意快慢流速。就算係埋到身嘅媽媽又可能選擇泵奶,始終時間好就好多,埋身實在太困身。呢個時候,奶泵就好緊要。

埋身有好處,就係睇唔到BB食咗幾多,只要去到個胸鬆軟,或者BB放口,就可以收工。用奶泵就會有刻道,會比ml數綁架,對自己泵到幾多出嚟,好上心又或者好傷心。

基本上頭兩個月,左邊胸一直好似未發育好咁,無論食咩,都係得30。右邊谷到塞奶啦,左邊係30。左邊都谷到塞埋,仍然係30。有成兩個星期,埋身全比佢食左邊,泵出黎都仍然係30。係咪set咗奶量限定嘅limit…去到第80幾日,先叫做有啲聲氣。去到90日鬆啲,左邊終於先過50,平時主要輸出都靠曬右邊。

人地會話可能個泵唔啱你呀,又話可能力度唔夠大呀。一係你就去奶泵城試清楚,一係你就要信自己,純粹係時間未到,對奶未ready。終有一日,奶係會黎嘅。唔好學我咁,加大力度,然後一邊甩皮一邊出血,搞到要休養,仲浪費咗製造黃金初乳嘅時間。

如果懶得洗泵,埋身後又唔想泵清,可以試下haakaa接奶。接奶唔需要有奶滴,接奶原理係利用負壓吸奶出黎。甚至乎,個胸太谷又懶得泵,都可以接住部分奶出黎,唔好比佢塞奶。

大概一個月左右開始拉長泵奶嘅時間,主要為咗唔使帶咁多嘢出街,又可以出到遠少少嘅街。我三個幾月就開始後悔點解我提早去做呢一個訓練。因為當拉長啲時間個胸都會谷到好似警鐘咁,但長期落去,個胸單次嘅奶量多咗,我懷疑啲乳腺比啲奶谷到擴張左,所以可以容納更多嘅奶。

個訓練要拉長泵奶嘅時間,但係全日嘅奶量要唔跌。如果跌,又要泵密啲去追番奶。然後再拉長泵奶嘅時間,如此類推。真係痴鬼線。

大概返工前一個星期開始,訓練個胸習慣咩時間泵奶。

低能錯誤

點解條奶柱有氣無力咁嘅,然後發現係奶泵條管比我接住左⋯⋯

點解有一邊胸好似塞塞地,好似泵唔出奶咁,但係一路按摩又唔覺得痛,後來發現原來係個鴨咀裝得唔夠緊⋯⋯

選擇電動奶泵

見「電動奶泵嘅選擇」。

選擇奶袋

見「奶袋篇」。

選擇冰袋

我聽其他媽媽講Fridge to go好用,可以成舊放入雪櫃去雪。 但我自己就唔係太想將個奶袋成個放入雪櫃, 我自己係用youha 冰袋,然後再自製尿片冰種(自己去Google search)。

返工前做過實驗,將一袋清水放入奶袋,放入有五包尿片冰種嘅youha冰袋入邊,過咗18個鐘頭,袋清水都只不過係七度。可以接受啦。

 


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲
  4. 出院後嘅混亂人生 (D4-D100)
  5. 孕期 – 順產 or 開刀
  6. 產後媽媽身體變化
  7. 育兒 – Fun Fact

餵奶篇

  1. 孕期 – 奶粉
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇

洗錢篇

  1. 產後購物清單
  2. 產後 – 紮肚篇

發表回覆

你的電郵地址並不會被公開。 必要欄位標記為 *