育兒 – 哺乳埋身篇

餵唔餵人奶都只不過係媽媽嘅選擇,本住「關你屁事」嘅原則,對奶喺自己嘅,其他人係唔可以咁多聲氣。而想餵人奶,前提梗係要有奶啦,無嘅話我哋都無得選擇亦無得強求,都係要喂奶粉架啦,唔通餓死佢咩「孕期 – 奶粉選擇」。

想當然,健康院、醫院、政府都一定會推你餵母乳,亦都會有好多唔同嘅方法,肉體上、精神上去協助你上奶。詳情可以睇迫死媽媽系列 – 人奶vs奶粉

去到選擇咗餵人奶,又會分為兩大類,一係親餵埋身,二係全泵媽,或者係一半半。 再佛系少少,有幾多餵幾多,唔強求,冇咪補奶粉囉。只要有陽光空氣同水份,隻嘢就會長大。

今日要講嘅係埋身親餵嘅選擇。

母乳之路本身就係一條不歸路。仲記得一個前同事啱啱放完產假返返工,我哋問佢適應咗媽媽嘅生活未,佢一個情緒上嚟,一野踢落去茶水間嘅大垃圾桶,然後話:「究竟邊個發明餵母乳呢個遊戲」 可想而知餵母乳對一個新手媽媽來講,係幾咁惡夢,壓力幾大。但雖然係一個惡夢,但係仍然有數以萬計嘅新手媽媽,一句為咗BB,就一齊行上呢條不歸路。

哺乳嘅痛

哺乳嘅痛喺,有幾咁天使嘅bb面孔都彌補唔到。特別一開始乳頭未ready好,佢每一下咬落黎,就幫助你嘅乳頭二次發育。明明條友仔都未出牙,我淨係覺得佢好似一隻暴龍咁。我係望住迷你乳頭,一路被扯出嚟。直到側邊見到粉紅色嘅邊緣,全部都係初生嘅小鮮肉。再經歷過七七四十九次磨難,只要小鮮肉變成左成熟嘅皮膚,中間仲唔可以停,要一路操個乳頭,個乳頭成熟咗先可以畢業。

你睇吓我嗰陣時痛到寫咗啲乜嘢:「每一次埋身,我當比佢咬開啲窿,然後出奶柱又會變粗咗。每一次嘅痛楚,都係為咗令我乳頭結焦、成長。擺明同生仔嗰陣時一樣,每一下陣痛都係為咗開宮頸。」一路催眠自己所有痛楚都係有意義嘅,先至會捱得過。

後來先知台灣好興一樣野叫人工皮, 就算個頭選咗貼咗人工皮上去一樣可以照親餵, 一早知嘅話,頭一個月就唔使咁痛苦。

haakaa相逢恨晚,如果早啲買,就可以早啲扯出嚟,然後再用電泵黎加固(?)。因為佢用負壓,我覺得幫到我啜個nipple出黎。埋身前吸一吸,等nipple出左黎再叫bb開工。

漏奶乳墊

本身唔係富媽媽,唔會訓醒漏奶,唔會滴奶,乳墊基本上係作為傷口上嘅阻隔棉咁用。一開始果兩個月,個乳頭仲響度二次發育生長緊,bb又響度努力學習吸啜,就算無損,基本上連沖涼被水淋到都會痛,沖涼花灑沖到都痛到hihi。見到粉紅色,擺到明就係新生長嘅肉黎嘅,點可以就咁放入個bra度。所以先用乳墊。

我買過Pigeon,最主要係唔想餵奶以外嘅時間,將受傷嘅乳頭掂落去個胸圍度。用咗成大包先發現有第二款「Pigeon – 防敏溢乳墊」,一用嘅時候就已經相逢恨晚,完全冇異物嘅感覺,直情搵返做女嗰陣時嘅感覺,令到我脆弱嘅乳頭有賓至如歸嘅感覺。早啲知有呢一隻,就唔使頭兩個月咁痛啦。

Nipple shield

有分幾種,真係好似人工皮純粹覆蓋個乳頭,幫助有啲乳頭扁或者凹陷嘅媽媽,等BB可以吸血吸啜到。有一款本身就有一個真空嘅概念,可以用真空吸起個乳頭先,然後再比BB食。

我用過第一款,唔好用,只會磨擦得更痛。然後bb慣左咬膠,然後當我乳頭係膠咁唔識痛,仲衰。喺醫院嘅時候,佢仲要發現唔係膠嘅質感就會無奶,所以就拒絕直接埋身。事後(講緊幾個月之後)我先知道,埋身嘅痛並不一定係啜得唔岩,可以係個乳頭根本就未ready好,生長出嚟嘅肉都未完全可以返工,正等於你唔可以要求一個啱啱識行嘅BB去跑馬拉松。

漲奶痛

漲奶痛,每幾個鐘一次,明明坐完月,但出去邊都要計時。訓訓下漲痛到,一晚醒幾次,無時無刻乳房會提醒你夠鐘餵奶。

塞奶

塞奶,又係一個黐孖筋嘅遊戲。個胸掂下都痛,但你唔掂呢佢只會更加痛。你要忍住痛去按摩佢。好彩我隻QQ會埋身,比着其他全泵媽(因為唔同原因埋唔到身嘅)只能夠靠按摩,我真係好佩服佢哋仲繼續堅持。見育兒 – 塞奶篇(D118)

睇完以上嘅痛楚唔方便,你都仲選擇去餵母乳,我會好尊重你。

但係,人生最重要嘅一個但係。兩個月左右,QQ埋身好開心,含住乳頭會食到笑,就值得架啦。

去到第兩個半月之後開始,個乳頭先至冇咁痛。我先至體會到,乜嘢叫正確嘅吸啜,乳頭係唔會痛嘅。但明明QQ響一出世已經識得咩叫正確嘅吸啜,純粹只不過係我個乳頭未ready。

然後當你適應咗呢一種痛楚,而每次嘅奶量又可以過100,就要經歷下一輪。BB食奶條脷要打圈。QQ 開始大個,食奶唔專心,成日條脷打打下圈,會飛咗出嚟,然後就會吞吐我乳頭一下,痛到PK。嗰種感覺就好似error俾人夾衣夾,然後俾人一下扯走個衣夾。

當你睇到呢度嘅時候,如果你明知自己唔係一個意志堅定嘅人,我勸你都係認真考慮吓,係咪真係要選擇親餵。XD

即刻睇育兒 – 追奶之路


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲
  4. 出院後嘅混亂人生 (D4-D100)
  5. 孕期 – 順產 or 開刀
  6. 產後媽媽身體變化
  7. 育兒 – Fun Fact

餵奶篇

  1. 孕期 – 奶粉
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇

洗錢篇

  1. 產後購物清單
  2. 產後 – 紮肚篇

發表回覆

你的電郵地址並不會被公開。 必要欄位標記為 *