三日產房之旅 – 見紅入院篇

繼「懷孕產檢時間表 – 後期懷孕檢查(28-40wk: 胎位不正)」,第38週開始放產假。

未能夠幸運地可以好似我朋友咁,響產假第一日就穿水生得,實行前0後14。我響屋企經歷咗足足兩個星期前2產假,一路睇奧運,開始訓唔到,可能要開始適應餵夜奶嘅生理時鐘。

仲要收到法庭傳票,比裝修佬告我小額錢債,要短時間內起份答辯書交上庭。樂觀啲諗唔使返工我就可以專心搵資料草擬份答辯書,再樂觀啲諗令到我呢兩個禮拜有啲世藝,有目標令到我個人都有返啲精神,甚至乎啲朋友話呢條友好似食咗興奮劑咁雀躍。

響38週嘅時候同阿女講話,等多陣,做緊正經野,響入邊玩住等。終於響39週頭嘅時候搞掂咗答辯書。然後就同阿女講,係時候出嚟見媽媽啦。依家諗返轉頭,佢真係乖到冇朋友。

到第39週,係呢最後一個星期痔瘡痛到PK,基本上去邊度(除左廁所)都要帶着水泡,仲要影響到前邊會陰位都有啲痕,一定係痔瘡太多菌。

39wk6 (DD-2, Fri)

08:00 本身今日要做最後一次產檢,所以晨早起身沖涼。沖涼嗰時見紅,因為好似冇穿水,所以順便洗頭。如果穿咗水就唔好再沖涼,因為細菌會沿着穿咗嘅窿入侵。

叫小寶打電話去港安,問仲使唔使產檢。姑娘叫,見紅就快啲準備入院。

TWAH 2275 6888 2275 6688
門診時間 非門診時間

即刻跟住to bring list,向雪櫃拎炒米茶,用膠袋入住對膠拖鞋(防滑),帶埋尿墊上車,因為驚響半路途中穿水。拎住第一個走佬袋出門口。見孕期 – 入院前準備 (走佬袋

即睇project august嘅「hospital」,shit,bb你要撐住⋯⋯星期五晚同星期六(安息日,媽媽銀包都會安息埋一份)都好貴。

Normal Vaginal Delivery Package Caesarean Section Package
辦公時間 Sun to Thu 0900-2200
Fri 0700-1800
+20%
非辦公時間 Sun to Thu 2200-0700
Fri 1800-Sat
+20% +50%

第二round嘅to bring list,就叫屋企人帶,冰袋、盆(用嚟洗奶泵,如果有需要,最後要左黎抹身用)、BB出院衫、我嘅出院衫。

入醫院

14:00入院,推入獨立負壓房,隊鼻哥窿check covid
同小寶分開,佢同走路袋一齊去辦入院手續
小寶順便半價($500)做過Covid test
我血壓107 76 61.8

6/F 餐廳 restaurant
12/F BB打針中心 well baby clinic/3人房
13/F 產房 maternity unit/bb房

入產房(12/F)

14:12 入分娩室7,即係產房
換左醫院衫,除左bra,唔除底褲(換有魔術貼嘅網褲,方便醫生護士內診)
等走佬袋黎,換網褲
人手宮探,子宮頸未得,但有紅
響未有陣痛嘅時候人手宮探,真係好殘忍

//我自己買嘅網褲(安美潔),係有魔術貼嘅,入邊仲要癡M巾,方便醫生響前面打開,咁就唔使R腰著褲,除非你對自己嘅core好有信心

但坦白講,除咗方便之外,有啲刮皮膚,不過可能係因為我住咗兩日幾,所以我同網褲接觸嘅時間好多

//

COVID result 未有嘅時候任何人都唔可以入產房。淨係可以pass個走路袋入嚟。
好想飲水,但係又擔心,飲完水要去廁所好麻煩。

姑娘以為我好快生得

駁左胎心機,落唔到床,膠紙搞到我好痕。
打側訓胎心機會跌,所以姑娘要我打平訓,我話bb唔鍾意打平,佢會郁得好勁。有個護士話張床頭升高左就唔叫打平訓。唯有咁樣同阿女講。

打豆、放便,好緊張。新嘅打豆方式係打落手臂度,我一路催眠自己等陣生仔仲痛啦,所以死忍咗打豆個下。我已經同定姑娘講我忍唔到屎,姑娘都係答,放便一定要忍。

放便好辛苦,唔夠1分鐘我就落床去廁所,我嘅括約肌真係有啲弱。返床嗰陣時已經覺得好暈。

查家宅過程

趁你仲清醒嘅時候,姑娘會問你好多問題,包括而家第幾週、睇開邊個醫生、順產定開刀、有冇B鏈、打唔打無痛、有冇得upgrade、奶粉食邊隻。

姑娘仲同你講注意事項。點解小寶仲未到,佢哋話快速檢測未出結果之前,老公唔可以入產房,淨係可以送個走佬袋入黎。既然老公唔響度,我就要響陣痛之餘,留意佢講緊啲乜嘢。

姑娘會講按金收咗㗎啦,仲要留意個收費,包括分娩套餐計劃收費及額外醫療服務收費。婦產科醫生、兒科醫生及麻醉科醫生,不包括套餐計劃裏面。我嗰時好似陣痛緊,好想同佢講,等我生完先同我計好無,我都瞓咗係你張床到啦,唔通我會嫌貴,而家落床搭的士走咩。

仲繼續講,探病時間改咗,探訪人數限四個人,膳食安排幾點到幾點,打邊個電話,依家唔會有幫你加熱食物盒嘅服務,如果你想帶嘢食嚟,就要自携保溫暖壺。產房老公可以陪訓,生產完去嘅病房就要單人房先至可以老公陪訓,「你揀咩房?」我要雙人房。 「OK, 幫你幫你問咗,upgrade去單人房」耶。「依家老公無得剪臍帶」下?下?下?「家庭照都唔會影,會比coupon你之後自己出去影。」下?「 放心,生完之後會幫你影一張相,意思係唔會幫你響病房影其他相」。

又問我,BB出咗世之後要唔要做新生嬰兒聽力測試。我問係咩嚟,佢答「check吓BB聽力囉」⋯⋯咁我都聽得明,可能佢心諗,咁你又問⋯⋯我問幾錢「$700」。 咁又唔算貴,但死啦我淨係想等老公決定,因為我唔諗住比錢XD但姑娘要即刻答,是旦啦「做啦」。

俾咗兩份文件我,一份係開刀一份順產,叫我得閒睇咗佢。大佬啊,我已經好死緊張,間唔屎又會陣痛,又唔知幾時生得,仲要花時間盡快睇咗佢,人生真係好忙。

然後姑娘同我講唔使擔心,已經call咗何醫生嚟㗎啦。

何醫生一黎到,一言不合又宮探,仲叫我成個人唔好吞上去。咁你隊入嚟,我梗係縮架啦。醫生話宮頸仲係好厚,叫我得閒落地行吓。跟住就拜拜我條尾。

產房房型

咁得閒,不如叫小寶幫我影下間房嘅相,都話我staycation緊㗎啦。

大門口右邊有儲物櫃,應該係要黎接生嘅物資。左邊都係儲物櫃,𥄫到有個Welcome Pack,入面有沖洗瓶、漱口杯、牙刷等等,等陣問吓姑娘點解唔比我先。

然後就有道簾,拉開之後右手邊就會見到初生嬰兒瞓(應該係檢查用嘅)嘅床仔。 因為大家都以為我就快生,一開始呢張床仔係有着燈嘅,隨着我宮頸一直未開,就熄咗燈,然後孤零零咁放響度。

然後就係我張變形金剛床(見生產當日記錄),可以望住一部大電視, 懶人伸手就可以將張枱仔移埋心口,左手邊可以見到有個洗手空間,每次助產士同何醫生入嚟攻擊我下面之前,就要喺度洗手。

我同BB床中間就駁住部胎心機。

床嘅右手邊

沖涼房廁所

仲有一張梳化床,係小寶嘅活動空間。我仲記得有人同小寶講,使唔使幫你開床,有埋turn down service,果下令到我有啲好唔平衡。

20:00駁胎心機睇陣痛密唔密,當時陣痛大約10分鐘一次,但宮探1度都未開,宮頸厚度好過岩岩。

第一晚晚餐

6/F有餐廳。叫老公去買晚餐,或者叫deliveroo,事前已經提左老公要買個容易進食嘅晚餐。結果老公買咗意粉…請問意粉點樣容易進食呀?

咁我不如睇吓個Menu醫院有咩食好過,港安剩係得素食,所以唔好諗住食肉。

23:00 雖然打咗豆豆,但係耐唔用嘅話,啲血會凝固咗,所以要用生理鹽水通豆豆。

本住有得瞓就好瞓,瞓得着就瞓。

40wk(踏入預產期當日)(D-1)

半夜凌晨時候陣痛又慢左,半個鐘九個字先一次,所以結論都係唔係太瞓得着。反正響最後一個星期已經習慣緊餵夜奶嘅瞓覺時間,都係醒下瞓吓咁樣。

Hapi Journey陣痛計時器

屎忽好痕,痔瘡啲菌好活躍。

05:00姑娘黎check bb心跳、我嘅血壓

06:00簡單梳洗下,叫老公去買早餐,小寶影一堆相叫我自己揀,食過早餐今日再努力過。

07:00姑娘又黎,check bb心跳、血壓,通豆豆(大概六至八個鐘通一次豆豆)

聽胎心時bb踢隻腳仔出黎,姑娘讚佢好cute。
話我肚皮薄,所以好易睇到佢既郁動。

09:00一訓教,陣痛間距又長番,咁我係咪唔應該瞓覺

10:10 何醫生內診,子宮頸變軟,琴日放到一隻手指,今日放到兩隻手指,醫生話,轉變緊,係慢囉,呢一刻痛楚只係一兩度,熱身緊,要開嘅話係要大痛。最快今晚。

我終於忍唔住同佢講前面會陰位置好痕,半夜後邊都好痕,痕到想死。何醫生話,痕既轉頭比藥膏你查。醫生話要駁胎心機一個鐘,睇吓陣痛嘅頻率。要散步,但唔准un波、唔准深蹲。

14:xx 已向產房留左24個鐘,姑娘話「斷估我落間前呢幾個鐘,你都未生得出」,承惠$2500。小寶話,當staycation。

午餐小寶叫Deliveroo,食Mos Burger,終於實現左生之前要食MOS Burger嘅願望,食完開心啲係咪會容易生啲。

而家咩恥骨痛都無埋,一宮縮就會嚇醒隻野,佢先會比下面,郁兩下俾我哋睇。

我打住豆,都沖左個涼,洗左個頭。

17:00 半個鐘一次陣痛

突然之間好想食,食咗芝麻湯圓。我有一刻擔心,如果今晚生嘅話,放便果時係咪會出咗一堆芝麻出嚟。

18:18 床頭笑氣部機自己着咗,原來隔離房開咗機。姑娘話一開機呢邊房就會有聲。

六點嘅時候痛咗六次,即係10分鐘一次。陣痛係由一開始痛嗰刻開始計,就算一次痛成分幾鐘,痛楚間距都係由上一次痛楚開始嗰刻計算。

問左護士可以幫手打俾何醫生,但何醫生唔會返嚟,除非我今晚生。

一路陣痛,好懷疑人生,不停上網search。原來子宮頸要變薄,之後先會開度數。宮縮太大力就會痛,假宮縮要有規律先叫陣痛。而全部唔規律既痛都叫假宮縮。屯門醫院既政策就見紅3日都無反應就會催生。

22:00 內診,宮頸仲未得,真係要規律陣痛得。響隔離房部笑氣機嘅噪音底下,嘗試瞓覺。半夜係咁隊椰青水,盡最後嘅努力。

然後就到三日產房之旅 – 生仔都要趕deadline

 

 


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲

產後打大佬

  1. 出院後嘅混亂人生 (D4-D100)
  2. 孕期 – 順產 or 開刀
  3. 產後媽媽身體變化
  4. 育兒 – Fun Fact
  5. 育兒 – 加固之路

餵奶篇

  1. 孕期 – 奶粉選擇
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇
  9. 非官方非正式之塞奶原因
  10. 育兒 – 追奶之路

尿片篇

育兒 – 尿片篇

洗錢篇

  1. 產後購物清單
  2. 產後 – 紮肚篇
  3. 嬰兒攝影 – venture studio
  4. 產後 – 4-5個月購物清單
  5. 嬰兒攝影 – ABC studio

發表回覆

你的電郵地址並不會被公開。 必要欄位標記為 *