三日產房之旅 – 生仔都要趕deadline

再睇番生個日發生嘅事真係好正,點解我事後都可以記得咁多野,非常佩服自己。黎個summary先:48個鐘等宮頸自己軟,11點幾吊催生藥開度數,3點打咗止痛針,有聞笑氣, 為左趕止痛針藥效嘅死線,傍晚就生咗,順產,有剪,生完打咗子宮收縮針。

睇完三日產房之旅 – 見紅入院篇

灰暗早上

時間返番生產果日,今晚係日本奧運閉幕。小寶話bb想睇奧運閉幕,所以拖到今日先出黎。

凌晨4:00痛醒左,開始10分鐘一次陣痛,仲未生得,發現隔離房笑氣機好似停咗。

05:00起身刷牙,散步。響房入邊來回踱步,一路問BB幾時想出黎。 行到咁上下我會突然停低, 然後就會禁個陣痛計時器。痔瘡痕到,攬住個肚向產房係咁un

到07:00陣痛又消失左。

小寶買左個芝士包,無胃口,夾硬食,8點幾訓番。點估得到個芝士包就成為我全日唯一食過嘅嘢。但原來個人腎上腺指數高嘅時候,係一啲都唔會肚餓。

聽到隔離房生左,個產婦喊得好悽涼,嚎哭果種。姑娘話,都生左啦,仲喊咩啫,唔好喊。

9點比護士站尖叫聲嘈醒左,應該係有人拎金牌?

望住電視播緊嘅奧運室內單車項目,啫係李慧詩果類,響個圈一路轉圈一路轉圈,我都覺得自己響個老鼠圈入面一直轉一直轉。一直痛,一直生唔出。醫院應該嚴禁待產婦睇影響情緒嘅奧運項目。

9點幾問姑娘,醫生幾時到。回覆係話冇咁快。開始精神崩潰,攬住小寶喊咗出嚟。

上床休息咗一陣諗住落床再散步再深蹲,點知一落床就話醫生嚟巡房,即刻瞓番上床。

何醫生用咗零點幾秒嘅時間就帶咗手套,一言不合又內診。我仍然都係會縮,順勢有呢一個機會仲喊埋出嚟,扮晒係因為內診唔舒服而喊。

何醫生睇穿咗我,難得安慰我,話痛左兩日並唔係無意義架,宮頸軟得好好呀。聽完更加爆喊。宮頸已經成熟、成功軟化,所以可以吊催生藥。原來如果宮頸未軟化,就要塞催生藥入去。而軟化左就可以由豆豆嗰度吊催生藥。

何醫生一聲令下,準備今日生。我好可憐咁問,係咪最遲最遲今晚都會生到?佢答係。聽到今晚應該可以生到,個人一放鬆就肚餓。好想食嘢,即刻叫小寶去買野食。我仲以為醫院準備藥都要一段長時間。

見到曙光

11:20 宮頸ready,吊催生藥。姑娘話吊左藥就唔可以食嘢。叫小寶食左晏先。

11:47開始出手汗,唔知係咪因為藥效。

12:02 姑娘檢查又內診

14:20 開2度

痛楚指數,即係宮縮嘅最大值。到50,開始痛到有靈魂出竅嘅感覺。我望住產房上面一盞冇開嘅燈,好專心好專心咁望實,然後慢慢呼吸。好似一移開視線,就會比痛楚吞噬。

姑娘入嚟檢查,叫我移動嘅時候,我陣痛緊,咬牙切齒咁叫佢等一陣,等我忍過呢一波痛楚。姑娘會同你講閒計,我諗佢應該係想轉移我嘅注意力,但真相已經比我知道左,所以已經唔work。

姑娘問咁怕痛,點解唔打針?佢解釋咗笑氣、止痛針、同埋無痛。我事前已經做晒準備功課,但都要聽佢講一講,個心會定啲。

我話驚太早用晒所有止痛嘅方法,去到後期就冇用。我仲問佢痛楚指數最高會升到幾多,佢話因人而異,唔肯正面回覆我。然後姑娘話去到生嘅時候,臨門一腳都會停晒所有止痛嘅方法,所以唔明白我依家喺度忍啲乜嘢。

//偽科普

笑氣就好似吸毒、興奮劑咁樣,有人話有用,有人話冇用,純粹嘅作用係令到你個人放鬆啲,等宮頸容易啲開度數。對BB無害,令到大人好暈。

止痛針打完之後,頭兩個鐘如果BB出世需要打解藥,後兩個鐘出世會比較好。四個鐘頭後過咗之後可以再打過止痛針。

冇痛打尾龍骨,我唔揀佢嘅原因,最主要係因為,佢要收我兩萬幾蚊。完。

//偽科普完

我本身個人對所有止痛藥都好有反應,因為我唔識吞藥丸,成日咬碎止痛藥(仲可以分到唔同藥嘅味道),所以知道藥力向我身上係好快見效。M痛嘅時候就算痛到暈低,都係一粒必理痛就可以搞得掂。所以我估止痛針應該都有同樣嘅作用。

我當期時心諗,古時候咁多女人都係無止痛咁樣硬食十度,本着唔輸得嘅心態,冇理由我唔得呀。

然後呢,叫小寶幫我嗌姑娘。小寶嗰陣時好似話,要拎返個電話定係唔知乜嘢先至出去,我嬲到癲。果然係呢個時候,男人做啲乜嘢都係原罪。

姑娘喺度「我要打止痛針,唔該。」淚眼。
姑娘仲問,「有無痛喎,都打得架,真係唔要?」
「兩萬幾?」
「係」
「止痛針唔駛加錢?」
「package包止痛針」
「咁止痛針要打。無痛….唔打!」
「咁我幫你安排埋笑氣啦」
「好」

15:05 打止痛針,開始感覺到,我只係一舊肉,響砧板上面嘅肉。

15:30 再次用便盆痾尿,好在練左幾年 pilates bridging,夠力抬高條腰放便盆。

姑娘(原來就係助產士)好直,「做咗咁多年助產士冇聽過話生仔會唔痛,你加快生佢出嚟,咁就快啲痛完,你識計數㗎嘛,明唔明」

16:30 姑娘檢查,話要轉身,唔可以瞓死一邊,腰酸。姑娘叫小寶幫我按摩尾龍骨,話可以舒緩個痛楚。但我一陣痛嘅時候,我就推開小寶。我陣痛緊嘅時候,所有人都唔好掂我,等我同個痛楚共存亡,先至可以慢慢捱過呢一波。

一路同自己講,又或者話係催眠自己,每一下痛都係打開緊個宮頸。每一次痛都係有意義嘅。每開多少少,就距離終點越近,只要開到,順產到,就可以生得出,第二日嘅呢個時間就唔使再痛。

17:00 有強勁便意,姑娘檢查,開4度。可能係止痛針開始生效,越放鬆度數開得越快。但係如果唔打止痛針,咁痛,點放鬆呀。其中一個姑娘係我開4度嘅時候,讚我開得快,盆骨同個肚都靚,副計OK,應該可以順產成功,我覺得佢係比緊心理暗示我。

17:17 姑娘檢查,又要轉身,話唔可以瞓死一邊。大佬呀陣痛好密啦,唔好再郁我啦。睇返陣痛時計,2分鐘一次陣痛,每次維持分幾鐘,即係根本上冇停過。

17:35 開8度,仍然都係陣痛,但痛楚同痛楚中間我居然瞓着咗,應該係,因為我係會痛醒返,止痛針萬歲。

17:38 助產士人工穿水,我仲記得我係咪埋隻眼感受嗰種感覺。佢伸左隻手入去,又了,又夾,可能有用指甲咪,然後就流出溫熱嘅水。

私人時間嘅時候:

睇咗好多台灣孕婦嘅分享,好值得記低嘅係有一位文青女神,自從有咗,女孩女人嘅身份就已經煙消雲散,所剩低嘅只係一個嬰兒嘅載體。文青女神係佢老公面前從來唔卸妝,但到就生仔嗰一刻,護士拎住尿兜比佢,然後要佢喺老公面前屙屎,先可以入產房。所以生過小朋友嘅女性,往後要面對嘅人生就係屎尿血濃痰。生嘅時候只係床上面嘅一陀肉,任何一個人都可以過嚟篤吓個陰道,都真係要生嘅時候,會痛到見到冥河/真理之門。BB出世之後流過的眼淚,係證明咗自己仍然在生⋯⋯生育真係一個悲壯嘅決定。

17:54 助產士問我痾乾淨未。我答冇嘢痾,加上咁痛都痾唔出。助產士話我膀胱好漲。排尿準備生產,插尿喉,有少少感覺,但由於陣痛嘅痛已經蓋過咗呢個異樣嘅感覺。

最後大直路

當其時心諗,有開始就會有終結,生得出就唔會痛啦。準備作戰狀態。

姑娘話要停笑氣啦,好彩我打左止痛針,佢搶我唔走啲藥,哈哈,斷估佢唔會幫我向豆豆吊解藥掛。

坦白講真係唔記得左生果時有幾痛,可能痛楚去到一個臨界點之後,個人會斷片。又或者可能係人類傳承需要,所以唔會比女人記住生仔有幾痛,人類先可以繼續繁衍落去。

聽到好多人響產房入邊走來走去,事後小寶話張床好似變形金剛咁,下半部拆走晒,變成可以生仔嘅姿勢。我一直以為小寶可以喺搖滾區度睇表演,點知原來佢係坐咗喺看台下面,結論係除左個台,乜都睇唔到。

助產士同我講,嗱幫你諗好咗㗎啦,再過多幾分鐘就有個8字(18:08),到時就出力推佢出嚟,好意頭啊。我完全俾唔到反應佢,連反白眼嘅力都無。

試左幾次宮縮最勁嘅時候(即係最痛)出力,佢哋會數10聲,話要好似屙屎咁柯佢出嚟。又話我用錯力,我到生完都唔知點用力先岩。咁我屙屎嗰陣時鍾意烏個頭向前面呀嘛,但醫生助產士全部叫我用力嘅時候,個頭要i 向後邊,又話要個頭唔好㗁高,大佬啊但我唔curve back就用唔到力呀嘛。

然後好多人好多把口一路係咁鬧,我淨係覺得好嘈。後來好似係小寶夾硬攞個拳頭頂響我個下巴同心口中間,一路固定我個頭,去滿足大家嘅要求,等我唔好比人鬧。實際上我就係咁我個下巴同個心口夾住佢隻手黎出力。

然後又痛完呢輪陣痛,咁梗係即刻瞓番低啦,咪埋隻眼抖陣都唔得嘅。助產士響我耳仔側邊大叫「而家打仗呀,唔係瞓覺呀!」。

我知,我仲要趕止痛針嘅deadline好無。止痛針藥效得四個鐘,然後我望住deadline,不成功就pk。如果再打一次止痛針,即係仲要痛多四個鐘。(不過後來發現計漏咗聯針時間,超左時,因為聯針聯左九個字。助產士好好,知道我怕痛幫我開返笑氣。所以聯針嗰陣時喪聞太多笑氣,半夜都仲係好暈。)

又到最痛嘅時候,又要出力10秒。咁我耐力唔夠,淨係夠力撐4秒嘛,諗住吸一啖氣再推埋剩低幾秒,點知換氣又唔得嘅,又俾人鬧。我以為我生之前做咗幾年Pilates好醒,點知原來我唔記得練跑馬拉松。

換氣嘅時候發出咗微弱嘅叫聲,又比佢哋鬧,「唔好嘥晒啲氣!將全身嘅力都擺響下面推佢出嚟!」我明白佢哋唔係想鬧我嘅,只係大家都好緊張姐。 事後我覺得都幾感恩,因為我嘅性格就係俾人一鬧,就會盡力做到最好,佢哋一邊比instruction, 我就跟住盡力做,唔使用腦,幾好。

大家唔準我叫出聲,話叫出聲會蝕左度氣。搞到我之後個幾日,小寶話我落床個時,痛到臉色都變埋,個樣就好似啞咗咁,擘大個口好痛苦,但都無嗌出聲。我係唔敢嗌出聲囉好無,擺到明係創傷後遺症啦。

其實我覺得我出力嘅方法冇變過,但好似兩三次之後佢哋就話我用啱力,要我記住呢種感覺。真係鬼整,完全唔記得啱啱個下做咗啲乜,是但啦咁,我繼續求其用力。

醫生話見到佢頭髮,又話個陰道口唔夠佢出,中間過程一路係咁拉扯緊我下面,即係左邊拉下右邊扯下,務求令到佢開大啲。喂呀!唔係開咗10度㗎啦咩,定係又有人呃我。我之後嗰幾日發惡夢都夢到有人拉扯緊我陰部。

//響三十幾週嘅時候,有睇過幾幅相,話係BB個頭卡住咗響門口,然後產婦唔夠力生出嚟,搞到BB個頭變咗壺蘆型。雖然最後會慢慢變返原形,但係實在太似異形,所以我都好驚。//

估唔到產程中間就有人呃我,話BB個頭卡住左,好辛苦,心跳又跌緊,所以我就不顧一切啦,由得下便爆啦,出力痾隻野出黎。

//我突登控制住BB嘅重量向6磅(即3kg左右),等我容易順產。因為聽太多,未開夠十度,就忍唔住個急屎感,然後就爆左。又聽過BB成8磅,一生出黎,醫生剪左邊,但媽媽爆右邊⋯⋯聽到都痛。爆開嘅傷口都會縫針,但不規則就梗係考醫生手勢啦。都係控制下size好⋯⋯但總有媽媽係唔駛剪地咁flexible,我梗係知道我唔係呢類咁寶貴嘅天生生仔機器啦。//

BB一出世,我就問佢個頭有冇事,小寶後來話俾我聽個心跳指數都只不過係跌咗一陣,好快脆就變返正常,分分鐘只不過係胎心機接駁得唔係太好……頂。

出黎啦!

響bb個頭出咗嚟之後,小寶話現場有兩個助產士一路用如來神掌嘅方式,輪流拍打攻擊我個肚,好似心外壓咁,幫我推隻嘢出嚟。怪唔之得,過咗幾日之後,我發現肋骨位瘀咗。不過總好過我有個朋友話生完之後,個肚有個拳頭印,咁佢個助產士都幾大力下。

小寶話完全睇唔到醫生係點樣將bb扯出嚟,淨係知個頭出咗之後,佢哋叫我唔好用力,點知我聽錯左,咩話,以為話我唔夠力,我繼續再出力,然後又比助產士鬧。「咁我而家要做咩呀?」「你休息陣啦」我成條屍體咁樣攤響度。

突然何醫生將bb連臍帶,一野放向我心口,我淨係聞到好腥好臭好熱會郁既一隻生物,好自然伸手去扶。然後助產士鬧,你整污糟自己隻手啦!然後拎咗塊布係咁抹我隻手。點架。

助產士一號想叫老公剪臍帶,但助產士二號話「Covid 呀!唔剪得呀!」「係wo」。

Bb終於出左世。我無台灣媽媽咁感性,無見到冥河,亦無感謝上帝我仍然生存。淨係覺得好攰,好想訓教。

生完啦虛脫中

助產士帶走左bb清理,小寶就屁顛屁顛咁跟住bb走咗。合理嘅,我有心理準備㗎啦。是旦啦,我無力理。

然後何醫生聯針聯左九個字,聯針真係堅痛。助產士好好,知道我怕痛,「幫你開返笑氣啦」,我瘋狂點頭,連回應佢嘅力都冇。

之前唔敢吸係因為驚影響BB,而家我喪吸笑氣,點知就暈咗成晚船浪。我淨係feel到佢落針落咗好多個位,但係每個位可能都得一兩針。姑娘話佢一針到尾,到時所有線一齊溶。我問佢剪咗幾多下,醫生又話係正常嘅傷口,只係皮膚有三層,所以要縫耐啲。

生完打咗子宮收縮針。是旦啦,你話打咩咪打咩囉。

小寶問,你會唔會想睇下bb。我心諗,你話呢。我望住張QQ嘅第一張相,同第一條片,無想喊嘅感覺,淨係覺得,「嘩,隻嘢識郁㗎。」咁QQ都響我肚度郁唔少啦,無乜特別。我都喺訓先,拜。

何醫生話:生產過程好順利,夜晚9點後可吃東西,食完藥都可以餵BB。醫生問:仲有無野問?我:個頭型冇壓扁呀嘛?

事後回想起,應該由呢一刻開始,我就發現我嘅記性變得好差、語言組織能力都好差,記憶力跳黎跳去。到生完之後六個月,先慢慢回復。會唔會係止痛嘅後遺症?定其實係生仔嘅後遺症?

護士會提你慢慢飲水,子宮要按摩,要推到子宮變實,先會更好地收縮。陰道傷口每3個鐘用沖洗瓶洗,要換M巾。然後見我成身震晒,幫我冚被。救命我好熱呀,但冇力申訴。另一個姑娘話,佢冇得沖涼㗎喇,唔好冚被會出汗呀。頂,我嗰下先發現自己成身濕晒,打完仗果然係會濕晒。

好似聽到佢哋話我發緊燒。產後體溫38度。

護士話12點前要痾尿,先知有無感染到,我完全唔明佢哋講緊乜。生完個人暈下暈下,要叫小寶幫我記幾點要屙尿、幾點要食藥、要飲三杯水。係嘅,唔飲水我點屙尿呢,好有道理。總知姑娘比嘅instruction就當金科玉律咁做啦。可想而知,當時我個腦入邊係一片虛無。

姑娘會幫你著送嗰堆網褲加產婦M巾。建議生完頭一兩日唔好用安睡褲住,我買咗大碼都覺得好緊(見紅入院嗰日有著過)。

落床果時,姑娘問:你個嘴塞左d咩?答:救命提子。親戚買左抽日本提子黎,生完之後血糖低又唔可以補充太多水果時,就拍幾粒提子,有水份、有糖份,得咗。

離開產房轉病房(13/F)

20:30轉病房,見暈,全部人陪我坐一陣先,搞到20:45。去洗手間都要人扶,好暈。

兒科醫生話Bb 2.99kg,暫時未見到健康有咩大問題。

姑娘提我地如果有買到薑水,可以order定一壺。只要買一次(好似$600)嘅薑水就無限次任用,但要喺廚房收工前叫佢拎過嚟。最後費用會落落去膳食張單度。

今晚仲係好暈,聽朝08:30先至埋身餵人奶。叫左小寶幫我抹身,過程中我已經瞓咗。

然後就到三日兩夜病房餵奶遊戲


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲
  4. 出院後嘅混亂人生 (D4-D100)
  5. 孕期 – 順產 or 開刀
  6. 產後媽媽身體變化
  7. 育兒 – Fun Fact

餵奶篇

  1. 孕期 – 奶粉
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇

洗錢篇

  1. 產後購物清單
  2. 產後 – 紮肚篇

 

發表回覆

你的電郵地址並不會被公開。 必要欄位標記為 *