產後購物清單(1-3個月)

坐月期間完全出唔到街,就算你比我出我都唔想出。所以可以送貨嘅係好緊要嘅,然後就去HKTVmall買。

生完BB一闊三大,又或者響carousell買二手嘅野。

即棄潔面巾

本身都唔會用開啲咁樣嘅嘢,覺得好唔環保。後來再諗一諗,生仔呢件事,本身就係唔環保。

買咗一卷都係諗住響醫院嘅時候,方便試用。坐月嘅時候都係要用薑水沖涼,更加唔想整污糟屋企毛巾,一路keep住用, 一張都可以用到三四日。有潔癖嘅人,就用一兩次就抌。到五個月先用晒呢一卷,又可以試吓第二個牌子。

精織日棉 – 純棉即棄卷裝加厚超柔軟卸妝潔面巾

溢乳墊 / 乳墊 Nursing Pad

我係窮媽媽,唔會滴奶。我買過Pigeon,最主要係唔想餵奶以外嘅時間,將受傷嘅乳頭掂落去個胸圍度。

用咗成大包先發現有第二款「Pigeon – 防敏溢乳墊」,一用嘅時候就已經相逢恨晚,完全冇異物嘅感覺,直情搵返做女嗰陣時嘅感覺,令到我脆弱嘅乳頭有賓至如歸嘅感覺。早啲知有呢一隻,就唔使頭兩個月咁痛啦。

哺乳胸圍 Nursing Bra

按照自己心口嘅size買咗M碼。估唔到太緊嘅胸圍係成為我塞奶其中嘅一個元兇。

兩個月之後我就買咗四隻L碼,雖然我一早都知道我身體嘅反應係比較慢,但冇諗過個胸第二次發育,會響產後兩個月先至發生。雖然派費咗錢,但係都係要買過,如果唔係就會塞奶發燒,係呀,我係搞到發燒之後先至買過條新嘅胸圍⋯⋯

白瀧 – 產前產後舒適無鋼圈上開交叉哺乳睡眠胸圍

Haakaa吸奶神器

泵奶界嘅吸奶神器,自從響HKTVmall 正價買咗一個返嚟,一試愛上。但係洗極都洗唔切,所以響carousell 再買幾個二手嘅黎溝淡。

嬰兒磨指甲機

BB啲手指甲長得好快,響肚裏面已經生長緊,甚至乎一出世嘅時候就已經好尖。為咗唔好俾佢R損塊面,剪指甲係好重要。嬰兒指甲鉗我哋有,但全家冇人夠膽用。但佢隻手仔咁細,都係用機磨安全啲,起碼我handicap都未試過磨到佢出血。二手響carousell買咗個$100嘅磨指甲機,使用率好高,每兩日就要磨一次,好抵。

磨甲機嘅使用方式,一定要將磨甲嘅平面同BB嘅手指成垂直,先至唔會令到BB指甲越來越尖。假設BB手指係放喺枱面水平,部機都要放喺枱面水平咁樣去磨,如果向下或向上傾斜,指甲就會蝦磨得越來越薄,就會變得越尖。

沖涼盤

BB個b duck沖涼盤真係要用好多水,又驚浸咗隻BB落水。所以$100響carousell買左個Shnuggle月亮盆(英國品牌),又慳水又唔使用力。「它適合新生兒至12個月大的寶寶使用。獨特的臀部凸塊設計可穩固支撐寶寶,安全可靠」

同場加映,母乳浸浴。QQ去到六個月大,發現呢一個盤開始不勝負荷,呢一個牌子好似有一隻max版,係大少少嘅。去到6個月,我換左個Shnuggle Max。見「產後 – 4-5個月購物清單」。

哺乳枕

為咗唔好令到個胸投入地心吸力嘅懷抱,平平哋都要買返個哺乳枕。$100響carousell買左個My Breast Friend。點知用到第四個幾月,隻嘢就開始唔鍾意瞓喺上邊食奶。

哺乳帶

我真係勁傻仔,去到第五個月,先知道有呢一樣嘢。響產後嘅五個月,一直玩泵奶遊戲,如果我着過頭笠嘅衫,我一路都係用我個下巴去夾住件上衫, 再去泵奶或者埋身⋯⋯練成左發達嘅下巴肌肉⋯⋯

直到見到有呢一個產品,再上網一search,發現要成舊水一條,黐孖筋㗎。 我即刻用人哋送嘅禮盒,外面嘅布條,打個結製成咗一條哺乳帶。我真係覺得自己好聰明,同時覺得自己頭五個月好戇居。

其實只不過係普通一條布帶,用法:好似頸鏈咁掛喺條頸度,然後將調落嚟嘅布帶全部塞晒入去心口,響小腹位置拉返個圈出嚟再掛上條頸度。

Gym mat

除咗響carousell,媽媽谷都會有媽媽平放gym mat。我就$100買咗個二手嘅返嚟。得閒就同QQ玩tummy time。

尿片

我知道好多媽媽響BC度買套票買尿片,買套票要用腦,但我已經痾左個腦出黎。加上由於我住偏遠區域,唔係間間舖頭會送貨。好好彩比我發現到親子王國Baby kingdom BK mall,就算買一包都送貨。

嬰兒洗頭水/沐浴露

我嗰隻係八月BB,三個幾月左右就開始天氣乾凍。雖然之前睇咗消委會報告,買咗Aveeno Baby,然後有試過用有機嬰兒番梘,但見住QQ皮膚越嚟越乾,百日宴嗰日兩個面珠燈仲紅卜卜,變到好似濕疹肌咁。就去carousell 用$20買盒舒特膚試用裝黎試一試佢。

用開又ok喎,沖完涼繼續厚查Aveeno Baby,就給你一隻完好無缺的QQ。

舒特膚 – Cetaphil 嬰兒溫和潔膚及洗髮露

嬰兒粘着棉花棒

因為QQ實在太多鼻屎,有一次為咗hktvmall湊單,就買呢隻棉花棒來玩下。到真正用嘅時候就發現佢嘅粘貼力都唔算太勁,其實都係要將棉花棒抹落去QQ嘅鼻腔。

Pigeon – 日本版 貝親 嬰兒粘着棉花棒 50支 (幼棒) 

最好用都係呢一隻清潔器。如果唔係知道小朋友個鼻孔要慢慢先至生鼻毛,就會慢慢退啲鼻屎出嚟,我會買多兩隻,一齊放樓上,一隻樓下,一隻放媽媽袋。夾出的一大舊鼻屎嘅時候,好有成功感。

KAIJIRUSHI – Kaijirushi 貝印 嬰兒鼻孔+耳挖清潔器

濕清潔棉

因為要準備定返工之後,喺公司泵奶,冇理由又要帶棉花球又要帶熟水。所以試咗幾隻濕紙巾,發現安美潔夠濕得來,又唔會水滴滴。

日本安美潔™ – 2 盒裝優惠 – 純水• 濕清潔棉/ 口腔清潔棉

 

購物清單全集:

  1. 孕期 – 早期購物清單
  2. 孕期 – 中後期購物清單
  3. 產後購物清單
  4. 產後 – 4-5個月購物清單

 

 


生仔都要生三日

  1. 三日產房之旅 – 見紅入院篇
  2. 三日產房之旅 – 生仔都要趕deadline
  3. 三日兩夜病房餵奶遊戲

產後打大佬

  1. 出院後嘅混亂人生 (D4-D100)
  2. 孕期 – 順產 or 開刀
  3. 產後媽媽身體變化
  4. 育兒 – Fun Fact
  5. 育兒 – 加固之路

餵奶篇

  1. 孕期 – 奶粉選擇
  2. 育兒 – 人奶 vs 奶粉
  3. 育兒 – 哺乳埋身篇
  4. 育兒 – 哺乳泵奶篇
  5. 育兒 – 電動奶泵嘅選擇
  6. 育兒 – 奶袋篇
  7. 育兒 – 塞奶篇(D118)
  8. 育兒 – 返工泵奶篇
  9. 非官方非正式之塞奶原因
  10. 育兒 – 追奶之路

尿片篇

育兒 – 尿片篇

洗錢篇

  1. 產後購物清單
  2. 產後 – 紮肚篇
  3. 嬰兒攝影 – venture studio
  4. 產後 – 4-5個月購物清單
  5. 嬰兒攝影 – ABC studio

發表回覆

你的電郵地址並不會被公開。 必要欄位標記為 *