Langham staycation 無限不停食食食 – 房型及泳池

2021年5月Langham staycation

事後睇返呢個月真係唔知咩事,連續個個星期都去staycation。 仲要係琴日啱啱先響港香check out,今日就嚟朗廷無限食食食。

我諗應該係啱啱甩咗孕初期嘅不適感,孕後期個肚就會越來越大,所以孕中期就要不停去放縱下。

本身呢個package包咗$1800蚊Credit,以為唐閣作為米芝蓮餐廳,應該好快脆會食晒$1800蚊,點知最後我哋飽到好想打包番屋企。

lobby大堂係幾靚嘅, 最重要係對稱嘅。

Murray一樣,員工唔會搭客嘅升降機,會讓客人先行。

部lift嘅內部都幾合我心水,因為都係對稱嘅。

白色嘅房間感覺上好雅致。我個人幾鍾意嗰個假嘅壁爐,感覺上真係幾warm,可能最主要原因係冇位擺電視櫃。

房型比想像中細,市中心就唔好預有風景睇,電視開着大概15分鐘左右會自己冇畫面,然後熄機。

電視仲會有朗廷春夏祭活動。

生果盤係三隻蘋果,仲有一杯菊花茶,用玻璃杯同牛油紙封住好搞笑。

熱水煲係Delonghi, 純粹係因為朋友叫我哋送呢個俾佢做入伙禮物先至識。

要特登用一格櫃桶去裝住個紙袋。

其實都幾奇怪,點解Cordis都唔係比川Chuan嘅洗頭水護髮素,但係朗廷酒店就會。真係好香好好用。而最奇怪嘅就係,之後我哋住返Cordis,仲去埋Chuan做Spa,都只係用緊Cordis牌嘅洗頭水⋯⋯

同Cordis唔同,嗰邊係枱上洗面盤,仲要係透明玻璃好容易睇到有花痕。呢邊設計一樣,但係佢喺台下盤。如果就咁睇落去啲雲石紋比較花,但佢可能好多洗手盆下面嘅暗燈,打得好光,所以就冇咁覺眼。

沖涼水壓有啲弱,幾溫柔。開熱水要等成分鐘先至有,開住花灑好晒水。泳池更衣室入邊嘅水壓都係一樣。

如果真係要搵瑕疵嘅,只能夠話佢裝修手工有啲參差。淋浴玻璃門隔離會漏水所以要用地舖去吸水,浴缸旁邊嘅雲石定唔知磚嘅接駁位好糟糕。

然後凍水熱水個面板又有浮動,另水喉嘅時候成塊面板都郁得嘅。

我吹吹下頭同小寶講,我覺得張枱好熟口面, 你睇吓佢枱腳嘅扭扭設計, 係咪好似cordis嘅logo,連個櫃桶嘅把手都好似嗰個style。

同場加映,壁畫,藝術嘅嘢我真係識條鐵咩。

轉眼就諗住去泳池玩下,沿途參觀一下健身室,reception見到腹大便便,話有個program可以跟住電視可以做孕婦瑜伽。可惜我哋嘅時間淨係夠去泳池游水。

好爽,泳池包場咁濟,半圓形嘅位置係屬於淺水區,我訓響嗰度利用水嘅浮力,拉咗陣筋。小寶就游咗幾個塘。

泳池旁邊嘅位置仲有得俾你乘涼,幾有歐陸風格。


Langham staycation

Langham staycation 無限不停食食食 – 房型及泳池
Langham staycation 無限不停食食食 – 下午茶同早餐,偷雞參觀嘅晚餐自助餐
Langham staycation 無限不停食食食 – 連續兩日食唐閣
Langham staycation 無限不停食食食 – Bostonian Seafood & Grill – Langham Hotels

發表回覆

你的電郵地址並不會被公開。 必要欄位標記為 *