孕期 – 朋友們常見問題 Q&A

響整個孕期裏面,我歸納左朋友們最鍾意問嘅問題。

私家定公家?

我記得有一個Auntie講過,錢係搵得返嘅。加上屋企地理位置,如果係公家就一定係屯門醫院。去到三十幾週嘅時候見到媽媽谷入邊都有人話,屯門醫院又一單case無清晒個胎盤出嚟。你話仲邊夠膽入屯門醫院。雖然都有好多屯門醫院嘅忠實擁躉,都話入邊嘅姑娘幾溫柔,做嘢好快手。但始終有得揀嘅話,唔想攞條命仔去較飛。

揀私家醫院仲要視乎同屋企嘅車程,由屋企去荃灣港安大概半個鐘車程。我喺度諗如果陣痛穿水,半個鐘去到醫院都唔算過分。更何況如果我去屯門醫院有可能都要半個鐘。

順產定開刀?

由於我個人比較自私,聽得太多順產嘅回復能力快好多,身體自然嘅機制又會識得提醒個胸上奶,然後子宮修復既過程又會天然啲。要陣痛最多都係痛幾個鐘至10幾個鐘,佔整個人生嘅時間而言都應該係可以接受嘅。

生到唔夠力嘅時候,大不了咪食全餐。反正去到嗰個時候,都唔會有得揀,淨係想醫生護士盡快幫你拎佢出嚟,然後快啲救我唔該。

雖然我咁講,但我唔排除到其時響病床上,我都係會呼天搶地。見孕期 – 順產 or 開刀

會唔會打無痛?

我問過啦本身私家醫院已經六萬到八萬,無痛加麻醉師差唔多要25,000以上,咁咪埋單成100,000,好貴呀。所以唔用無痛啦。

雖然我咁講,但我老公話,到時你開始陣痛,可能就會叫「我乜差都打呀!」

喂唔喂人奶?

我係咁諗既,唔好太大壓力,有奶就喂;無奶就可以食刺身、阿媽家姐、海膽。仲可以食雪糕安撫脆弱既心靈。耶!人生實在太美好。

中文名幾時改?

我哋兩個都係懶,有咗時辰八字之後直接外判出去搵人改,到時如果收返返嚟啲名唔啱嘅,咪再搵第二個改囉。

傳送門:孕期 – 改名

傳送門:孕期 – 出世後 To do list

英文名幾時改,改完落唔落身分證?

我係懷孕五個月左右,有一晚讀咗100個女仔英文名俾佢聽,然後有三個名佢會踢我個肚,然後過多一晚不停重複個三個名,跟住佢踢邊個踢得最大力就揀嗰個。

改咗英文名都唔會落身分證,唔想限制左佢既人生。因為驚佢大個唔鍾意個英文名,然後都仲有得改。其實落咗身分證都可以改,但到時啲乜嘢畢業證書啊都要改名會麻煩啲囉。

 


懷孕全集:

  1. 懷孕產檢時間表 – 深度research
  2. 懷孕產檢時間表 – 早期懷孕檢查(包括T21、鴨咀、B鏈)
  3. 懷孕產檢時間表 – 中期懷孕檢查(包括照結構)
  4. 懷孕產檢時間表 – 後期懷孕檢查(胎位不正)
  5. 孕期 – 早期購物清單
  6. 孕期 – 飲食
  7. 孕期 – 滴雞精嘅比較
  8. 孕期 – 臍帶血儲存
  9. 孕期 – 媽媽會
  10. 孕期 – 媽媽會贈品
  11. 孕期 – 中後期購物清單
  12. 孕期 – 入院前準備 (走佬袋、申請信用卡、買陪月勞工保險、家居維修)
  13. 孕期 – 出世後 To do list
  14. 孕期 – 一孕傻三年
  15. 孕期 – 朋友們常見問題 Q&A
  16. 孕期 – 奶粉
  17. 孕期 – 改名
  18. 孕期 – 英語學習之比較(Disney/Oxford/D Mind)
  19. 育兒 – N/K班

發表回覆

你的電郵地址並不會被公開。 必要欄位標記為 *