孕期 – 奶粉選擇

點解奶粉嘅選擇係屬於孕期,而唔係育兒嘅階段呢?主要係因為如果你入到醫院之後,BB一出世,如果你唔夠奶,醫院就會問你想飲邊隻牌子嘅水奶。如果到時生完(touch wood)真係無奶,突然要揀奶都幾頭痕。

至於奶粉定人奶嘅選擇,真係好個人。千祈千祈唔好受到其他人嘅影響,我自己係行人奶之路,但係中間經歷過痛苦,真係要好有堅持先至捱得過。如果本身個人意志力薄弱,咁就算啦,無謂傷害自己。Happy mum Happy family。傳送去:「育兒 – 人奶 vs 奶粉

醫院餵奶

科普一下,因為醫院姑娘冇時間沖奶粉,所以醫院好多年前已經轉咗用水奶。

而通常醫院喂咩奶,bb食開無事,返到屋企都唔駛轉奶粉牌子。除非食食吓BB有便秘或者其他便秘嘅問題,先要考慮吓需唔需要轉換第二個牌子。要轉換奶粉牌子又係另一個學問,未必需要溝奶粉,但需要逐餐逐餐慢慢去轉牌子,如果唔係bb會唔肯飲,每轉一次都要玩一星期。

私家黎講,荃灣港安有齊好多大品牌,產房護士話除咗媽媽奶,最好就係illuma。如果係私家醫院生產,就直接打去醫院問佢哋有邊幾隻牌子揀。

道聽途說

後來陪月同我講,佢有聽過有個BB食illuma, 但父母再俾咗佢食一隻美國牌子嘅益生菌,有日皮膚突然瘀咗一笪。去睇醫生之後,醫生話唔好再食illuma。呢啲係道聽途說,未fact check,又冇講原因嘅事例。各位媽媽自己衡量下。而我仍然係俾個女食illuma嘅。

邊隻最好

其實奶粉冇話邊隻好、邊隻唔好,純粹係睇吓BB肯唔肯食。就算你揀到一隻營養最豐富,最有機、天然、健康,有性格嘅BB話唔食就唔食。我都係咁同小寶講,就算你買咗最貴嘅illuma,可能你個女淨係想食20幾蚊一罐價真棧嘅奶粉,who knows?

試多幾隻奶粉好無?

我覺得媽媽奶當然可以隻隻試曬(見孕期 – 飲食 / 補充品),是因為大人飲咩奶都無所謂,純粹味道啱唔啱飲。但係如果BB奶粉,基本上喺醫院佢飲開邊隻牌子,出院冇乜大問題都會繼續沿用嗰個牌子,除非遇到特別嘅需要,譬如好似濕疹就要轉能恩;有啲人話敏感又要轉水解蛋白嘅奶粉;又有啲人會轉羊奶粉,易吸收啲。
反而就聽到好多媽媽認為小朋友生長曲線唔夠,夾硬同佢轉第二隻奶粉,但係轉奶粉過程又要溝兩款奶粉,然後BB可能又會食唔慣新奶粉,腸胃有問題反而仲衰。其實觀察到大部份媽媽,都係嗰幾個禮拜,發現小朋友有唔飲奶嘅情況出現,然後就驚佢厭食,然後想轉奶粉,但係其實只係一般正常BB厭奶期,捱過咗就好,只要小朋友體重有增加。
其實我覺得食邊隻奶粉都係大同小異,營養價值差唔多。當然呢個只係我嘅睇法,我成日認住小朋友咁細個一出嚟接觸個世界,你比乜嘢佢就食乜嘢,係冇得揀嘅情況底下,佢就唔會咁揀飲擇食。咁當然都唔排除有啲case係BB真係天生好揀飲擇食,咁呢個時候先至響Carousell買心儀奶粉嘅試用裝,其實都唔係太大困難。
所以點揀奶粉,結論都係睇媽媽自己嘅選擇。講開又講,我覺得無論奶粉選擇定係學校嘅選擇,其實都係媽媽自己心儀嘅選擇,可能最終BB都係唔鍾意,但係佢而家一日未出嚟你都唔知佢咩性格,所以都係見步行步。
我個人經驗就係入院之前揀定一隻你心儀嘅奶粉,然後如果BB食得OK咁就繼續用佢(講真私家醫院姑娘幫你餵奶,佢哋實有經驗啦,如果佢哋覺得嗰隻奶粉BB唔啱飲,一定會出聲同你講,最好響醫院就比佢哋幫你試到隻BB啱飲嘅奶粉,然後出院就繼續用嗰隻奶粉)最多事前打電話問埋私家醫院有冇嗰隻奶粉提供。
政府醫院嘅話呢佢係每一個季度做一個牌子嘅推廣,咁所以基本上冇得揀(所以咪就係囉,唔通響政府醫院出世嘅小朋友,就一定唔揀飲擇食咩,所以我覺得個前提都係小朋友係冇得揀嘅前提,有乜就會食物就會適應咗嗰隻味道,之後就可能難啲適應另一隻味道)。
同埋呀,原先bb用緊臍帶吸取營養,然後出咗世之後要轉飲奶粉,你都要俾啲時間佢腸胃適應。通常頭一個月主要都係目標係退黃,正路來講都唔會同佢轉太多奶粉。做實驗嘅原理都係,唔會一次過增加太多不可控嘅因素。所以好難真係試晒咁多隻奶粉,同埋轉奶粉轉一隻牌子,都要一個禮拜適應期,市面上咁多隻奶粉點會試得曬。
數據比較

以下係早前做research,抄低嘅一啲數據,其實真係睇爸爸媽媽嘅心水,我真係覺得隻隻奶粉食完都係會成長,冇乜大分別。最緊要係食完會唔舒服,唔好嘔奶噴屎,什麼都可以。排名不分先後,純粹係我一初對奶粉嘅品牌都冇太大認知。

美贊臣 產地:荷蘭
雀巢防敏媽媽積分賞 產地:德國;有能恩低敏,多數BB濕疹醫生會建議轉飲呢一隻
荷蘭美素佳兒(菲仕蘭(香港)有限公司)
美國雅培心美力
惠氏Materna illumama 產地:星加坡;有illuma;s26比較甜,我自己細個嘅時候都係食S26;好似係最唔甜嘅,所以似人奶
HiPP喜寶 我見媽媽谷入面,多數都會揀喜寶嘅米糊;有個律師媽媽係呢方面做咗好多研究,認為喜寶嘅牛奶來源係最好、最天然、最似母乳。我冇佢咁認真去做research,比唔到意見。
NUTRICIA (牛欄, AptamilTM4) 產地:印尼
雪印家庭(思敏兒) 據說吃了會變白,更適合女寶;但又有人話係因為食咗會變肥,肥到拉闊左就會變白
明治 體格結實 口感偏甜
森永 (Morinaga) 有助於排便 口感偏甜 荷蘭奶源
和光堂(Wakodo) 價格較低,性價比最高 荷蘭奶源
固立果(glico ICREO) 價格最貴,日本公主專用,營養成分最均衡,口感也最接近母乳,綜合評價最高

 

 


懷孕全集:

  1. 懷孕產檢時間表 – 深度research
  2. 懷孕產檢時間表 – 早期懷孕檢查(包括T21、鴨咀、B鏈)
  3. 懷孕產檢時間表 – 中期懷孕檢查(包括照結構)
  4. 懷孕產檢時間表 – 後期懷孕檢查(胎位不正)
  5. 孕期 – 早期購物清單
  6. 孕期 – 飲食
  7. 孕期 – 滴雞精嘅比較
  8. 孕期 – 臍帶血儲存
  9. 孕期 – 媽媽會
  10. 孕期 – 媽媽會贈品
  11. 孕期 – 中後期購物清單
  12. 孕期 – 入院前準備 (走佬袋、申請信用卡、買陪月勞工保險、家居維修)
  13. 孕期 – 出世後 To do list
  14. 孕期 – 一孕傻三年
  15. 孕期 – 朋友們常見問題 Q&A
  16. 孕期 – 奶粉
  17. 孕期 – 改名
  18. 孕期 – 英語學習之比較(Disney/Oxford/D Mind)
  19. 育兒 – N/K班

發表回覆

你的電郵地址並不會被公開。 必要欄位標記為 *