孕期 – 飲食

呢一篇並唔係講有啲乜嘢養生養胎嘅飲食指南,只係講一個孕婦生理、心理上最基本最需要嘅營養。

飲食要注意夠唔夠鈣?

孕期每日要1000mg,孕後期每日要1200mg。

健康院有免費嘅Materna 可以提供,每粒鈣有250mg。因為materna鈣唔夠,所以要補牛奶或者鈣思寶。可惜我唔識吞藥丸,所以materna我都係咬碎食,食完會有少少胃氣,所以有得揀就唔想食其他藥片補充品。

無糖鈣思寶一包250ml份量等同425mg既鈣。有次唔覺意買錯咗低糖,比較過無糖真係相對好難飲,但又驚低糖會肥人,所以夾硬飲低糖。飲多左鈣思寶之後,剪腳甲會變得好大聲,好搞笑。我嘅體質幾敏感,只要飲唔夠鈣思寶,手指甲好快會變軟。

一隻雞蛋得50mg,你諗吓究竟要點樣儲1200mg。唔夠鈣,夜晚就會好容易抽筋。

孕前期,好肚餓但係食唔落,腸道好似消化不良咁。所以我用bio既知識,人手跟方向推郁d腸,邊度實、唔舒服就按摩/推下d內臟,我果時坐住一路番工一路推,頭3個月可以推到放屁。我稱之為呢一種方法叫土法消化。自從個肚太大開始就唔知個胃去左邊,之後消化都好似正常番啲,所以就唔使繼續推。同埋之前試過kick住d飯向食道,勁辛苦,開始做伸展運動,對推食物入個胃/放屁有幫助。

孕後期用asia miles,換咗部豆漿機,懶係朝頭早可以飲下熱豆漿,好似好健康咁。

鈣同鐵質記得要分開時間食

去到孕期28週左右,發現自己重咗好多,應該係因為不停食碳水化合物、澱粉質。因為食蛋白質、鐵質先至係幫助BB發育嘅。所以就開始出街食飯嘅時候就專門選擇燒肉鋪,因為生熟度可以自己控制,然後又可以餐餐食西餐,雞扒走皮加菜,搞到好似移左民咁。可能因為我食好多牛肉,所以醫生從來冇話我有缺乏鐵質嘅問題。又咁講雖然我陀女,但一啲都唔鍾意食酸野,反而好鍾意食紅肉,所以唔洗食鐵丸?。有時都會擔心阿女嘅皮膚會唔會出事。

我keep住上壓9x下壓5x,有次響健康院檢查,8x同4x,比姑娘打回頭,要再度過。搞到之後每一次度血壓之前,都要做吓運動,或者叫小寶激下我。真正去到孕後期,可能因為個胎都整到我身體好熱,血壓終於去到11x/6x,叫做去返一個正常人嘅血壓水平。會唔會係因為我血壓低,所以係咁食紅肉都唔會有事呢?歪理。

媽媽奶粉

人哋話如果響食療補充到足夠嘅營養,就唔需要飲媽媽奶,因為飲媽媽奶真係好肥。由於我頭三四個月嘅體重係一路向下急降,所以我都懷疑究竟隻野夠唔夠營養,反正又拎到媽媽奶嘅贈品,咁響第四個月嘅時候就有間竭性地飲下媽媽奶,點知就發現第五六個月體重急升(咁都唔一定關媽媽奶事嘅,果段時間餓咗幾個月,我真係好似餓鬼投胎咁,係澱粉質嘅嘢都想擺入口)。之後就轉投入滴雞精嘅懷抱,好似話會長胎又唔長媽媽嘅肉。滴雞精嘅比較

  • 雅培媽媽奶ok,試用裝,味道容易入口啲。之後仲用咗一張贈品券佢拎咗一罐返嚟飲。
  • 美素佳兒Friso媽媽奶ok,試用裝有5包,騷啲甜啲,飲完就算。
  • 美贊臣,試用裝一包,又酸又臭,飲到一半已經好想倒咗佢。

滴雞精

孕期 – 滴雞精嘅比較

益生菌

響孕中期,有試過買獨立包裝既yogurt。根據坊間指示,向雪櫃拎出黎唔好打開住,放10分鐘,等d菌向無菌狀態發酵下先,由於冇打開蓋,理論上應該仲係無菌嘅狀態。去到後期比較懶,直接飲無糖益力多就算數,反正日日都有便便。

合桃黑豆黑芝麻

響孕後期,買咗點點綠嘅芝麻合桃粉。我陀女呀嘛,順便補下佢d頭髮,順便核桃補腦呀,因為我無記性左好多(一孕傻三年),補到阿女又好,補我都好啦。我加美祿為咗有d味,易入口d,不過唔係好溶,要搞一搞即飲。

果凍

去到孕後期,好鍾意食甜野,又怕肥,又話佢唔入盆,個頭大左,所以就要搵啲有飽肚感但又唔肥嘅零食食。全部買之前都睇過佢嘅糖分,睇吓會唔會太誇張。

垃圾食物

同朋友出街嘅時候,都會食薯片,唯獨解嘅係雪糕同埋冰。我連蟹蓋都有食,係唐宮出品嘅,炸架嘛,一定唔會寒涼啦。

人地話朱古力係甜同燥熱嘅,所以中醫唔比食,又有人話食左小朋友會曳。但我咁諗,如果有人唔比我食/飲朱古力,我而家就可以曳比佢睇。

 

 


懷孕全集:

  1. 懷孕產檢時間表 – 深度research
  2. 懷孕產檢時間表 – 早期懷孕檢查(包括T21、鴨咀、B鏈)
  3. 懷孕產檢時間表 – 中期懷孕檢查(包括照結構)
  4. 懷孕產檢時間表 – 後期懷孕檢查(胎位不正)
  5. 孕期 – 早期購物清單
  6. 孕期 – 飲食
  7. 孕期 – 滴雞精嘅比較
  8. 孕期 – 臍帶血儲存
  9. 孕期 – 媽媽會
  10. 孕期 – 媽媽會贈品
  11. 孕期 – 中後期購物清單
  12. 孕期 – 入院前準備 (走佬袋、申請信用卡、買陪月勞工保險、家居維修)
  13. 孕期 – 出世後 To do list
  14. 孕期 – 一孕傻三年
  15. 孕期 – 朋友們常見問題 Q&A
  16. 孕期 – 奶粉
  17. 孕期 – 改名
  18. 孕期 – 英語學習之比較(Disney/Oxford/D Mind)
  19. 育兒 – N/K班

 

發表回覆

你的電郵地址並不會被公開。 必要欄位標記為 *