The Mira Hong Kong 美麗華酒店 – 窮遊donki之旅

2021年3月頭。今次黎到尖沙咀心臟嘅美麗華,主要係因為Marriott Bonvoy Gold member有雙倍積分同雙倍晚數,總數HKD880一晚。其實明明已經保唔到級,純粹見到有雙倍,就忍唔住book下試吓住⋯⋯

仲記得臨入住前一晚,見到staycation群組,話美麗華嘅住宿體驗有小強,嚇得我哋呀。

去到酒店樓下,仲順便去埋futago洗戒指。lift口盞燈好殘眼,好似響黑暗之中嘅螢火蟲一樣咁耀眼。與其話盞燈太光,不如話佢成個設計都好黑。

黎到房間門口,如果清潔左嘅房間佢會有一張貼紙封存好間房,好似好貼心咁。個設計理論上係你一推開道門,張貼紙就會被撕開。但現實係,你推開道門,其中一邊貼紙就會甩咗,痴唔實,呢個設計真係好搞笑。我哋好似懶得搣開張貼紙,又佢繼續痴返喺道門。

首先睇睇房間外面嘅景色,由於係望中庭,冇乜嘢好睇,然後就拉返埋個窗簾。送嘅茶包品牌係WG,打包帶走。正正常常大床,雙邊落床,企缸浴缸都好似好四正(…果然人類好容易比外表影響)。

洗手盆設計好奇怪,水龍頭嘅開關掣響右手邊兩個凹槽入邊。咁每次濕住手去閂水嘅時候,水就會積聚響個凹槽入邊,究竟邊個聰明仔設計呢一個凹槽。然後水龍頭根長嗰邊亦都有一條罅隙,係要來儲水嘅係咪?清潔嗰個又難攪,我哋都用咗幾條毛巾放響幾個凹槽嘅位置,去吸水⋯⋯

今日行程滿滿,[Food] Burgeroom @Tsim Sha Tsui

仲要咁啱去開尖沙咀,所以去拎埋星展銀行嘅抽獎禮物。當其時RM話,「你咁好彩嘅,得100個人你都抽得中」。係咪我太敏感呢,我覺得佢好串。行返返酒店嘅時候,好想食雞蛋仔,但最後怕肥所以冇食到。

 

返番酒店,趁冇乜人,就去佢嘅親子樓層度參觀一下。酒店將其中一層酒店房佈置成common area咁。有啲房間可以預約睇電影,仲好似有爆谷食。有啲房間就主打兒童區域,現場見到好多家長帶小朋友黎放電。我同小寶就去咗玩左一陣足球機、籃球機。

由於每間房間本身都係酒店房間,所以一入門口嘅位置就有個洗手盆,每次出入一個房間我哋都會洗手,好似幾衛生咁。都係果句啦,啲水積聚喺個凹槽度⋯⋯

[Food] 霸嗎拉麵 @ Tsimshatsui

時間去到咁上下,就去咗行Donki買晚餐。房間裏面垃圾桶唔夠大,我哋響Donki買嘅嘢食包裝,都唔夠位揼,但又費事嗌人過嚟收,好彩DONKI有比到膠袋,我哋包起一袋袋放喺垃圾桶隔離。

咁都總算好彩,成個旅程都冇見到小強嘅蹤影,我當贏咗。但一到沖涼就見真章,淋浴位置好易水浸。又唔知邊個聰明仔嘅設計,圖中所見有一道磨砂白色暗門,係又企缸位置趟門去閂埋浴室空間。但個重點係,企缸嘅時花灑係會將水噴向嗰個燙門嘅罅隙位置滲出去走廊。搞到我哋真係要call人嚟,比多幾條地布我哋,先無浸咗人哋個走廊。

不過除咗花灑之外,圖中可見仲有四個按摩花灑頭。除咗較低位置嘅花灑頭關咗水仍然有水流,其中一個花灑頭水力唔係好夠,我估應該係啲水未流晒,呢四個花灑頭確係幾好玩嘅,最重要嘅係佢嘅角度唔會令到條走廊水浸。

Check out之後第二日晏晝去咗食[Food] Wagyu Ya @Tsimshatsui


Staycation合集

  1. [豪華團] 九龍香格里拉兩日一夜 Staycation Offer
  2. [豪華團] 港島香格里拉 (ISL) – Staycation – 酒店篇
  3. [服務式住宅] K11 ARTUS 試住服務式住宅 – 房型篇
  4. 九龍香格里拉 Welcome Back Offer – 豪華閣 (房型)
  5. The Murray – $3,xxx 包3道菜晚餐、早餐、下午茶 – 房型
  6. Ritz-Carlton 麗思卡爾頓 – 堅離地食玩瞓系列 – 房內
  7. The Mira Hong Kong 美麗華酒店 – 窮遊donki之旅
  8. Courtyard by Marriott HK Shatin 沙田萬怡酒店 – 入camp體驗
  9. Courtyard by Marriott HK Shatin 沙田萬怡酒店 – 入camp但住suite係咩玩法
  10. Royal Garden 帝苑酒店 – 套房、入lounge、自助餐

發表回覆

你的電郵地址並不會被公開。 必要欄位標記為 *