我絕對深信，BB出世之後，成個世界應該會唔同咗，如果唔好好做足準備就會倒瀉籮蟹咁。好彩我係一初唔算太緊張嘅時候，已經整定project august 嘅google sheet XD所以可以跟着照單執藥。
出世後
下載育兒軟件
響醫院嘅時候，就要開始記住BB幾點要食奶，然後我就download咗Piyolog。 可以記錄低，每日究竟係埋身餵定係樽餵，樽餵咗幾多，幾時大、幾時細，上一餐距離而家係幾耐。Piyo log app 配合Apple Watch使用效果更佳。可以響商場哺乳室餵奶嘅時候，使用Apple Watch就可以計時。
咁樣就算產後三日去複診或者健康院姑娘問起，一日有幾多次濕片，或者每日嘅奶量有幾多，都可以即時答到。
我自己屋企有好多照顧者，所以仲需要一份hard copy放喺屋企，大家好似返工打卡咁填表。
臍帶血
如果買咗臍帶血package，拎取房號之後要WhatsApp agent。小朋友出世後再次見到收集盒之後，就致電熱線，同事就會過嚟收樣本。Healthbaby會響廿四小時內將樣品入庫。Cordlife就48小時內。
響醫院生產後， 好在老公有得陪產， 可以幫手call Cordlife 來收件。 大概生產之後嘅第二日下午， 就有人嚟收貨， 順便俾返張收據， 話完整嘅合約大概會響幾個禮拜之後寄到府上。
出生日期
有咗出生日期，就可以通知返公司嘅HR，確認返產假period，同埋俾地址公司送果籃。順便延續個產假，請多一個禮拜假，反正我有的是年假～
出院後
BB出世紙
出世後42日內要去申請出世紙，就係免費嘅。42日之後都係$140，超過一年就$680 。如果要等到有時辰八字先搵人改名，視乎返個師傅嘅時間，有可能要俾$140 。
我改名約咗陳正匡老師，由於老師去咗台灣，所以可以用zoom/skype 嘅通訊軟件來一個鐘頭視像對話。一生左之後就已經聯絡老師，都要等10日左右，先至有期同老師通話。改名之前已經根據醫院嘅指示預約咗幾時攞出世紙，呢一個期都去到九月頭， 係生產之後嘅大約一個月。
BB黃疸/健康院覆診
香港BB好容易有黃疸問題，所以無論響政府定係私家生，出院嗰日就要即刻打電話去相應嘅健康院或者政府醫院預約排期複診。為BB填表開File嘅時候，識填嘅就填，即係未諗掂改咩名嘅就唔使填。
我諗住BB嘅疫苗針全部都係私家醫院搞掂，所以唔需要特別打去政府健康院約時間複診。
影證件相
大約應該過咗一個月之後，就去影護照相，然後申請護照/回鄉證。
出世紙呢就唔使交相嘅，同一日搞嘅時候，就問reception拎埋表格去整護照（要一張證件相）。申請護照要填多一張副簽(counter sign)嘅表格，（要第二張相）相片要貼好落表格，搵非父母嘅特區護照持有人簽名，同時要環跨表格同張相。
原來整護照同時要申請埋香港身分證（要第三張相）。
咁而家封咗關，亦都冇乜必要返內地，所以我哋冇特別去申請回鄉證，如果要申請就要另外一張證件相（需回執）。影相嘅時候要話俾佢聽你今次想申請啲乜嘢證件，基本上去影兩sets，一set特區護照，一set回鄉證。
BB保險轉名
如果係買咗AIA嘅BB危疾單（BB出世之前就可以買嗰份），就要留意番。因為附加契約（意外、住院、醫療）要有出世紙先至可以買得，BB出咗世15日之後，要約agent加番啲附加契約，同埋將個受保人轉返做BB。
等我搞掂咗張出世紙之後，就約agent。
如果唔係買咗AIA嘅，就拎咗BB出世紙之後，好似要出世過咗15日，就可以同經紀買保險。
派薑醋
十二朝，一個小滿月，可以派薑醋啦。提早四五日預備定豬手同埋蛋，然後book定車12朝一早就courier運送薑醋去公司。
稅務署暫緩暫繳稅
就好似我之前都講過，一日唔死一日都要交稅。拎到出世紙之後，有咗亞女，就可以同稅務署申請暫緩繳納暫繳稅。表格傳送門
8月26號send表格去稅局，9月1號就見到稅額即刻減免左一大缺，爽歪歪。
懷孕全集：
- 懷孕產檢時間表 – 深度research
- 懷孕產檢時間表 – 早期懷孕檢查（包括T21、鴨咀、B鏈）
- 懷孕產檢時間表 – 中期懷孕檢查（包括照結構）
- 懷孕產檢時間表 – 後期懷孕檢查（胎位不正）
- 孕期 – 早期購物清單
- 孕期 – 飲食
- 孕期 – 滴雞精嘅比較
- 孕期 – 臍帶血儲存
- 孕期 – 媽媽會
- 孕期 – 媽媽會贈品
- 孕期 – 中後期購物清單
- 孕期 – 入院前準備 (走佬袋、申請信用卡、買陪月勞工保險、家居維修)
- 孕期 – 出世後 To do list
- 孕期 – 一孕傻三年
- 孕期 – 朋友們常見問題 Q&A
- 孕期 – 奶粉
- 孕期 – 改名
- 孕期 – 英語學習之比較(Disney/Oxford/D Mind)
- 育兒 – N/K班