懷孕產檢時間表 – 後期懷孕檢查（28-38wk: 胎位不正）

懷孕後期症狀

我有嘗試同阿女傾計，叫佢出力幫媽媽推d便便出黎，反正多便便，都係佔用緊佢既空間，屙得出就一家便宜兩家著。

響羊水已經好充足嘅情況底下，阿女好似住豪宅咁，成日喐身喐勢，肚皮可以見到有明顯嘅波幅。肚臍都突埋出嚟。有時佢郁身嘅時候肚臍仲會有泛起白頭浪。

由於佢喺入邊要吞吐羊水，學習點樣呼吸，可能一時唔覺意濁親就會打C EGG。

食咗甜野，或者食飽飯，或者臨瞓嘅按摩時間，都可以feel到佢有明顯嘅郁動。正常人應該係咁，但我身邊發生嘅嘢都應該唔多正常，佢連響返工時間、搭緊車，都可以有明顯嘅郁動。我好擔心，佢點解唔瞓覺。

中期懷孕檢查

私人時間：

28wk3: 買咗低糖益力多嚟飲，但飲咗幾日之後發現阿女成日打C EGG。

29wk1: 凌晨4:30先瞓，右腳抽筋，左腳想去救嘅時候，左腳都抽埋，然後自暴自棄由佢哋抽，終於瞓返嘅時候，右腳再抽。

第十六次產檢（第五次政府產檢）＋打百日咳針：

29wk6，仍然都係度血壓、度體重、驗尿。

等左成十世先入去摸肚圍大細，姑娘講野勁細聲「你老公對你幾好wo」我聽到「你對醫生幾好wo」我心諗，你講乜嘢啊。「下？」「啱先出邊嗰個唔係你老公咩？」「哦，係呀係呀」bb有心跳，我無水腫，完。

等見姑娘，姑娘勁廢。

「第一條問題問你，有咩想問」
「我恥骨痛，有冇舒緩辦法」
「你先29wk，個胎仲會重，之後會仲痛」
「咁有咩運動做得」
「咁你睇下健康院本書有無咩運動做得」
「我睇過，本書無講，（見佢喺度掀書）我又無背痛，所以呢一個動作又好似冇乜幫助」
「咁你自己要睇多d書，先知有d咩運動有幫助，邊個教你做嗰種運動，都要問番佢會唔會影響個BB」
「⋯⋯」

「第二條問題，要唔要維他命，要唔要假紙」
「要，我而家孕後期，materna 會唔會唔夠鈣」
「materna係孕婦專用既維他命，應該就夠既，你驚就日常要正常飲食啦」

「第三個問題，打唔打百日咳針，孕婦自己揀。bb出世要兩個月之後先打，依家打咗就俾咗抗體bb。因為上年百日咳人數上升，政府上年開始就建議孕婦喺26至34週接種百日咳疫苗。」
我即刻上網睇，出邊私家打一次要$1000，健康院就免費。

「下次4星期再黎」
「咁黎緊產檢，第幾週開始要兩個星期一次？」
「你而家29wk6，下次係4或3星期都得，你係第一胎？（掀file）」
「係，咁係咪三十幾週就要兩星期一次？」
「係」
「咁下下次係咪2星期一次」
「咁你下次4星期啦」
「Ok咁34週就2星期一次係咪」
「下次你係33wk6喎」
「Ok咁33wk6之後就2星期，咁會唔會之後變1星期一次？」「唔需要咁密既」

終於知道乜嘢叫勁廢嘅政府產檢。

影孕照：

Base One Studio

私人時間：

唔知係咪行路夾屁屁，定到左恥骨唔痛既時間，行路無咁痛。

第十七次產檢：

30wk6，我已經放棄治療，知道問乜都好，醫生都會話係正常，所以直接照超聲波啦。

阿女Pat pat坐向下，坐住膀胱，怪唔知得成日急尿。阿女今日手腳向右邊，身同背脊向左邊，所以右邊肚皮受罪比較多。阿女用手遮面、手腳接埋、瞓到攣公蝦米咁，醫生出嚟推左佢幾下，睇下佢會唔會放手，佢死命捉實。

醫生話，32週要開始轉頭向下（入盆），有人早、有人遲，最遲36週，要頭向下，如果唔係就要開刀。

都係忍唔住問咗醫生，夾pat pat行路好似舒服d， 但會唔會影響順產架。醫生好正：「（恥骨痛）唔係靠意志可以改變到架」。

私人時間：

自從醫生話「唔係靠意志可以改變到」，真係無論我做咩方法，盡量運用大髀任何肌肉都好，都改善唔到我嘅恥骨痛⋯⋯所以女人真係用耳朵去生存，咩人講咗啲乜嘢，真係好大影響力。

31wk5: 按摩時間踢得勁高，提高左差唔多4cm，就來高過喜馬拉雅山。唔通佢唔鍾意我平躺？聽緊鋼琴小品渣，唔知以為我比搖滾樂佢聽。

31wk7: 夜晚係咁車輪轉我！唔知係咪頭仔開始轉落去，完全理解唔到佢做緊啲乜嘢。係一種新嘅痛楚，需要錄入痛楚database。痛到喊咗出嚟。

32wk1: 打咗去荃灣港安問，如果係順產嘅需要準備嘅走佬袋：

所有BB用嘅、食嘅都唔需要帶，連BB衫仔佢都會提供，最多係帶出院嗰日BB要着嘅外出衫。

對媽媽來講醫院會提供沖洗樽，產褥墊6塊（姑娘話應該夠用㗎啦），M巾同網褲（呢兩樣要個人另外買兩PC）。所有毛巾牙刷鹼液都已經會提供（除非自己想自備），然後自己帶睡衣（記得係著褲嘅，如果唔係睡裙拎高喂奶，會凍親隻腳）、拖鞋同叉電，當去酒店住幾日就可以。

最緊要揀定BB想食乜嘢牌子奶粉，到時姑娘一問你要識得答，主要大品牌都會有得揀。全部都冇分乜嘢系列，因為都係得初生嬰兒配方（即係水奶），所以齋揀牌子就可以。

所以好彩問咗先，本身諗住月尾「Aeon BB展」都求其買個走佬袋套裝，而家好多嘢都唔使買。

32wk1: 夜晚見到BB郁，高起成座山咁，但無痛感，好恐怖。小寶話，會唔會你個腹直肌已經爛咗，所以你已經冇咗痛楚嘅感覺。

33wk4: 以前夜晚抽筋通常係右腳抽筋，左腳去救，然後左腳都抽埋。今日兩隻腳都識玩，同時間兩隻一齊抽，然後我自暴自棄。

33wk5: 曾經以為水腫唔會找上我，點知八個幾月，連續三日腳踭水腫，仲要後小腿筋好緊，拉極筋都好痛。兩邊胸都漲痛。

第十七次產檢(今日又去政府，又去私家，超攰)：

政府健康院

33wk6，首先留咗第二督尿，然後去見政府姑娘，姑娘用人手摸、度尺，話BB好似坐咗響度。由於晏少少就會去私家照超聲波，所以姑娘叫我等睇相。

距離上次產檢四個禮拜，重咗1.6 kg，平均每個禮拜重咗0.4公斤，合格。

由於34週先可以見醫生，今日爭一日，仲要晏啲可以照超聲波確認胎位位置，如果胎位真係唔啱，所以叫我下次先至預約開刀。大概35週左右，胎位就會定左。姑娘話私家醫生可以幫你人手轉胎位，但係要打子宮鬆弛劑，所以會有風險。政府好隨意，都係up to 孕婦自己決定。

我問：唔係話35週先至可以un fitball？所以37週都有可能轉胎位？
答：基本上35週胎位就已經會定左，好少機會突然轉返轉頭。

然後講咗屯門醫院入院須知。亦都講咗無論係政府定私家生，出院嗰日我要打電話去健康院預約複診睇黃疸。大人嘅話，打過嘅針可以響醫健通（系統A）check到。但BB打嘅針暫時只可以響健康院（系統B）見得到，仲未可以synchonize落醫健通度。姑娘都話希望不久嘅將來可以升級到。但如果BB響出邊私家醫生度打額外嘅針，私家醫生可以將針嘅紀錄加入醫健通戶口。

私家醫生

33wk6，第二場，呢兩日開始發現右胸下便胃腩嘅位置好似瘀咗咁痛，醫生話係因為子宮變大頂住肋骨，仲強調，並唔係BB踢到我，而係子宮頂住咗肋骨。

同埋連續三日都覺得腳踭水腫，特別係放工返屋企之後尤其明顯。醫生話唔算腫得厲害，有啲人要着大兩碼嘅鞋。水腫係正常嘅，生完就會冇嘢。

一照超聲波，發現BB真係坐咗響度。醫生好強調，係BB自己鍾意呢個姿勢（唔關我事架）。如果個頭入咗盆嘅話，會因為盆骨嘅size限制咗佢個頭圍生長，而由於佢而家冇入盆，仲坐喺度坐得好過癮，所以個頭圍生長大左一個星期。

醫生都話32週至35週BB先至會確認胎位，依家先33週幾，啱啱開始嘅啫，比佢自己決定啦。佢要靠自己一腳踢落去，但越後期因為佢體積大、空間越小，所以就越難轉。如果佢都係堅持唔轉，咁就開刀，反正都冇得揀。

我問佢，咁35週可唔可以un fitball幫下佢？醫生勁大反應，你都胎位唔正，un乜鬼，唔好un呀。

臍帶血流量ok，都係靠佢自己轉身。一照超聲波影3D相，阿女秒速舉高隻手遮面，我哋三個人六隻眼，見着佢舉高隻手。好彩佢都肯好好放低，我忍唔住讚嘆左一句，個鼻幾高喎。仲以為醫生唔會理我，點知醫生再照多幾照，「個鼻又真係幾高喎」。

私人時間：

34wk，不停阿女講野，約好星期五前要轉頭仔，因為要出黎見媽媽啦。Keep坐做膝胸臥式同橋式，大家一齊努力。

我好早開始用托腹帶，又怪自己會唔會係因為用左托腹帶，阿女唔鍾意下面頂住，所以先唔肯落去。所以34週就開始停用，靠肚皮頂硬上。

心態崩了，自從知道胎位不正之後，恥骨好似唔敢亂黎，恥骨痛變成bearable ，水腫抽筋都消失左，可能恥骨既求生意志都好強，驚比主人鬧。

34wk2，今日黑雨，番緊工向巴士嘅時間，阿女係咁郁郁郁扭扭扭，唔知係聽到雷聲太興奮，定係驚驚豬。睇怕都係前者⋯⋯

我懷疑我個女練緊鐵頭功，每日喺肚臍左邊度練sit up。係咁吉個頭上嚟，又唔肯轉落去。

35wk5，村巴前面條友將張登i 後，然後我個袋（放大脾）就會頂住個肚。點解d人咁無公德心。

第十八次政府產檢：

34wk6，上回提要，等到下晝響私家照超聲波確認BB係咪坐喺度，然後就要改健康院嘅複診日期。

今日去見政府姑娘，姑娘用人手摸、度尺，話BB仍然係打橫瞓響度，姑娘話佢自己第二胎都係喺屯門醫院生，第二胎因為胎位唔正屯門醫院有醫生可以幫佢做人手轉胎術。手術就係要響媽媽手腕打針，要來鬆弛子宮，然後就用人手將胎位轉落去入盤，風險就係有可能胎盤會剝落，或者直接穿水要緊急接生。我聽到都有啲怯。

又再等見醫生，女醫生一嚟就問，「你係咪諗住係私家生？」我即刻答，就算係響私家，順產又好、開刀又好，我都會要等後啲週數先（言下之意，唔好諗住咁早逼我揀開刀日期）。女醫生再問，「我係問緊你係咪諗住都係會響私家生？」咁我唯有答，係。點知佢即刻話，「咁你唔需要再返嚟健康院啦。」我話，我驚有咩意外，太早期，私家唔收我。醫生：「你有身分證㗎嘛，到時見紅、穿水、入屯門醫院，佢都一定要收你㗎。你第一次嚟過健康院登記過就已經可以啦。」大佬啊，我鬼知咩。

總之，女醫生冇同我講任何關於人手轉胎術嘅野，然後亦都叫我唔好再兩邊走，唔需要再返嚟健康院，如果到時真係想入屯醫，自己Walk in就可以。最後俾埋成疊紙質版嘅醫療報告，話到時拎入政府醫院就可以。好彩我哋醒目，即刻問佢攞埋Materna，佢話餵奶嘅時候都要照食，所以一次過開咗四個月俾我哋，出邊坊間買一樽都唔平架。

然後就可以同健康院say拜拜，下次再嚟嘅時候就係抱住出咗世嘅BB做檢查。

第十九次產檢：

35wk6，擔心左一個禮拜，究竟BB有冇掉頭落去，係咁同佢傾偈講數。呢個禮拜開始，個胸都成日漲痛。

早兩晚開始下腹陰陰痛，然後呢兩日都郁得好勁，我懷疑係佢肌肉開始急速增長，有幾下嘅痛楚仲好似係俾佢響入邊咬咗一啖咁，如果唔係知道佢未生牙仔，我一定會怪佢。

雖然有少少自暴自棄，但都總要見醫生照超聲波。未入房時，繼續同佢講道理，提佢要見何醫生啦，點知佢一腳伸向我腿側，痛到我。

一照超聲波，醫生就話佢個頭仔已經轉咗落下便，但未入盤，所以一日都仲有機會可以掉頭上返去。心情大好，條友幾識do。究竟我係咪要開始食多啲嘢令到佢肥啲，然後冇空間掉頭上去？定係我應該做少啲運動，盡量壓迫住個肚嘅空間，咪比佢郁咁多呢？

今日仲順便問埋醫生，係咪要留床位？醫生問，「下，你諗住響我哋到生呀？」究竟大家有啲咩誤會，令佢覺得我哋唔會搵佢接生。Anyway，今日俾咗按金、留左床位。走佬袋已經執好 、新嘅信用卡已經到手（孕期 – 入院前準備 (走佬袋、申請信用卡)），已經準備就緒。

私人時間：

35wk開始食西瓜，食左幾日，就開始m痛，即刻停。

夜晚瞓覺嘅時候，已經變咗大概兩三個鐘醒一次嘅餵夜奶頻率，應該係跟返BB嘅生理時鐘，每兩至三個鐘一個cycle，但其實成年人係四個鐘一個cycle，that’s why喂夜奶嘅人生唔係人咁過。

響轉身落床要去廁所嘅時候，盆骨郁動嘅時候會發出卡一聲，小寶每次都會笑到痞左落地下。

下腹開始有m痛感覺，懷疑係假宮縮，冇特定節奏冇特定頻率，佢隨心所欲，你any time都估佢幾時幾時出現，冇得預防。亦都係好明顯估到佢已經開始轉頭入盆，手仔成日響下腹幫媽媽R痕，腳仔就係左邊或者右邊腰瘋狂踢。

37wk1，啱先間斷地M痛左大概兩個鐘，沖完個涼又好似冇咁痛，都好怯。

-產假申請咗，最多提早嘅啫
-Outstanding list，同maternity leave email 都draft好，隨時ready send out
-炒米茶入咗雪櫃，一拎走佬袋夾埋，帶埋尿墊上車就行得
-買定一罐細罐心儀奶粉，放喺屋企做後備in case隨時無奶
-聯絡定裝修師傅（等我入院就響bb房裝冷氣，因為佢堅持我有咗期間唔會過嚟裝修）

37wk5，夜晚瞓覺身痕，以為係俾蚊咬，到日頭一睇，唔見有蚊爛，所以應該係熱毒，即刻飲腐竹雞蛋糖水。唔夠膽飲白蓮鬚水，因為醫院姑娘話會拉長個產程，唔夠力生。

第二十次產檢：

37wk6，呢兩個禮拜真係唔係人咁過。

一入房就直接同何醫生講，阿女郁得好勁。明明日日都有屎痾，但菊花就係因為腹壓，（原來荷爾蒙都會令到血管擴張，我有fd變左鼻敏感都係因為鼻血管擴張左，咁我就擴張左落pat pat血管度⋯⋯但彈性夠，所以無爆到出血），跌左四粒痔瘡出黎（咁大個女都未試過痔瘡咁痛），坐立難安。醫生一黎就問，點解唔查藥膏呀？你都未開比我，點敢買坊間果d呢？我話我好痛，唔想塞藥。醫生話入面就話要塞藥，跌左出黎果d就查藥膏啦。媽媽谷d人話，要生完20-30日先會縮番入去⋯⋯有時仲會feel到阿女繼續向肛門推進，真係xyz。前面阿女踢，後面菊花痛，腹背受敵呀。

今日進度，5份2個頭入左盆（用恥骨位置做brenchmark），如果入左5份3就隨時可以生。Bb面向尾龍骨，姿勢正確。胎水夠，但空間無乜淨（咁點解佢仲可以郁郁郁⋯⋯）。超聲波照到阿女額頭，然後佢隻手臂橫擋住隻眼同塊面，腳趾公入鏡，係手臂隔離，係咩玩法。臍帶血流量正常，冇纏頸。

我同醫生講話間唔時有M痛感，醫生都覺得係假宮縮，仲話BB有時會伸手落去R頭，所以會響下腹位置feel到佢手仔郁。又話入邊冇乜位，你仲要去R頭⋯⋯

醫生話，下次一個星期就要再嚟複診，中間只要中咗三部曲之一，見紅、穿水、陣痛，就隨時入院。

私人時間：

38wk，開始放產假。

好多人生完出嚟之後，就好想塞返佢入去。所以我想佢喺入面留得越嚟越好，反正佢終有一日都係要出嚟。雖然我係第一胎，但我而家好享受佢係消音狀態。你諗吓出到嚟之後，一定會有聲效攻擊。

 

---

懷孕全集：

1. 1. 懷孕產檢時間表 – 深度research
   2. 懷孕產檢時間表 – 早期懷孕檢查（包括T21、鴨咀、B鏈）
   3. 懷孕產檢時間表 – 中期懷孕檢查（包括照結構）
   4. 懷孕產檢時間表 – 後期懷孕檢查（胎位不正）
   5. 孕期 – 早期購物清單
   6. 孕期 – 飲食
   7. 孕期 – 滴雞精嘅比較
   8. 孕期 – 臍帶血儲存
   9. 孕期 – 媽媽會
   10. 孕期 – 媽媽會贈品
   11. 孕期 – 中後期購物清單
   12. 孕期 – 入院前準備 (走佬袋、申請信用卡、買陪月勞工保險、家居維修)
   13. 孕期 – 出世後 To do list
   14. 孕期 – 一孕傻三年
   15. 孕期 – 朋友們常見問題 Q&A
   16. 孕期 – 奶粉
   17. 孕期 – 改名
   18. 孕期 – 英語學習之比較(Disney/Oxford/D Mind)
   19. 育兒 – N/K班