孕期 – 臍帶血儲存

本身呢舊嘢唔係一個must buy item,純粹係屎忽痕可以睇吓。因為係第一胎,所以當買個另類保險。所以at the end我哋都係買最平嘅package,仲可以送一部價值幾百蚊嘅Ulmuka多功能烘乾消毒煲(蒸奶樽機)。

根據Healthbaby Agent嘅講法,理論上所有優惠券贈品要BB出左世之後再幾多個禮拜先至會送到府上,但蒸奶樽機因為要預防早產嘅情況,多數會提早送到屋企。如果懷孕因為任何原因要終止(需符合合約上列明嘅原因),所有預先繳付嘅費用都會全數退返,至於蒸奶樽機就會因為已經開封過而要比番正價。都公平合理嘅。

Healthbaby – 2005 Singapore

臍帶血嘅玩法主要分做,1.臍帶血儲存、2.臍帶血加臍帶組織(間質幹細胞)、3.臍帶血加專利臍帶膜(間質幹細胞+上皮幹細胞)。越多野就梗係越貴啦。我哋就揀咗最基本第一款臍帶血儲存21年。Healthbaby認證多過Cordlife。

最基本嘅臍帶血儲存都可以分為係1.傳統同埋2.全自動電腦系統儲存方式。傳統系統就係用液態氮(作為製冷媒介)儲存,冇全自動系統。全自動電腦系統都係用液態氮儲存,比較多認證,能夠令溫度更恆溫,品質更好。由於全自動,價錢又會貴啲。

21年後合約就會結束,由客戶決定續約,如果續約只需要比儲存費,目前合約其後嘅儲存費大約$500一年。都幾合理。

比較Cordlife – 2001 Singapore

Cordlife只有傳統系統提供,並使用氣態氮方式儲存,亦冇全自動系統。認證只有AABB。

問題時間

如果係親友想測試臍帶血啱唔啱佢哋用,檢測費用係醫院收(如果係QM做,大概千零蚊),Healthbaby冇手續費要收,本地醫院運送係唔需要收任何費用。正常情況應該係用捐贈者同接收者嘅血做typing先,最後先直接拎臍帶血做移植。

就算到時因為入咗公家醫院,或者其他原因用唔到呢個服務,都可以全數退款。

收集盒

簽約嘅時候就會收到收集盒,入院登記嘅時候將收集盒交比姑娘,然後拎取房號再WhatsApp agent。小朋友出世後再次見到收集盒之後,就致電熱線,同事就會過嚟收樣本。Healthbaby會響廿四小時內將樣品入庫。Cordlife就48小時內。

 


懷孕全集:

  1. 懷孕產檢時間表 – 深度research
  2. 懷孕產檢時間表 – 早期懷孕檢查(包括T21、鴨咀、B鏈)
  3. 懷孕產檢時間表 – 中期懷孕檢查(包括照結構)
  4. 懷孕產檢時間表 – 後期懷孕檢查
  5. 孕期 – 早期購物清單
  6. 孕期 – 滴雞精嘅比較
  7. 孕期 – 臍帶血儲存
  8. 孕期 – 媽媽會贈品
  9. 孕期 – 中後期購物清單
  10. 孕期 – 入院前準備 (走佬袋、申請信用卡)

「孕期 – 臍帶血儲存」有一則評論

發表回覆

你的電郵地址並不會被公開。 必要欄位標記為 *