去到三十幾週，個個人都會叫你執定走佬袋，非常淆底加緊張。所以除咗跟住中後期購物清單照單執藥，買晒基本要準備好嘅嘢，仲需要睇返自己去嘅醫院嘅準備清單，由於我仲未留床位，醫院仲未比準備清單我，好簡單姐，直接打去問咪得囉。
走佬袋 / 臍帶血 / 申請信用卡 / 買陪月勞工保險 / 家居維修
走佬袋
走路袋最好盡早準備，因為你永遠唔會知道會唔會早產。如果你話真係未準備好，但係又要生啦喎，咁點算，我會好騰雞㗎。呢個世界永遠都係，錢解決到嘅問題，就唔係問題。所以要慳錢嘅話，就要盡早準備。
如果係政府醫院，基本上要準備嘅除咗媽媽用品，仲需要準備晒嬰兒用品。通常係Aeon買個六甲村嘅走佬袋set裝。再另外補買網褲同M巾。因為每個人體質唔同，產後出血量有多有少，所以要另外加一pc床肉墊(之前好似聽過有媽媽如果出血多嘅話，唔夠用俾人鬧，搞到要問隔離床借。就算買多一pc，之後當屋企防漏m用都好)。再加買安睡褲（視乎需要）。
咁我主打係打算響私家醫院生，仲要諗住試順產嘅，所以就要按照你嘅意願去問醫院究竟要帶啲乜嘢。
荃灣港安話「所有BB用嘅、食嘅都唔需要帶，連BB衫仔都會提供，最多係帶出院嗰日BB要着嘅外出衫。媽媽方面，醫院會提供沖洗樽、產褥墊6塊（姑娘話應該夠用㗎啦）、M巾同網褲（呢兩樣要個人另外買兩pc）。所有毛巾牙刷鹼液都已經會提供（除非自己想自備），然後自己帶睡衣（記得係著褲嘅，如果唔係睡裙拎高喂奶，會凍親隻腳）、拖鞋同叉電，當去酒店住幾日就可以。」
我見有啲媽媽都會帶埋束腹帶。如果之後有裝到紮肚嘅服務，我又覺得唔係太需要入院帶。講真嗰幾日又有傷口又成，你邊有咁好恆心啊。如果真係要買嘅話，最多都係買二手，無謂浪費。「見紮肚篇」但留意番紮完肚之後，都係要用束腹帶嘅。
入院用
Healthbaby 臍帶血盒
夫妻雙方身分證
手提電話/按金
梳洗用
牙刷牙膏
毛巾（我買咗即棄洗面巾）
鹼液（好彩有帶，所以響生之前一日沖咗個涼）
洗面乳（雖然我帶咗，但最後真係冇咁好心情）
防滑拖鞋
日常用
保溫杯
鎖頭
旅行包 （梳）
紙巾
濕紙巾
充電器
水泡(要黎坐，無論係產前痔瘡、產後傷口，都啱用)
炒米茶（但有人話醫院嘅水唔夠熱，沖唔到炒米茶；又有講法係炒米茶會塞奶，最好都係返屋企先試喂人奶；我自己個人經驗係，生完之後有種元氣大傷嘅感覺，你比乜嘢我，我都飲落肚）
口罩、搓手液
傷口用（下身）
產後衛生棉（安美潔）
網褲（我買咗貴貴安美潔，就係為咗佢有魔術貼，到時醫生檢查可以打開俾佢睇，千祈唔好叫我拗腰除安睡褲）（如果係政府醫院，有可能會叫你買有扣嘅網褲，真係要上網睇video教學先至學識係咩玩法）
安睡褲（因為網褲實在太貴，入院穿水嗰陣時就着呢條算數）（試咗護舒寶同樂而雅，樂而雅嘅超薄甜夢安睡褲好着好多，我去到出院之後惡露時期都一直着）
沖洗瓶
產墊/尿墊
餵奶用
溢乳墊 「見孕期 – 中後期購物清單」
乳頭保護罩 nipple shield 「育兒 – 哺乳埋身篇」
吸奶器（仲諗緊帶唔帶，用完又唔知點樣洗）（最後無帶，因為冇需要。但就算需要都好，醫院有得借。）
母乳收集袋
產婦衣物
哺乳胸罩
束腹帶/束腹褲
除肚紋膏
外套、襪子
出院用（可後帶）
出院時穿着的衣服
口罩、搓手液
和尚袍、包被
紗巾
帽仔
臍帶血
如果買咗臍帶血package，就記得帶埋個收集盒（見上面嘅Healthbaby box）。詳情請見「孕期 – 臍帶血儲存」
申請信用卡
踏入中後期，如果要響私家醫院度生，閑閑哋都講緊成六萬至十萬埋單。再考慮埋生產完之後又有傷口、個人又支力，最好就審視一下老公本身持有嘅信用卡，然後再叫佢申請未持有嘅信用卡，去食迎新優惠。生產，同結婚一樣，都係一個好大嘅支出，梗係要返啲回贈。
由於我同小寶本身已經有玩開信用卡嘅遊戲，所以可供選擇嘅信用卡唔多。由於生仔要處理嘅嘢實在太多，加上而家里數貶值，直接Focus搵現金回贈嘅信用卡。
響購買「中後期購物清單」之前，小寶已經申請咗張渣打嘅Smart卡，去食25%現金回贈，碌$4000回$1000。
然後就要諗吓點樣找醫院條數，DBS黑卡都可以換到DBS dollars，但由於簽帳回贈得0.8%，又未係最吸引。如果用返現有嘅Citibank cash back，就現金回贈1%。
又有諗過渣打simply cash用嚟找醫院條數，雖然已經食唔到迎新，但simply cash可以任何簽帳冇上限1.5%回贈。
然後！就係一個critical moment！就發現咗呢兩張信用卡，信銀國際Motion信用卡同安信EarnMORE銀聯卡。咁找完私家醫院條數，起碼都回到$3500以上。
// 節錄自[財務類] 信用卡 – 分工
(9) 信銀國際Motion信用卡
為咗找私家醫院條數，食迎新用。
Moneyhero送$500
簽$8000回$800
所以諗住用呢張卡先碌$8000，total迎新食$1300。
(10) 安信EarnMORE銀聯卡
為咗找私家醫院條數，食迎新用。
Moneyhero: 額外有$300現金回贈+$250 Apple禮品卡
首90日簽滿HK$8,500回$500(再加基本簽賬回贈2%，$170)
本地港幣簽賬統一現金回贈2% （首HK$200,000簽賬）
然後再用呢張卡錄埋尾數（絕對係$20萬以內），迎新食$970，尾數就2%(e.g. (~70000-8000)*2%=$1240 or more)。
//
入院後
買陪月勞工保險
如果你請咗陪月，佢應該都會同你夾買邊一隻勞工保險。陪月用開叫豐隆保險，選擇家務助理保險，三個月（最少）全職，大概都只不過係$200 。我打算入咗醫院，陣痛緊嘅時候，為咗要分散注意，向中間間隔嘅時候就用電話買。
家居維修
有啲屋企好傳統，我嘅情況係個裝修師傅好傳統。由於bb房想換冷氣機，但個安裝師傅話因為我個肚，佢唔會過黎裝住，要我入院果日call佢，佢就會3日內幫我搞掂個冷氣。好有性格。搞到我入院又要通知多個人XD
有d屋企傳統到，安bb床都要擇日。有機會都會要入院後，屋企人先會砌好張bb床。我嘅情況係，張bb床響我37wk1都仲響船上面，仲有delay未ship到黎香港⋯⋯小寶表示好驚死。見「孕期 – 中後期購物清單」
懷孕全集：
- 懷孕產檢時間表 – 深度research
- 懷孕產檢時間表 – 早期懷孕檢查（包括T21、鴨咀、B鏈）
- 懷孕產檢時間表 – 中期懷孕檢查（包括照結構）
- 懷孕產檢時間表 – 後期懷孕檢查（胎位不正）
- 孕期 – 早期購物清單
- 孕期 – 飲食
- 孕期 – 滴雞精嘅比較
- 孕期 – 臍帶血儲存
- 孕期 – 媽媽會
- 孕期 – 媽媽會贈品
- 孕期 – 中後期購物清單
- 孕期 – 入院前準備 (走佬袋、申請信用卡、買陪月勞工保險、家居維修)
- 孕期 – 出世後 To do list
- 孕期 – 一孕傻三年
- 孕期 – 朋友們常見問題 Q&A
- 孕期 – 奶粉
- 孕期 – 改名
- 孕期 – 英語學習之比較(Disney/Oxford/D Mind)
- 育兒 – N/K班