久違左太耐冇出post，以為咁多個月去咗邊，我都係一路靠囤積嘅文章頂住。頭三個月懷孕，真係唔係人過嘅，連床都落唔到嘅時候，唔通仲要我寫文章咩。
首次懷孕，生理心理都受到荷爾蒙重大嘅改變，話唔緊張就呃你嘅，家庭醫生教落就話要將緊張轉化為喜悅嘅情緒。但其實好難，因為一發現懷孕之後，要準備嘅嘢都幾多。
發現中獎
由於經期周期比較長，當發現遲遲未黎嘅時候，用ClearBlue CB驗孕棒一驗，條線已經好深色。當下心情仍然好忐忑，會唔會呃我㗎。再買另一隻牌子(Mannings)再試一次，都係一樣有線，一計之下已經6週。因為經期周期長，所以周數未必準，要等到以後照超聲波，再慢慢修正預產期。
當時做過research，ClearBlue電子驗孕棒有個好處可以出埋懷孕週數。原來有人研究過，拆開入邊嘅零件一睇，電子驗孕棒入邊都係用普通驗孕試紙，係有電子儀器檢測試紙上面有冇線同深淺度，再用液晶顯示屏顯示俾你睇。咁樣又好似唔值咁貴喎。又咁講，有能力負擔嘅人會願意買個安心去大約了解懷孕週數，呢件產品應該比較適合經期周期唔穩定嘅女士。最後我都係買左普通CB驗孕棒，因為我覺得成舊膠已經好唔環保（其實本身生仔就唔環保）。
當時爬文睇到一舊雲咁，CB 係ClearBlue嘅short form，紅D綠D係驗排卵期同埋驗孕嘅試紙，原來為咗中獎大家都可以去到好盡。
懷孕證明
大約6週幾日，就去咗搵家庭醫生（$410）(上網爬文：去家計會都有得睇，$100渣)出懷孕證明。有朋友比較心急，想要即日拎完懷孕證明之後同日去醫院預約排期產檢，所以最好事先打俾診所，問吓懷孕證明可唔可以即日出到，原來有部份診所需要等兩日先至出到個證明，打個電話問聲先就唔使打亂自己嘅步伐。
懷孕證明本身好重要，係證明BB存在嘅文件。有朋友自己喺屋企驗完孕就算，後來BB未ready下次先，公司唔當佢小產，淨係當病假，就係因為無證明顯示BB存在過⋯⋯
懷孕早期最主要係倚靠BB自己嘅努力，BB要自己好用力長出心臟，仲要有埋心跳之後，先至初步叫做穩定。上網見到10個孕婦就會有1個流產，好多時候係BB嘅基因、生長情況未完全ready，勉強都唔會幸福，養好身體等BB返嚟會比較好。
去到見醫生嘅時候會量度體重，驗尿，其實同自己係屋企驗差唔多。懷孕證明裏面會寫住上一次經期第一日，同埋預產期日子。醫生會問埋你有冇藥物敏感、有冇直屬家屬糖尿病。
拎住呢封懷孕證明，就可以做好多嘢，例如去醫院排期安排產檢、同公司報告、拎幼稚園入學申請表（喂！我見人哋話新界區嘅孕婦係要咁喪心病狂嘅⋯⋯利申，我冇呀⋯）。
政府醫院
下一步就要去政府醫院排期。政府出咗個叫「預約通BookHA」嘅Apps，然後又要下載一個叫HA Go嘅Apps，登記咗之後佢會俾個QR code你，要去轄下任何一間醫管局機構去啟動HA Go帳戶。政府建議你下一次去醫院或者健康院時，啟動帳戶。然後下一次產檢就可以用「預約通BookHA」去預約。
去預約需要帶同孕婦本人身分證、老公身分證副本、六個月內地址證明、懷孕證明。
簡單啲來講，政府醫院唔收跨區產婦，所以首先要搵一搵你住嗰區有邊間醫院有產科。（全香港十間產科）
政府醫院會有合作開嘅母嬰健康院，間間醫院既首次登記做法都唔同，有啲要去母嬰健康院登記、有啲就要去醫院產科登記（見連結衛生署家庭健康服務），部份產檢會安排喺母嬰健康院度做，或者輪着去醫院同母嬰健康院，甚至乎有聽過要去唔同醫院做產檢。
留意番，由於有公司淨係接受病假證明書作為產檢證明，所以要問清楚公司先至去做產檢，然後再提出申請到診證明書或者病假證明書。
「註1：例行產後檢查只可申請到診證明書，不會獲發病假證明書。
註2：凡到衞生署轄下母嬰健康院接受服務人士，如即日向醫護人員提出申請到診證明書或病假證明書，毋須收費。但若在到診日之後才要求補發到診證明書或病假證明書，每張證明書須另繳行政費用港幣一百六十元正。」https://www.fhs.gov.hk/tc_chi/health_info/woman/14804.html
如果係合資格本地居民，預約政府產檢服務係免費，免費嘅嘢就唔好要求太高。網上爬文見到，去政府醫院一約，要等到12週之後先有得登記，咁都已經三個月啦。香港地，真係咩都要快、咩都要搶。
政府提供嘅產檢只會向有需要人士，提供唐氏綜合症檢查同結構超聲波檢查。所以如果係比較擔心嘅媽媽，就需要自己出去私家度買服務求安心。
私家醫院
如果想要響私家醫院生產，就要揀想要邊個醫生接生、順產或開刀（好多私家醫生淨係接受開刀預約，因為時間控制對醫生黎講比較方便）。(見孕期 – 順產 or 開刀)多數跟得果個醫生產檢，就會由佢接生，因為感覺上佢會熟悉啲你嘅情況。
由於都咁上下年紀，身邊都有唔同朋友親身或聽聞過特別嘅生仔體驗。都聽過好多情況因為唔同身不由己嘅原因，響最後環節要緊急去政府生產。例如私家醫生掛嘅醫院冇足夠嘅設備去處理BB特殊情況（例如冇早產BB ICU深切治療部、或者醫院冇吸胎盤機），早過35週私家醫院唔收，甚至乎需要響政府醫院開特別嘅File作密切觀察。所以我覺得穩陣起見，都有需要分別響政府醫院同私家醫院做產檢。等到最後環節，政府醫院都會有產檢記錄，都仲有個保障，唔使太徬徨，亦唔使衝閘等接生。
去到孕後期，一個健康院嘅醫生話，其實只要一開始響政府醫院做咗登記，到最後衝閘去政府醫院生產時，只需要帶同私家醫院檢測嘅報告就可以，係唔需要一路兩邊走做產檢嘅。
然後下一步要揀醫生，出名啲嘅醫生全部都好忙，打去診所問，如果岩岩驗到都要等四星期先至可以book到見醫生⋯⋯怪唔之得人哋話要贏在起跑線，醫生既期都係要搶。如果個醫生有掛名響私家醫院，可以試吓打去私家醫院度book，因為私家醫院都係想賺錢，會排多啲症，應該可以快啲有得睇。
私家醫院價錢
2019年響中環午飯時間，搭lift偷聽到OL嘅對話，私家醫院開刀生個仔都要9萬蚊先落到樓，果然窮人唔應該生仔。阿女你要乖，我會努力搵錢養大你。
到我去做research，先至私家醫院嘅收費都係海鮮價，五花八門，叫得私家，都唔會平得去邊。荃灣港安四日三夜$65,000埋單，唔夠力用真空仲要比多$2600。
更新：最後我喺荃灣港安跟何嘉慧醫生。待產兩日（當住咗兩日staycation），生嗰日開始計四日三夜，順產，冇打無痛，唔使用真空吸，揀雙人房upgrade咗單人房，老公可以陪訓(雖然話張床好硬)，埋單六萬幾，七萬蚊有找。爽。「三日產房之旅」
懷孕全集：
- 懷孕產檢時間表 – 深度research
- 懷孕產檢時間表 – 早期懷孕檢查（包括T21、鴨咀、B鏈）
- 懷孕產檢時間表 – 中期懷孕檢查（包括照結構）
- 懷孕產檢時間表 – 後期懷孕檢查（胎位不正）
- 孕期 – 早期購物清單
- 孕期 – 飲食
- 孕期 – 滴雞精嘅比較
- 孕期 – 臍帶血儲存
- 孕期 – 媽媽會
- 孕期 – 媽媽會贈品
- 孕期 – 中後期購物清單
- 孕期 – 入院前準備 (走佬袋、申請信用卡、買陪月勞工保險、家居維修)
- 孕期 – 出世後 To do list
- 孕期 – 一孕傻三年
- 孕期 – 朋友們常見問題 Q&A
- 孕期 – 奶粉
- 孕期 – 改名
- 孕期 – 英語學習之比較(Disney/Oxford/D Mind)
- 育兒 – N/K班
thanks for sharing 🙂