懷孕產檢時間表 – 早期懷孕檢查(6-17wk: 包括T21、鴨咀、B鏈)

懷孕初期症狀

6週幾嘅時候,下腹部就會有啲扯住嘅抽搐感,又會單則痛,好驚係宮外孕,唔知佢瞓唔瞓得啱位。上網睇話有可能係支撐子宮嘅韌帶,因為懷孕子宮長大而往上提所造成。唔需要特別治療,只需要休息。冇乜事我都係瞓先啦。

有一日,下背部好酸軟,無論點坐點瞓都唔舒服。忍唔住整咗個熱水袋熱敷,谷歌一check,又話熱水袋會熱親BB⋯⋯即刻拎返走,唯有早啲瞓。

有人話懷孕初期會流啡,好似係因為黃體酮唔夠,補唔住加厚左嘅子宮壁,所以要飲桑寄生蓮子蛋茶用嚟安胎。

任何時候都係超眼瞓,瞓極都唔夠飽,眼袋好大,平均每分鐘一個呵欠。好似話係因為全身嘅血液都去晒個子宮同bb度。

成日嘆氣,中醫話孕婦容易胸悶,嘆氣係用黎順番條氣。

早期懷孕檢查

有人話6週未必一定照到心跳,有啲人要7週先至照到「閃閃」。其實最緊要係,照到個胎囊有冇乖乖瞓啱位。

預約醫生

響預約睇邊個醫生嘅時候,首先係揀咗私家醫院,然後揀想邊個醫生幫你接生先。然後我發現佢喺唔同區域都有診所,首先打去最近自己嘅診所問,點知姑娘勁串:

你好,我想book睇何醫生產檢
問:你有無睇過?
我岩岩驗到有,想book,所以無睇過
問:人人都要等4星期 (成個月)何醫生好忙架

串到咁。然後我打去荃灣港安,三日後就有得見何嘉慧醫生照閃閃😚

所以就算產檢我寧願揀大醫院,因為就算你自己睇開個婦產科醫生唔響度,都會有其他婦產科醫生可以接手,亦可以響同一間醫院調得返你嘅記錄嚟睇。估唔到第六次產檢嘅時候,就已經可以活學活用地用到呢一個打算。

人生第一次產檢:
5wk6,醫生除咗量體重度血壓,會問埋有冇發燒流鼻水、有冇接觸確診者,仲會問你有冇定時做運動,例如有冇一星期做兩三次,入到去見醫生再會問有冇食緊葉酸。照得肚皮超聲波啦!同以前照超聲波嘅經驗唔同,我瞓上去嗰陣時先記得要問使唔使飲好多水先,醫生話照咗先啦,跟住就支暖暖嘅啫喱,然後一隊落去。然後就即刻睇到胎囊著床位置,見到佢有乖乖地瞓響中間。由於經期唔准,bb大概先得6週頭(之後校準左原來呢個時候得5週尾),所以未有心跳,要兩個星期之後再去照一次。

第二次產檢
6wk6,有一日返工太忙,比其他部門chur死咗,即刻見啡,嚇死我。又去搵下醫生,終於睇到佢有心跳,亦都唔見附近有積血,安心翻啲。校準左一次預產期,原來而家先至6週尾。醫生話今次仲係好細個,所以唔好照太勁嘅超聲波,話下次嚟先至聽心跳。哦,可以聽到心跳嘅超聲波原來係勁啲嘅。由於有見啡,所以要食荷爾蒙(安胎藥)。用人不疑,疑人不用,我冇搜尋過(亦唔敢)安胎藥嘅副作用後遺症,無知先係最幸福嘅。

經歷過每日提心吊膽,瞓唔安食唔落,又未至於嘔到往生,但總之就係一啲都唔舒服。邊個呃我話係十個月M FREE嘅人生,真相明明係日日刷新新嘅痛感,將一個月幾日M痛感覺,拆開做每一日都有新鮮感覺嘅痛楚。當小寶一見到我面色一變,然後好似柯唔出屎咁樣,佢就知到我又適應緊一種新嘅痛楚。

感覺上似成組消化系統罷工,食嘢落去之後,個胃係keep住常滿,需要人手去推郁啲腸令到佢蠕動。突然個胃又會變得好酸,好肚餓好想食嘢,然後一望住啲嘢食,就唔想食、食唔落,再一路輪回。

第三次產檢
8wk2,按原定計劃去產檢,今次聽到BB嘅心跳聲,人哋話第一次聽到會好感動,我淨係覺得,咁似火車聲嘅,勁共勁共咁。BB嘅心跳好快,正常平均差唔多每分鐘190下。仲會度埋子宮頸嘅長度,醫生話正常大概3.x cm,如果得2.x cm,就可能有早產風險。同一日,仲有驗埋尿,驗糖尿同埋蛋白,張試紙如果無變色,咁我哋就係好朋友。

第四次產檢:(第一次政府產檢)
10wk6,明明響私家診所檢查完一驗到有左,就即刻報名排期,但都等到成10週先做唐氏檢測,陰謀論可能政府想比自然流失果批流走左先,去慳番D資源。但其實book左做唐氏既之後幾日都已經book左做T21⋯⋯反正政府係免費嘅,就照去啦。點知佢話當初排期用咗舊嘅預產期(因為經期唔准),所以個胎根本就未夠大,所以做唔到唐氏檢查,俾佢呃咗我過嚟添。

一去到排期門口,等住成批人入去,原來一日有兩個batch,一個batch有成差唔多10個人。拎筆、填表、health disclaimer,啲姑娘勁冇耐性,講嘢好似鬼食泥咁,當你聽唔到佢講乜嘢再問多次,又會覺得你係文盲咁。

等叫名,度體重、收預約紙,睇身份證。然後就柴娃娃入房聽video,講oscar準確度90%,1%要retest,positive or negative都可以唔準,勁戴頭盔。同場有一個英文人,姑娘嘅英文非常有限公司,簡單啲來講就係不停重複幾個單字,oscar only 90%, no gender today r ha, if you want to ask more, go private hospital r.

然後就入房聽褒獎人奶、逼死喂奶粉之媽媽嘅講座。成個政府產檢嘅過程太豐富、太發人深省,所以需要一個更長的篇幅,去詳盡地講解。傳送去「人奶 vs 奶粉」

驚辛苦終於捱過咗呢一個人奶講座。

終於排到照超聲波。點知佢話當初排期嗰時,用咗舊嘅預產期(經期唔准),所以個胎依家根本就未夠大,所以做唔到唐氏檢查,shit,俾佢呃咗我過嚟醫院添。由於周數未夠11wk2,所以冇得抽血,如果想要繼續響政府做唐氏檢測,就要預約下個星期再嚟過,檢測結果就再要等兩個星期先會收到,同時姑娘都會同你講,政府嘅同事檢測準確度得80幾個%,如果想要準成度再高啲,就麻煩你去私家度做啦。

第五次產檢+T21敏兒安(抽血驗唐氏/性別):
11wk2:同左醫生講都係正正常常啦,間唔時出下血,醫生都係話唔理想。但睇住個子宮入邊又冇積血又冇血塊又冇腫瘤,唔似有特別,淨係叫我keep住食安胎藥同埋休息多啲。同一日響港安,一次過抽埋血做T21,抽咗幾管血,就大大話承惠HK$6,000。

T21係一種抽血檢驗唐氏/基因病/性別嘅檢測,因為BB嘅基因會響媽媽嘅血液裏面搵到,所以單靠抽血就已經可以知道左bb嘅基因。T21有分Standard panel同Advance panel,除咗前者平D同後者貴D之外,Standard就已經可以check到基本嘅嘢,而貴啲嗰隻就可以check多幾種微缺失病。但做research嘅時候發現,貴啲嗰隻都有一定嘅機會出現假陽性。呢個時候就要睇返媽媽嘅心態,如果你見到假陽性嘅結果就會panic、發癲、情緒大受影響,咁梗係check番基本嗰隻就已經足夠,無謂自己嚇自己。

至於我哋點解會揀Advance,純粹係因為朋友半年前有響出邊私家醫生度做T21,人哋收佢Standard嘅價錢,就已經要$6,800,就算響港安做Advance都只不過係港幣$6000渣!根據我哋兩個貪小便宜嘅性格,梗係諗都唔使諗直接book Advance。

11wk6,四日左右,T21出報告,已經知道唐氏檢測係陰性同埋性別。

第六次產檢+鴨咀:
12wk1,唔知係咪阿女太滾動,呢幾日情況好嚴峻,Keep住4日流啡。所以去咗做第五次產檢,由於搵開嘅醫生唔響度,搵咗個男醫生,係個成日上電視做訪問嘅婦產科醫生。

一我黎又驗尿,應該係飲水唔夠,黃色變左淺綠色,姑娘話只要冇變啡色都唔似有問題。個胎仲係好細,疑似經痛唔關韌帶事,後期啲先至會係腹間兩側痛。痛可能係組織或者驗完尿先知。

醫生話12week都仲流血唔正常,又話之前嗰個醫生冇同我抽過組織去驗,要內診抽啡血去驗,一言不合就出鴨咀。我痛到發出聲音,醫生仲串我,咁怕痛點順產呀。xyz佢呀。

結論:Bb有心跳、正常,係子宮頸不明原因出血,子宮同陰道無事,無息肉。胎盤釋放出既黃體酮係幾十粒藥丸(安胎藥)既份量。我問醫生唔食安胎藥得唔得,醫生話100人食安胎藥,會對10幾個孕婦有用,咁你食唔食呀?食食食。你咁講,咩都要食啦。醫生仲話如果呢個階段真流產,會流出12倍平時黎m既血,所以而家都係出少少血姐,唔打緊。嘩,醫生你咁講,真係令我好安心。

然後醫生講咗一堆數字,10個孕婦1個作小產; 10個作小產1個流產。12週前流血有10分1流產; 12週或以後有1000分之3流產。以上嘅嘢係小寶先至記得低,我真係唔係好知當時自己做緊乜。

另外問問題時間,超聲波量度尺寸誤差會有7-10日,所以係一個指標參考only。照超聲波唔會影響bb,只係會影響你銀包(因為每次產檢都成千蚊)。本身仲諗住可以走得,點知又要驗尿,去頭去尾,要30cc,飲左好多水,等咗成粒鐘,先痾得出。

今次男醫生影嘅超聲波相,全部都係鬆郁濛。邊個話男人影相手勢好啲?

第七次產檢:
12wk3,今日直情出血塊。收集埋血塊,帶埋返去搵番我個何醫生。一入到房即刻上床照下阿女嘅情況,阿女仍然響入邊玩得好開心,可能佢唔明白點解阿媽又走來照佢。醫生話一切正常,仍然繼續食安胎藥,冇其他嘢可以做到。同日,出埋B鏈報告,醫生話咁啱上次驗到,冇乜特別,只係到時生嘅時候要打多支針(佢冇講係打落我度定打落BB度),唔需要擔心。

仲要分流嘅時候個姑娘話,黎產檢啊?睇何醫生啊?你夾到佢啊?(啊?)夾到咪OK囉,佢影超聲波相係幾靚㗎。(哦~~怪唔之得上次男醫生影嘅都係鬆郁濛)

第八次產檢:(第二次政府產檢
13wk6,帶埋T21、B鏈 report今次去健康院。發現元朗健康院同屯門醫院完全唔溝通。

首先排隊磅重、驗尿(仲要係起床之後嘅第二督尿,朝頭早飲水飲得幾辛苦)、自助度血壓。

入到房,姑娘問有冇打過乙型肝炎嘅針,我就答番婚前檢查話乙肝抗體冇咗,但未打返就有左。又問有冇做過子宮末片,我連佢係咩黎都唔知。

問背景,有冇食煙/飲酒(冇。「咁你有冇出街食飯/social嘅時候飲過少少呀?」咁都會有少少。「咁就唔叫冇啦。」),有冇服用軟性藥物(係咪即係吸毒咁解呀?「係呀」冇。)有冇做過乜嘢手術,問晒全套病歷紀錄,家族病歷紀錄。

又問經期歷史,幾時發現懷孕(好彩我真係有張Excel表姐,如果唔係,而家記性差咗,背唔到比佢聽)流血幾時開始、幾時結束,政府醫院有冇做唐氏(我心諗,你真係同政府醫院唔溝通㗎喎)咁之前有冇抽過血(T21?),驗B鏈(驗左啦)。

結論:唔使飲糖水,等見醫生。

今次個醫生好溫柔,講嘢好斯文,問我哋食乜嘢supplement,本身食開日本pigeon,但營養成分表得日文。(小寶同佢講話入邊有維他命B,但醫生好似聽唔到咁,我好似翻譯咁同佢講入邊有B雜,醫生都好似唔係好聽得明我講乜)

醫生提醒我哋日本人平時食多海藻同埋海帶,所以佢哋唔需要額外補充碘。但香港孕婦容易缺碘,所以叫我哋試食惠氏(最緊要唔使錢),惠氏有220錪,但就唔係好夠鈣,如果有飲奶嘅習慣,咁就夠,如果飲得落鈣思寶都OK。

嚴重懷疑佢以為小寶係日本人,所以佢話如果要補鈣,半杯秋葵(乜嘢量詞嚟㗎)、枝豆、凍豆腐都可以。我即刻問醫生,乜凍嘢都食得咩。醫生話(西醫角度)其實凍野唔係唔食得,最驚係佢有菌,所以如果你整完啲嘢食即刻雪住佢,拎返出嚟又即刻食,其實就冇大問題。同埋如果你胃口差,凍冰冰嘅嘢食係容易啲入口。

然後就瞓上床做胸部檢查,用心跳機聽bb心跳,連超聲波機都冇。明明私家係話BB心跳好似火車聲,健康院嘅姑娘就同我講,你聽唔聽到好似馬蹄咁嘅聲音,就係BB嘅心跳聲。點解個civilization退化左。另外幫我轉介政府排期做脊柱側彎產前運動。

一出健康院門口,仲有一對姐姐圍住你,手上就多咗啲寫字板,上面有一疊入會表格,你只需要嘅係填姓名、預產日期、打算生產嘅醫院、同埋地址俾佢送贈品黎,然後每張表格簽個名,就可以拎到一埋紗巾、口水肩。其餘表格嘅內容會有姐姐幫你填番好

打鐵襯熱,同日產檢完咗返咗屋企,馬上開個Excel出嚟,即刻綜合各大網上資訊列出一個表,網上登記咗部份媽媽會先,後來先知原來有啲媽媽會係可以響唔同平台重複登記,去攞唔同贈品。但如果盡快同步做,就可以拎最多嘅贈品。

傳送門: 孕期 – 媽媽會

第九次產檢:
14wk3,自從上次出完舊血塊,就一直都好乖。點知去到產檢前兩個鐘,突然又見血絲,唔通佢真係咁想見到何醫生。點知就俾何醫生鬧唔理想,要再食多17日安胎藥(黃體酮),再唔係就要塞藥!我好驚慌:「塞邊度呀?」梗係下面啦。

然後我就開始同隻野講,你要醒醒定定。寶寶驚慌。

見牙醫洗定牙:

15wk4,因為見一路都正正常常。就響孕中期,就睇定牙醫、洗靚棚牙。有人話,可能會洗左細菌出黎,可能會經血液再入過胎,所以有人話孕期中間洗牙都會有風險,但我好驚妊娠牙痛,所以照洗。其實洗嘅過程都會好溫和,簡單啲來講就係洗唔乾淨。

第十次產檢:
16wk6,終於冇再出血,安全啦,唔洗塞藥啦。醫生都話唔使再見佢見得咁密啦。

終於可以邁向孕中期。

 

 


懷孕全集:

  1. 懷孕產檢時間表 – 深度research
  2. 懷孕產檢時間表 – 早期懷孕檢查(包括T21、鴨咀、B鏈)
  3. 懷孕產檢時間表 – 中期懷孕檢查(包括照結構)
  4. 懷孕產檢時間表 – 後期懷孕檢查(胎位不正)
  5. 孕期 – 早期購物清單
  6. 孕期 – 飲食
  7. 孕期 – 滴雞精嘅比較
  8. 孕期 – 臍帶血儲存
  9. 孕期 – 媽媽會
  10. 孕期 – 媽媽會贈品
  11. 孕期 – 中後期購物清單
  12. 孕期 – 入院前準備 (走佬袋、申請信用卡、買陪月勞工保險、家居維修)
  13. 孕期 – 出世後 To do list
  14. 孕期 – 一孕傻三年
  15. 孕期 – 朋友們常見問題 Q&A
  16. 孕期 – 奶粉
  17. 孕期 – 改名
  18. 孕期 – 英語學習之比較(Disney/Oxford/D Mind)
  19. 育兒 – N/K班

懷孕產檢時間表 – 早期懷孕檢查(6-17wk: 包括T21、鴨咀、B鏈) 有 “ 3 則評論 ”

發表回覆

你的電郵地址並不會被公開。 必要欄位標記為 *