Ritz-Carlton 麗思卡爾頓 – 堅離地食玩瞓系列 – 房內

終於我捨得去還呢一篇2020年11月嘅食玩瞓行程。本身諗住入住時間短,都唔會好多嘢寫姐,點知睇返啲相,足足可以出一個完整系列,究竟發生咩事?原來影得越多相會導致越冇動力去出文⋯⋯唔係,其實歸根究底都係我懶姐。

但由於11月一個突如其來嘅人生大事,我拖過咗頭三個月唔舒服嘅時期,又拖過咗滾水淥腳林急抱佛腳嘅三個月懷孕準備事宜,先得閒出返上年嘅生日活動。

為咗慶祝我生日,小寶今年好豪邁地帶我去Ritz-Carlton 麗思卡爾頓過咗兩日一夜。離地到食在102F,離地到瞓在111F、離地到遊在118F。

Ritz-Carlton全系列

雖然聽落好似好感動,但其實呢次staycation係源於小寶蝦碌嘅行為。話說2020年年尾,我登記咗Amex唔知乜嘢優惠,如果11月尾前住Hilton group滿$2,000,就有$600回贈。然後小寶好興奮咁樣去book咗Ritz-Carlton,仲要係我哋去到離開酒店先醒起,乜Ritz-Carlton係屬於Hilton group架咩?好在check-out嘅時候,冇問佢係咪一定要用細頭先可以有個優惠。都算係不幸之中嘅大幸。

為咗彌補呢個損失,我甚至打電話去Amex問返,請問仲有冇Marriott group 買$2,400,回贈$600呢個計劃登記添,好可惜Amex話嗰個計劃好早已經enroll爆滿左。Anyway,起碼我盡咗力呀。

總數HKD2900*1.1=3190一晚。

當日我放左工,滾水淥腳咁衝去酒店,寶寶都累了,亦係唯一一次無請假享受盡酒店available嘅時間,所以結論係以後staycation都一定要請假,唔可以比OT浪費咗享受酒店嘅時間。幸好小寶早到左,可以向天黑前影一影離地嘅景色。

疫情時期,酒店送兩set口罩、同埋消毒搓手液。

好可愛嘅陽台,玻璃窗上面仲會有清潔吊船嘅溫馨提示,有中文、英文、日文。

日光:

果然無愧於堅尼地嘅景色,仲可以見到層小雲添。好在我地唔畏高架姐。

搭lift嘅時候我吞左成四五次口水,幾經辛苦,我終於上到房啦!捱過一日難捱嘅工作,望住呢個景色,的確幾舒壓。夕陽、天色漸沉:

眨吓眼變埋夜景:


好快脆望一望酒店送嘅生日蛋糕、再連同生果、合桃酥、香檳。就急急腳趕住去食package入邊包嘅晚餐。所以要預留足夠嘅時間,先至能夠可以慢條斯理去享受人生。

 

房內設施:

一入門口,有條長走廊,直入就見到大床正對面嘅電視同埋工作台

一打開門入房,100%遮光窗簾會自動打開,一縷日光就會照射入房,都幾震撼。但當時我淨係掛住想去食嘢。

轉身一望就見到茶水間分隔住走廊同沖涼房、廁所。

廁所同企缸都係獨立空間,可能因為空間比較大,使用雙洗面盤設計,大家唔使爭位用。花灑係雨林式,亦唔會好似某啲酒店有雨林式得黎都要就位先林得晒成個身。同埋洗手盆嘅水龍頭可以同沖涼房同時開,水溫冇差別。

水龍頭係Kohler,響上邊嘅水珠係會自然扇走,可能係因為新淨嘅緣故,如果唔係都唔知點樣保養得咁好。無印嘅柚子味浴鹽CP值好高,抵買。

以前從來唔知道酒店嘅放大鏡係可以有燈圈,果然今次多手拉下條連(之後發現原來香格里拉都有),就刷新左新知識。

水壺係Kenwood,出水口設計唔錯,水唔會沿着壺邊倒流。風筒幾夠風力,條繩都夠長,都係果句,用之前記得用濕紙巾消毒一下。吹頭力度唔錯,亦都唔會吹到頭髮變乾旱。

沐浴套裝叫Asprey,雖然旅行裝側邊有刻道,好似好貼心,但寫簡體字。香味一般,我唔太鍾意。

退房時間Extend 1400-1500。

Ritz-Carlton全系列

發表回覆

你的電郵地址並不會被公開。 必要欄位標記為 *