上回提要，入住左美輪美奐嘅美利酒店，Check-in完上山頂打個白鴿轉，返酒店浸腳，然後出去太古廣場接下朋友，晚餐就已經送到入房。
今次The Murray Staycation嘅package包左三道菜嘅晚餐，包括冇得揀嘅前菜、三揀一嘅主菜、同二揀一嘅甜品。
四個人我哋叫咗牛同魚，甜品各一。
一返到酒店，就見到餐點已經送到現場，仲有膠蓋蓋住。
哎呀唔記得同酒店講，我唔食生野。但美利喎五星級酒店喎，食少少冇事嘅。我咁大個女第一次食魚子醬，應該係掛，但點解佢比鐵匙羹我食嘅。下面有鮮甜嘅薄切帶子，旁邊仲有蛋白柚子醬。肚痛都值啊。又咁講，五星級酒店呢，如果你有啲乜嘢發現真係自己唔食得，佢唔會唔換俾你嘅，不過我哋又遲咗返嚟，又費事等佢上嚟換，反正我事後都冇肚痛啊。
然後就喺餐廳入邊拎麵包出黎，有好多款唔同麵包，其中一份仲係紅蘿蔔麵包。對上一次食Carrot cake已經係差唔多七年前響灣仔星街定月街，都係回憶嘅味道，係我見識少定係點，我好似淨係響港島先至食過Carrot cake。食食吓先發現應該留肚食主菜先。
就快快趣收埋未食嘅麵包入餐車，拎份鱸魚、牛肉出嚟。鱸魚有驚喜，嫩滑唔猩，入口即溶，下面墊底嘅仲有營養藜麥。
本身order牛肉嘅時候，仲想同酒店講要幾多成，但酒店哥哥話呢一份牛肉部位冇得指定成數，心諗呢份牛扒咁奇怪嘅。拎上枱先知原來呢一份係有啲似豬腩肉嘅牛肉，我哋有兩份，一份就好似五香肉丁咁柴、另一份就油膩到傻咗，就算配上番石榴果醬，都唔係我哋杯茶。
甜品有兩款，一款係椰子熱情果芝士蛋糕、一款係Earl Grey味朱古力撻。芝士蛋糕比較易入口，酸微微冇咁滯。朱古力撻令人好飽，但係食下食下撈埋上面嘅忌廉又可以食得晒。都好味過Ritz-Carlton嘅signature chocolate cake。
The Murray 相關：
The Murray – $3,xxx 包3道菜晚餐、早餐、下午茶 – 房型
The Murray – $3,xxx 包3道菜晚餐、早餐、下午茶 – 晚餐
The Murray – $3,xxx 包3道菜晚餐、早餐、下午茶 – 早餐
The Murray – $3,xxx 包3道菜晚餐、早餐、下午茶 – 下午茶