Brother – P-touch Cube
其實一路糾結咗好耐，買部嘢返嚟唔等洗點算，又唔想浪費地球嘅資源，究竟買定唔買。買左又有咩用呢，純粹就係一個衝動就買咗標籤打印機⋯⋯好彩我定力仲夠，冇買到3D打印機。
既然買咗，就要腐乳佢一個買嘅理由！要做到齊齊整整一家人嘅感覺，唔可以令到枱面上嘅文具唔整齊、護膚品又好、家具用品都好，全部都要齊齊整整。宜家呢個世代講求嘅係文青生活態度，雖然做唔到屋企簡潔北歐風，都要做一個收納達人。請見開箱文：
你睇吓日本買嘅真係唔同啲，日本亞馬遜運返嚟，連個紙盒都靚過人。
打開一睇，我差啲以為呢一部係Mac Mini。日本嘅美學、蘋果嘅美學，一個字，靚。你睇吓個「Welcome！」，subtle 治癒。
仍然都係蘋果嘅美學，紙箱與紙箱時間咬合貼服，倒出嚟嘅時候直頭有油壓嘅效果。
包裝紙盒入邊淨係有標籤打印機同埋電源插頭，標籤打印紙要另外買，買最平平嘅標籤打印紙，試一試佢先，以後先至買靚嘅打印紙。
你睇吓放喺肥鯨魚隔離，幾咁無違和感，直頭可以會心微笑。望住佢都開心，果然係生活態度。響Brother品牌下邊仲有個窗口仔，可以睇到標籤打印紙幾時用晒，然後先至換紙。
可以使用手提電話下載Apps，仲可以加背景、框、花紋、圖案，印完一條出嚟，圖中可見有個subtle嘅按鈕，上面有把可愛小鉸剪嘅圖案，㩒落去就可以cut開佢。
例子：配合無印膠樽使用，療癒舒暢
延伸閱讀：
[文青] 生活態度 – 輕度強迫症的桌上萬用箱
[文青] 生活態度 – 酒店手信
[文青] 生活態度 – 標籤打印機