[電訊商] 由數碼通到CSL,再成為自由鳥。

數碼通

早年嘅時候一直沿用數碼通($295 6GB),貪佢搭西鐵地鐵上網入lift都冇阻礙,點知去到有一日數碼通話續約嘅價錢居然貴過市價一倍,仲聲稱新客入數碼通先至會有平價優惠,忠誠度高嘅顧客只可以用原價續約⋯⋯真黑人問號。所以2018年嘅10月就同數碼通講拜拜。

CSL

既然忠誠度係唔值錢,咁就唯有轉去CSL嘅懷抱,當時又真係有位好嘅agent WhatsApp教路,教點樣用Tap and Go (virtual debit card)每個月交電話費$210,過兩日就會響Tap & Go回贈返$20。變相$190就有6GB,抵過SMT好多。雖然一路用落嚟速度都相安無事,亦都知個市好差,但CSL chur客續約實在太煩。

明明合約期係2018年10月29日到2020年10月28日,由2020年1月開始,CSL就開始warm call疲勞轟炸。最高紀錄我記得3月嘅時候,每隔兩日派唔同人打一次嚟。每次一打嚟就話你合約就嚟到期,我話我明明合約係10月尾先到期,職員先至話睇錯咗然後繼續sell⋯⋯每一次都有叫佢哋留低備注,唔好早成年打嚟。到咗好似第5-6次聽電話,直頭已經有叫佢哋delete我個電話號碼,唔好再打嚟,亦都抄低晒職員號碼留晒紀錄。到咗第8次聽電話,真係頂唔順發脾氣,電話入邊個哥哥話完全冇記錄Mark低個客着火⋯⋯

到咗6月嘅時候,又維持一個星期打兩次嚟。然後又打過去CSL發脾氣,又留資料又成,講埋我會轉其他台,唔好再煩我。然後就開始每隔3至7日,就send一個短訊過嚟,6月到9月10號,總共12個短訊,每次短訊入邊都叫我搵唔同嘅客戶服務員。

7月電話就好似靜左啲,到左8月頭,又回復返兩日一次電話,好啦我直頭唔聽,8月尾就靜返啲。到咗九月頭,又係兩日一個電話⋯⋯仲要次次都係唔同電話號碼,有時二字頭有時三字頭,真係人都癲。雖然唔會cut唔到,但嗰種疲勞轟炸其實都幾趕客。

自由鳥

放個人地,放過自己啦。小寶早幾個月已經轉咗做自由鳥,所以我琴日啱啱開咗個自由鳥戶口,食埋推薦人優惠。一齊都揀咗「自由鳥 x 恒生信用卡DORI上台優惠」,只要用恒生信用卡每個月自動轉賬找數,就有額外現金回贈或者額外數據!所以話留返張恒生Enjoy信用卡真係好有用!

接下來請收看:[電訊商] 「自由鳥 x 恒生信用卡DORI上台優惠」

家居類/著數區/

發表回覆

你的電郵地址並不會被公開。 必要欄位標記為 *