[豪華團] 港島香格里拉 (ISL) – Staycation – 酒店篇 (多圖)

人哋話九龍香格里拉(KSL) ([豪華團] 九龍香格里拉兩日一夜 Staycation Offer) 嘅服務好啲,港島香格里拉(ISL)嘅飲食好啲,今次就等我哋會一會港島香格里拉。一晚淨房價$1,000+10% ($1,100),等慳家小能手配合Golden Circle Jade member使用,有免費早餐,再加上自費$350食埋Nadaman灘萬晚餐,就咁就可以食飽飽,仲有得帶手信走。

同以往一樣,我哋計到盡,用盡左一切辦法,用最低既價錢,將利潤最大化!內容大致會分為,(1)本身計劃可以享有嘅福利,(2)同埋Amex送既酒店翡翠會籍(Golden Circle Jade member @ Amex 細頭卡)可供疊加嘅着數。

訂房烏龍事件傳送門
酒店篇
1. Check-in 

2. 房型共賞
3. 房內日景、夜景
4. 酒店內部亂逛,加映酒店餐廳
食物篇

5. Jade member Amenity
6. 灘萬Nadaman晚餐(自費)送生日蛋糕
7. Petrus任食à la carte早餐

同場加映:Amex Platinum Card 美國運通白金卡(細頭) – 那些年我食盡的優惠

1. Check-in

由於發生咗訂房烏龍事件(訂房烏龍事件傳送門),我哋check-in嘅時候,酒店員工係咁say sorry,其實我又覺得冇嘢啊,最緊要係佢有俾返間房我咁咪OK囉,搞到我哋勁唔好意思。作為補償,酒店安排咗最高層55樓嘅山景房(Peak side room on executive floor (55/F))(其實係55樓最細嗰間房),搞到我哋又係勁唔好意思。好似好出名嘅餐廳Petrus 就響正正樓上56/F,咁聽朝想去食早餐就唔使搭咁耐lift啦,耶。

雖然放咗我哋上55樓(horizon club)嘅山景房,但係其實係No access to horizon club facilities,咁都合理呀。

酒店話呢一層樓(horizon club)同埋佢自己本身係招待開總理、總統同總裁XD有試過公司高層仲叫佢坐低請佢食酒店送嘅曲奇餅添,我都想請佢食、坐低飲杯茶,可惜而家大家帶着口罩咁就無謂啦⋯⋯勁尷尬XD

2. 房型共賞

門口掛畫,希望可以培養到我哋兩個有返啲藝術氣息⋯⋯

樓底其實都算高,仲有一盞玻璃吊燈(應該唔會傾瀉下來掛)。房咭係一般貨色,同澳洲嗰個唔同,木製房咭真係好文青,靚。(Sydney Shangri-La 木製房咭傳送門:【202002 澳洲樹熊之旅】Day 1 – 如何豪遊樹熊之鄉而又不失霸氣

係55樓最細嘅一類房型。不過冇所謂啦,總理、總統、公司高層都住呢層之嘛XD。連送樽裝水嘅姐姐都會叫得出我嘅姓氏,唔知係咪呢一個樓層特有嘅服務呢?

可能總裁住嘅樓層係真係唔同啲,我咁大個女(Sorry見識少)第一次見酒店房入邊有Standalone嘅掛衣架。

感覺上有啲陳舊⋯⋯呢啲叫古色古香嘅設計感。


同九龍香格里拉一樣,櫃桶裏面有嘅嘢都會有個好subtle嘅圖示,呢個係好可愛嘅電筒響床頭櫃。

傳送門跳去:[豪華團] 九龍香格里拉兩日一夜 Staycation Offer – 港幣$1,000 Hotel Credit

嘩,真係第一次住行政人員樓層,基本嘅文具都有。風筒放咗響房間櫃桶裏邊,風力唔錯!雖然唔似Artus會提供Dyson,但風力合格。

床頭有隻熊熊。曲奇牛奶嘅牛奶已經響迷你雪櫃備妥,同九香嘅長方形盒裝牛奶唔同,呢邊係屋仔牛奶。

由於近排屋企裝修,對浴衛牌子多咗研究。港香整套花灑水龍頭都係用Grohe,仲加上安裝左雨淋式花灑響浴缸上嘅假天花位!成套一啲都唔平!

可惜花灑喉管可能始終使用量高(或者客人粗用),雖然已經包左膠,但仍然有破裂嘅位置。又或者係Grohe嘅三段式花灑,曾經有個師傅講過,越多花式嘅花灑,水壓就會越溫柔,就會越易壞,應該係咁解掛。

沖涼冇玻璃企缸,要企響浴缸入邊沖涼。第一次見雙層浴簾!以前用浴簾都會將佢拉入個浴缸入邊,費事沖涼嘅水流咗出去洗面盤地板。今次用雙層浴簾,防水個面拉入浴缸,再加一面就放浴缸出邊,雙倍擋水!好溫柔。

花灑水壓好溫柔,唯有用雨淋式花灑,利用地心吸力去加強水壓。定係屋企用慣左日式水柱嘅花灑呢?上回提要,我哋好鍾意響酒店測試佢嘅沖涼同洗手盆係咪用同一條水管。沖涼房同洗手盆通過壓力測試!

疫症關係送消毒紙巾消毒搓手液一支,本身都有自備到,所以開都冇開過,亦冇帶走。

全組L’OCCITANE。仲送咗四包浴鹽(等我仲自備左添),不過用嘅時候,浴鹽味道好誇張、太濃,浸完之後全身都係香格里拉嘅味道⋯⋯唯有沖返乾淨啲⋯⋯

全組廁所座廁都係用Toto,貴價之選。Sorry我見識少,其實左邊嗰個係咪尿兜嚟㗎⋯⋯浴室鏡中間有發熱管,有一個正方形嘅空間係唔會有霧氣嘅。

3. 房內日景、夜景

日景

由於今次係山景,完全可以體驗得到香港係一個石屎森林,除咗樓都係樓⋯⋯

夜景

我好努力想影到個月亮。

點知又比中銀搶咗鏡。

iphone鏡頭盡咗力㗎啦,好有萬家燈火嘅感覺,山頂凌霄閣好吸引眼球。

4. 酒店內部亂逛

一切塵埃落定之後,就準備當去旅行咁行出酒店房周圍亂逛。啱啱酒店姐姐話港島香格里拉係「旗艦店香格里拉」,嘩玩到咁大,點都要會一會你。我哋無聊到喺唔同樓層,欣賞破左健力士紀錄最長landscape嘅indoor landscape掛畫。雖然我哋兩個都冇乜藝術細胞,但唔知點解去邊度旅行都好鍾意行博物館。

酒店姐姐話幅畫一剝落,就要安排調船維修,所以我哋欣賞嘅過程中都不由自主一路研究佢邊度有剝落感嘆。

落到地下見到樹林庭園、流水潺潺、日式燈台,應該冇蚊掛。


我哋太晏check-in,影出嚟嘅相全部都唔係好夠光。


係香格里拉嘅傳統,今日係星期六,請盡情踐踏我吧。

見到有一層寫住「圖書館」,鬼鬼鼠鼠入去參觀下。影幾張照騙。

再逐層兜埋落去視察酒店餐廳,順便諗吓今晚食乜。兩個人叫一個餐應該夠飽,因為仲有個生日蛋糕等緊我哋。去現場朝聖一下灘萬Nadaman。然後人哋問我哋使唔使落定單先,我哋懶醒咁話想返房先嗌⋯⋯然後又燒焦了,詳情請看食物篇

Lobster bar好似落咗場。

夏宮係中菜館,唔知係清潔中定係點,有浸酸酸地嘅味。轉過扶手電梯仲可以睇到樓下下午茶Cafe。

其實幾感慨,第一份工由公司同事帶我入呢一個門口,見識到原來「食嘢原來可以食咁貴」嘅人生。今時今日,我居然可以食正staycation嘅優惠,真金白銀比一個咁低嘅價錢行入呢一個門口。慨嘆。

酒店外景物,玻璃好似有弧度,所以越睇越暈。

*****************************************

港島香格里拉合集
[豪華團] 港島香格里拉 (ISL) – Staycation – 烏龍訂房事件
[豪華團] 港島香格里拉 (ISL) – Staycation – 酒店篇
[豪華團] 港島香格里拉 (ISL) – Staycation – 食物篇

九龍香格里拉合集
[豪華團] 九龍香格里拉兩日一夜 Staycation Offer
[豪華團] 九龍香格里拉兩日一夜 Staycation Offer – 配合Golden Circle 翡翠級會員Jade member
[豪華團] 九龍香格里拉兩日一夜 Staycation Offer – 港幣$1,000 Hotel Credit
九龍香格里拉 Welcome Back Offer – 豪華閣 (房型)
九龍香格里拉 Welcome Back Offer – 豪華閣(下午茶及雞尾酒時段)
九龍香格里拉 Welcome Back Offer – 豪華閣(早餐)

閱讀更多

[服務式住宅] K11 ARTUS 試住服務式住宅 – 房型篇
Mandarin Oriental’s Clipper Lounge – Lunch buffet

發表回覆

你的電郵地址並不會被公開。 必要欄位標記為 *