[理財類] 老生常談之節流篇 - 招財表（錢錢Excel表）

高階開源方法取決於學歷、進修、機會、運氣⋯⋯全部都要靠累積努力先至可以達成，最主要嘅係投入既時間成本。雖然追唔番過去既時間，但今時今日仍然可以靠每月嘅勞力去賺取工作以外嘅額外收入⋯⋯詳見「出糧戶口篇」。

開源咁煩架，咁我做相對簡單啲嘅節流先啦。但可能你係：呀，點解我每個月都有出糧，但每個月都使突左既。呀，明明做野咁辛苦，買樣玩具（電子用品、手袋）獎勵下自己啦，明明我份糧出成兩萬蚊，實負擔到啦。

要節流呢，首先就要知道自己嘅每月強制支出同生活使費。

清單篇

首先係要知道自己嘅每一項強制支出同生活使費，咁對自己財政能力先有full picture架嘛。好似我（一個有強迫症嘅小師奶）就係因為懶得不停登入唔同網上銀行戶口，變態到會將唔同銀行嘅月結單同信用卡交易紀錄，全部入落一個Excel表，咁自不然所有支出使費一目了然。

如果覺得excel唔方便，市面上都仲有好多電子銀包比你入流水帳既…當然啦，呢樣野好睇每個人既性格既，夾硬黎迫你做都唔會開心啦，唔通仲係小學生交功課咩。我既睇法係，如果你唔付出，又點會有回報呢。你不理財，財不理你呀。

減債篇

將所有支出寫完出黎，係咪發現其實自己真係賺得好少，係咪🥺

仲要留意嘅係清單上有無債台高築既利息，快d撥多少少儲備去搞掂d債務，自不然就唔需要再花一筆向償還利息上，變相可以令清單上多番d正數囉⋯⋯

罐子篇

當年啟蒙我嘅係6個罐子理論，理論上你可以用6個信封或6個玻璃樽（各有喜好嘅啫）去儲錢。每個月當一有收入嘅時候，就將自己嘅收入分成6份，按個人實際需要，去投入相應既罐子。話就話6個罐姐，你讀書都無咁聽話啦，自己按需要增減啦。每個月要花費嘅部份就由相對應嘅罐子取出，從而限制自己唔會支出透支。

例如：假設收入為$20,000
強制支出
強積金5% – $1,000
家用15% – $3,000
保險10% – $2,000
生活支出30% – $6,000

可調整支出
儲蓄10% – $2,000
投資10% – $2,000
娛樂15% – $3,000
進修5% – $1,000

e.g.

我自己仲開多個罐放「禮物」，年紀到左差唔多，隔個月都有人派炸彈，唔儲錢唔通個個月都要向「娛樂」到扣起一筆咩。就算你話我無朋友既，咁過時過節送禮比屋企人都岩用呀。

向呢個例子度，如果你當月真係買左樣$3,000既「娛樂」玩意（或玩具），咁你今個月就唔好再諗住出街食飯、唱k行街shopping啦，親。因為你個娛樂罐子已。經。乾。塘。啦啦啦。

當然時代嘅進步，我哋有電子銀行同時又唔需要使用大量現金，而家唔再需要用實際嘅散銀紙幣去入罐仔。我自己就係用Excel表既Column去做罐仔分類，將現金放喺銀行仲有個好處，起碼有得積存利息。今時今日唔通仲要用餅罐收藏現金呀？咩世代呀？嘉頓公司都唔會派息比你啦？

咁當然，我身邊仍然有朋友為咗拒絕誘惑，每個月出糧淨係提取該月份既零用錢出黎(例如$3,000)，該月只可以使咁多。然後月尾約佢食飯，你會見到佢數神沙找數。唔緊要既，最緊要係搵到個岩自己既方法，先至有恆心去實踐姐！

所有事都係，最怕係你唔開始做，只要你開始左，就距離你嘅目標近一步！

財務類合集

理財類

銀行類

信用卡類

證券類

[理財類] 老生常談之節流篇 – 招財表（錢錢Excel表）