[有教無類] BNO 續證 深度教學文 – 準備文件篇

接上一篇填表篇,跟住系統就會按照你啱先嘅誠實答案,按照你嘅情況,問你攞相對應嘅證明文件。人人條鬼腳都唔同,所以你要根據呢一張表準備搵返佢想要嘅嘢出嚟。

填晒所有資料就會出到呢一版,仍然都係按照你個人嘅情況,佢提你要寄啲乜嘢文件過英國。例如佢需要你將而家手上拎住嘅舊護照寄去英國⋯⋯咁如果你話你唔見咗本護照,咁係呢一版就會出唔同嘅嘢啦。

由於一來一回運費好貴,我承受唔到佢彈我表格、仲要我再寄過嘅費用,嗰陣時為咗穩陣起見,所以我將上面呢一版打印咗出嚟,然後將以下文件嘅編號寫響上邊呢一版度,再響每一份文件嘅右上角寫返文件編號(嚴重強迫症),(由於嗰陣時同小寶一齊申請)再將兩個人嘅文件分別各自入落一個膠File,仲要響封面各自寫上PEX開頭嘅申請編號,再一齊入落個大信封,先寄過去。

考慮到佢時候會寄番晒啲文件副本返香港,咁我估佢應該會將啲十卜停documents scan入機,所以我淨係用萬字夾夾住每一組文件,費事要佢起釘。簡直喪心病狂。

要準備嘅文件 (重要嘅嘢要講三次,留意番、留意番、留意番,人人要準備文件都唔同,你會視乎你回答上面問題嘅答案會有更改;例如:你根本就唔見咗本舊護照,咁就唔需要交舊護照啦)

0.上面個版作為Cover letter(將申請嘅參考編號同埋申請人全名寫埋向呢版,等佢方便分辨兩個申請)
1.舊BNO護照正本
2.出世紙彩色雙面影印副本(因為出世紙霉霉爛爛,我再交埋出世紙核證副本雙面影印副本)(俾佢識別到我係九七前喺香港出世嘅)(可以睇埋出世紙篇)
3.香港身分證彩色影印本(證明我仲係香港人)
4.香港特區護照彩色影印副本(留意番,特區護照嘅正本我冇寄走架)
5.IR56B 副本(公司每年出俾你報稅嗰張表格,因為我嗰張係全英文嘅有晒公司名、自己全名、自己地址、職業)(但又驚佢唔接受公司報稅表,再補多份稅局文件先)
6.稅局評稅表副本(但係呢,信紙頭佢係寫中文嘅稅務署,又驚佢睇唔明中文,再加一份有英文IRD名嘅確認收款單副本,咁兩份都有IRD個紅色logo,應該明啦掛)
7.我印象中好似連公司糧單都比埋副本佢,務求千祈唔好彈我please
8.彩色相片x2(因為又驚佢釘爛咗一張,我比定兩張佢,仲用塑膠袋裝好)

相片篇:

去普通影相鋪,同佢講話要影BNO相就得㗎啦,幾日有得拎。係喎,就算係我哋出影相舖影,嗰陣時小寶個髮型令到佢個申請被人延期,我估應該係佢嘅劉海令到佢嘅面形冇咗一忽,所以嗰陣時要先解釋完先至會再幫佢排期申請,果時我既解釋係: It is a kind of hair style.

雖然依家可以接受電子相,好似話屋企有個白色嘅牆就已經可以影到,但我覺得好危險。如果係自己影嘅相需要留意番,佢嘅證件相要求上面左邊右邊三條邊嘅距離(真係好煩),費事煩就出去影啦。大家仍然可以首先試咗先,同場加映朋友試完嘅即時反應:

呃⋯⋯哈哈哈哈哈

30 May 2020 即時更新:快圖美現場等影相,前面五至六位都係影緊BNO嘅相。

但就算出咗去影佢都要你Scan左張相入去個系統度,要彩色、Jpg或jpeg檔、要大過50 KB但少於10 MB。呢個時候要學識點樣去adjust jpg檔既size,善用網上資源去幫你。印象中可以響個系統度上載左先,得同唔得都會話你聽。(如上圖)

出世紙篇:政府網頁傳送門

如果出世紙已經霉霉爛爛,可以帶同正本去出生登記處或網上申請核證副本(certified true copy)HK$140。
如果出世紙唔見咗,要比多HK$140查冊,再申請核證副本。

改名篇:

如果改過名嘅話,要交埋改名證明書。
但聽聞18歲身分證如果加咗英文名,係唔會有任何改名證明書嘅,需要去民政事務署度做宣誓。

中文文件篇:

有朋友問如果啲文件上面剩係得中文,英國人會唔會睇唔明㗎。大佬呀,將心比己啦,實睇唔明啦。呢個時候就要問你有冇第二樣嘅文件可以取代到,如果冇得揀嘅,但又剩係得純中文喎,你咪自己搵張紙,用簡單英文去翻譯佢出嚟囉,夾埋過去交,盡咗人事啦,又唔使搵律師嘅。

可以參考以上我對稅局文件嘅做法,再喪心病狂啲,我咪搵張黃色post it指住IRD個紅色logo,話俾佢聽IRD嘅英文全名囉。

父母出世紙篇:

問:父母出世填左Guangdong,父母響香港結婚,有提供結婚日期,所以彩印左結婚證。但比唔到出世紙點算?
答:就算有中國出世紙向手,你比左佢,都唔知對renew BNO有咩幫助啦。如果比我,我會比父母身份證副本,都係用嚟證明佢地嘅身份啫,身分證上面嘅簽發日期如果係九七之前,而身分證又有三粒星,咁咪合理啲囉。再唔放心嘅,最多加多封簡單嘅信去解釋返點解冇出世紙囉。

祖父母資料篇:
問:Grandfather 填咗I don’t know,揀完cannot provide,就有隱藏text field expand出黎,填左pass away long time ago。後來先發現提交嘅父母結婚證有寫father name⋯⋯/。\使唔使改返知道Grandfather嘅資料?
答:就算答咗個grandfather嘅全名之後,就要答grandfather向邊度出世⋯⋯你咪又係答唔到,到時如果要埋你grandfather嘅出世紙,真係喊都無眼淚。所以結論係,比我都係會照填I don’t know。


BNO Renewal 全系列

[有教無類] BNO 續證 深度教學文 – 填表篇
[有教無類] BNO 續證 深度教學文 – 準備文件篇
[有教無類] BNO 續證 深度教學文 – 加簽/副簽(countersign)篇
[有教無類] BNO 續證 深度教學文 – 寄件篇

發表回覆

你的電郵地址並不會被公開。 必要欄位標記為 *